Kohhran sawisel

Tunlaia thu lar tak pakhat chu, "Kohhran hi pawn lam miin an sawisel ta vak vak mai," tih lam hawi hi a ni a, hei hi engtia dawnsawn tur nge tih lam hi ngaihtuah ngun deuh chu a ngai a ni.

Tun hma Siamṭhatna hunah khan Protestant hotupa Martin Luther-a khan a tih ber chu kohhran sawisel a ni a, ani kha chuan siam ṭhat duhna rilru pu chungin a sawisel a, na takin va kher ṭhin mahse a rilru chhungrilah kohhran hmangaihna a neih vangin a thiltihah khan a hlawhtling niin a ngaih theih.

John Calvin pawh khan a hunlaia thil ṭha lo kha chu huaisen takin a sawisel ngam a, siam ṭhat kha a tum ruh avangin mi pawhin an hrethiam hle a ni.

Tunlai Mizoramah hian phun ve hrim hrim, sawisel ve hrim hrim, mi chhiatna zawnga tihmualpho tuma phi ruai mai mihring hi an pung nasa a ang ka ti a, tun hnaia kan thil hriat tam tak hi siam ṭhat duhna vanga Kohhran sawiselna lam aiin Kohhran sawiselna tur zawng ngar ngarin an sawisel ang ka ti a, hei hi chu a ṭha ka ti ngai lo vang. Kohhran mai a ni lova, sorkar pawh a ni a, sawisel tum ringawta veh chi hi an awm a, heng hi chu siam ṭhat duhna rilru thianghlim aṭanga chhuak ni lova a er leh ep (opposition) rilru pu angah kei chuan ka ngai hmiah mai.

Tichuan, han sawi tlang ta zel ila, Kohhran lam pawh hian sawisel thiang lo anga inngaihna hi dah ṭha se, an tihdik loh leh fel lo an sawi a nih chuan a insiam ṭhat lam hi ngaihtuah se, chhan let dan leh insawi fihlim dan lam ringawt hi ngaihtuah lo se, a sawiseltu lam pawh va diriam chiam-in va bei vak vak lo se a ṭhain ka hria.

Hman deuha an rawn sawi chhuah Kohhran inkhawm-puia ei leh in sem tuihnai leh lutuk, man to leh pawisa hek lutuk angte kha kan ram economy nen a inmil nge inmil lo tihte pawh ngaihtuah ngam se. "Kan Kohhranin kan thlen ṭumin ei tur a tui lo bik ang," ti veka an thlen avangin ei leh ina kohhran insensona hi a tam hle a ni.

Krismas leh Kum-thar a lo hnai leh ta a, heta kan ruaiṭhehna sensote hi a tam leh dawn a, missionary chawmna sum atana thawh ṭhen itawm tham hi a awm dawn.

Biak In kan inneih ṭhat siak anga an sawite pawh hi sawiselna mai mai angin lang mahse a tak tak a chang chho zo ta a, Kohhran hi siam
ṭhat duhna thinlung nena sawisel chu a thiangah ka ngai.

- Lalthanmawia