Rik hut huta reh chi a ni lo

A kamkeuna

Mizote hian thil eng emaw hlek hmachhawnin tawng ila, a engamah hmaa rîk hluai leh rîk hut hut kan ching hle. Kan thil tawn leh hriatte chu eng vanga lo awm nge, eng nge a chhan, eng nge a dinhmun leh nihna tak, engtia tih tur nge, eng anga hmachhawn tur nge tih lam erawh kan ngaihtuah tehchiam lem lo. A phawvuakah kan phili chiam ṭhin ni berin a lang.

Ruihhlo hlauhawm chi hrang hrang hi kum 41 zet kan do ta. Ruihhlo, smuggling, ralthuam hlauhawm hlawm lian tham deuh man châng apiangin kan ri hut hut a, kan pâwr hluai a, a lêr lam aṭanga tihtawpa tihfel tumin mob rule-in kan che chiam ṭhin. A ṭhatna lai tam tak awm mah se, a rehna lam erawh a ni lem lo. Chuvangin, ruihhlo hlauhawm hi kan do rêm duh tak zet a nih chuan awmze nei taka do dan, tihrêm dan zawn chhuaha a taka bawhzui chi a ni.

Ramri-ah kan awm

Mizoram hian international border km. 722 a nei a; Myanmar khawchhak leh chhim lamah km. 404 leh chhim lam km. 318-ah Bangladesh a ni. State ramri Assam, Manipur leh Tripura a nei bawk. Hetianga international leh state ramri thui tak nei kan nih avang hian mihring khawsak phungah nawmna leh awlsamna tam tak awm mah se, dik lo taka sumdawnna kawng awlsam tak a nih avangin hmingchhiat kan tawh phah nasa hle. Chungte chu–drug smuggling, cigarette smuggling, gold smuggling, timber smuggling, wildlife smuggling, ralthuam tawlhrûk, lunghlu lak luh, pawisa lem, kuhva ro te a ni. Heng bak pawh hi sumdawnna ṭha lo, ram tana pawi thei thil chihrang hrang tam tak sawi tur a la awm thei a, sawi vek sen a ni lo.

A taka hmachhawn a hun

Ruihhlo leh ralthuam hlauhawm chi hrang hrang, smuggling donaa hmalakna a la nêp rih hle niin a hriat theih. Heng harsatna chi hrang hrangte hmachhawn tur hian thuneitute’n ramhnuai pilrila surveillance leh patrol tam zawk a dah a ngai ta. Smuggling dona tur special task force chak tak din a hun tak zet ta. Ramri control leh checks khauh zawk kalpui a ṭul ta hle. International agency-te nen thawhhona ṭha tak neiin smuggling network-te zawn chhuaha thunun a hun hle. Ramri kânna tuipui kam lamah harbor patrol tihpun a ngai ta. Ramri venhimna tihchak leh ralthuam phurh luh lohna tura patrol tihpun a hun. Central agency-te nen thawhhona ṭha tak neiin, Border Security Force (BSF) leh Customs te nen ruihhlo hlauhawm leh smuggling dona tur ruahmanna ṭha zawk siam kan mamawh.

Mizoram sawrkarin state pual special task force emaw, Mizo ṭhalai thluak ṭha leh thiam bik leh rinawm bik awm khawmna Mizoram Border Defence Force battalion khat tal dinin ruihhlo lo luh theihna kawng zawng zawng hneh taka dan chah a nih theih nana hmalak vat vat a ngai. State hian sum a nei lo a nih pawhin NGO leh social agency hrang hrang aṭangin ruihhlo dona tur thawhlawm khawn ni se, tuna sâwt vak lo chunga kan sen ṭeuh ṭeuh ṭhin hi awmze nei takin hman a ni thei ang a, a lêr lam aṭanga ruihhlo do reh kan tum mekna ai hian awmzia a nei thei ngei ang.

Mizoram hmun hrang hranga ruihhlo man leh do mek dan hi a sâwt lo tihna ni lovin, kan do mekna leh hmalak mekna hi bânsan chuang lovin, nasa lehzuala awmze neia ruihhlo kan do rêm theih nan duhthawh taka rawtna a ni e. Social media platform hrang hrang, kawngzawh, vantlang inkhawm, banner târ, pamphlet, booklet, awareness campaign chi hrang hrang, camping crusade, ruihhlo ngai enkawlna home-a indah luh leh poster tarte nen kum 41 zet kan do tawh; mahse, a nasa tual tual niin a lang.

Heng hmalakna tur pawimawh tak takte hi a ṭhen kalpui mek ni mah se, a la nêp hle. Chuvangin, ruihhlo hlauhawm hmanga sumdawnna leh smuggling activity chi hrang hrang titawp a, Mizoram venhimna tur hi bengsika ngaihtuah a hun tak zet. A bikin ni tin heroin no 4 leh damdawi ruihhlo hlauhawm man a tam tual tual a, Mizo ṭhalai nula tlangval zingah ruihhlo ngawl vei an tam tual tual bawk a nih hi! Khing zawng zawng khi Mizoram Kristian 87.16% awmna ram, biak in ṭha leh changkang tamna, zawlnei ngah, politician ṭawngkaa ram hmangaihtu tamna ram, eiruk leh sum thianghlim lo hmanga inchhekarbawm tamna, a ruka nawhchizuar tamna nia sawi, HIV vei tamna, cancer leh natna hlauhawm tihbaiawm pui pui tamna kan Zoram kaltlanga tawlhruk ṭhinte vek a ni a; kan zavaia ṭanruala do dan ngaihtuah a hun tak zet ta.

Assembly House-ah leh sakhaw puithiam rualte hian zu ringawt an buaipui luai luai reng ringawt a nih chuan Mizoram kaltlanga ruihhlo hlauhawm leh smuggling chi hrang hrang ni tin zan tina kal liam zut zut rengte hi kan do hneh tawp lo vang. Chuvangin, ruihhlo hlauhawm kan ram hmelma leh smuggling-te hi rîk hut huta do rêm chi a ni lo va, mob rule-a beih chi pawh a ni lo. Fing tak leh fimkhur tak, awmze neia beiha tih tak zeta do chi a ni.

Hetih rual hian, CYMA-in ruihhlo do a kalpui mekte hi chhunzawm zel bawk se, tuna kan dinhmun mek ai hi chuan awmzia a awmin nasa takin hma kan sawn zawk ngei ang. Kohhran pawh hian bengsikin ngaihtuah chiang se, zu ringawt hi âtchilhin haw hlur lo se. Zu aiin ruihhlo hlauhawm hian kum tin Mizo ṭhalaite nun a suat hnem fe zawk a ni tih END statistic report aṭangte hian khaikhin ngam ve se a ṭha ngawt ang. Kohhranin zu ringawt a huat hlur avang hian kan politician rual lah hian campaign nana hmanraw ṭha berah ngaiin a rûka zu ngaina ru ve hle chung siin inthlana tlin loh hlauvin , hmanraw ṭha berah ngaiin political platform hrang hrangah ‘Zu, zu, zu’ an ti sup sup mai a nih hi!

Chuvangin, sawrkar pawh hian bengsikin ngaihtuah se, ruihhlo do dan ṭha zawk leh awmze nei zawk dap chhuah dan ngaihtuahin chak zawkin hma la se a lawmawm ngawt ang.

-Dr. C. Lalrampana