Hnawksak loh hi a changkang tlat!
Singapore chu a changkang an ti ziah a. Fai hi a changkang a lo nia. Hnawk loh hi a lo changkang tlat! Singapore chu a fai, bawlhlawh an paih mai mai lo miau a! Changkan hret hi a lo harsa lo dawn tlat.
Singapore-ah khan motor aṭanga eng emaw paih chhuak ta mai te, rêl chawlhhmun leh dawrpui vela bawlhhlawh tenau deuh pawh paih darh ta mai maite an awm hauh lo. Bawlhhlawh bâwm kan pan zel! Changkan mai dan awlsam tak chu, bawlhhlawh a bâwmah chauh paih ve mai hi a ni.
Chinese nula leh tlangval pahnih hian min rawn pan a, "Khawi lai nge meizial zûkna hmun hi le?" an rawn ti a. Ka kawhhmuh a, an va zu ta hlat hlat a. A bung paihna tur lianpui awm saah chuan an sikret bung chu an paih a, an kal leh ta mai a.
Singapore khawilaiah mah khan sikret bung paih mai mai ka hmu lo. An meizial zu mite pawh an changkang a niang!
Singapore khaw chhunga Mount Faber Peak-ah cable car-in kan chho a; kea kan chhuk lehna kawngah khualzin tam tak kan kal a. Kawng sira phûl leh thing hmunahte chuan thil eina kâwr leh tuiûm ruak emaw, sikret bung emaw pawh, bawlhhlawh pakhat mah a awm lo! Palawan Beach kan kal leh a, 'The Southernmost Point of Continental Asia' thlengin bawlhhlawh paih mai mai ka hmu lo rêng rêng!
Min vengtu leh han hlauh tur tumah kha kan hmu pawh a ni lo, a fai sa a, a zahawm a, kan paih lo ve mai. Mi ram mah kan zah theih chuan mahni ram hi han zahin han hmangaih ve hret hlawm ila, kan fai ve thei reng.
Hmânah ṭhalai rual pungkhawm zingah rilru hrisel chungchang ka sawi ve tawh a; "Kan ṭangkai thei lo a nih pawhin mi hnawksak lo nih ve mai hi mi rilru hrisel zia a ni," ka ti ve tawh. Ram leh khawtlang tana hnawksak loh dan awlsam deuh chu bawlhhlawh paih darh mai mai loh hi a ni.
Duh duh sawi theihna (social media) vela mi sawisel leh hnehsawh taka tute emaw dêusawh vel sim khawpa kan rilru a la hrisel lo a nih pawhin, kan khawlai vel tibawlhhlawh lo tur tal hian kan rilru hi hrisel ve se chu kan changkang ve deuh ni mai tur! Hnawksak loh hi a changkang tlat!
- Dr C Lalhrekima