Inkhawmpui leh ruai

Bial inkhawmpui kan thleng a, palai ruai kan buatsaihsak a, a tui ber ber, thlenga suah sên loh khawp kan siam a. Tun Pres-bytery Inkhawmpui-ah khan kohhrante duhsaknain ka palai ve nawlh mai a, chutah pawh chuan ruai a tui leh kher mai. Thlenga leng lo khawp bawk a ni an siam leh ni.

Ka ngaihtuah ta chu kan inkhawmpui te hi a ropuiin thlarau lam thil ni miah loah hian sum kan va sêng hnem tak êm! tih hi a ni. Kohhrante kan hausa ta hle tih a lang a, chuta kan inelna ni ta ber chu inkhawmpui inthlen ropui siak hi a ni ta a ni. Kan tlangval ve laia thingtlanga kan awm laia inkhawmpui te nena khaikhin chuan tuna kan inkhawmpuite chu a ropui ta hle mai. Khâng hunlaia ei tur kan hriat ngai loh ṭha ṭha kha kan ei thei ta a, mahse thlarau lam nunah chuan kan pachhe ta hle thung mai.

Kohhran thlarau lam nuna hman kan phak tawh lohna chhan tam tak zingah chuan kan hausa ta lutuk hi niin ka ring. Kohhranin sum kan ngah a, chuvang chuan inkhawmpui thlen ropui lamah kan ṭuan ta zawk a ni ber mai. Inkhawmpuiah ruai kan siam a, ruai siam zawhah in lama hawna hun thawl tak a awm a, ruai kha siam lo ta se, in lamah pawh chaw kan ei hman zân mai a, ruai siam kha thil ṭul tak chu a ni chiah lo.

Inkhawmpuia palaite ei tur ruai siam nan hian chêng nuai têl an hmang ngei dawn a, ruai kha siam ta lo se, kohhran huam chhunga khawsak harsa hnenah, chhawmdawlna leh relief lam bakah han semin emaw, rahbi tleute eizawnna tur zawnsak leh siamsak nan hmang ta se, kohhran chu mipuite tan a ṭangkai dawn hlein ka hria. Ruai siamna senso khan thil tam tak a tih theih ngei ang a, sorkarin NLUP a pek ang zat hi chhungkaw pahnih pathum hnenah a pe thei ngei ang.

Inkhawmpui hlawhtlin leh hlawh-tlin loh kan tehna te hi a khawvel thil ta hle mai. Usher form a nalh em tih te, ruai siam a tui em tih te, a thlengtuten an thleng hneh viau em, mikhual sem leh a behbawm vel an hneh em tihte mai mai a ni ta. Kan inkhawmpuite pawh hi a ropui tial tial a, chutihrual chuan a ro tial tial ang tih a hlauhawm hle.

Inkhawmpuia sum sên a tlêm zazawkin a rinawm. k hi chu ngaihtuah chian a ngai viau mai.

- Lalsangliana Jaucha