Lal châka tuihâl bik an awm lo?

Congress Party President leh an hotu dangte hian tuna sawrkar mek ZPM Party hi lak châka tuihâl angin an sawi fo a, a dik mai thei. Mahse, ka rilrua awm fo chu, political party dangte pawh hi lal châka tuihâl ve tho an ni e, tih hi a ni.

Kan rama political party-te hi lal châka tuihâl deuh vekah kei chuan ka ngai a, an hruaitute pawh an chet duh dan leh ṭawng duh dan aṭangin ram leh hnam hmangaih vanga politics-a lut leh ram leh hnam siam ṭhat tum tak tak ka hmu meuh lo; sum leh pai ûm, lalna leh thuneihna duh deuh vek niin ka hmu.

Sawrkar lai thil tih dik loh (a awm a nih chuan) an sawiselte hi chu ka hrethiam em em a, sawisel awm pawh a ni reng a. Mahse, party dang mite lal châka tuihâl bik riaua party dangte va puh bik tur chu an awm bik lo.

Tun hnaiah Congress President leh an hotu dangte hian sawrkar lai ZPM chu lal châka tuihâl an nih thu an sawi ṭhin a. ZPM leh an hotute hi lal châka tuihâl an ni lo ve chu ka ti bik lo. Mahse, Congress pawh, MNF pawh, BJP pawh, lal châka tuihâl vek an ni a, an lal theihna turin theihtawpin an an bei a, thu dik tawk lo hmang pawhin an inbei fo reng a ni.

Congress President hian an party chu Pathian lamṭang an nih thu a sawi ṭhin a. Hei hi anmahni an inhmuh danah ngaih sak ta ila. Mahse, mipui hian Pathian lamṭangah an ngai ve em tih erawh ngaihtuah tham a ni. Mizorama lal tur leh ram kaihruai tur hian kan Pathian hi Congress lamah a ṭang rih lo a nih a rinawm zawk mah, a chhan chu MLA 34 nei aṭangin 5 chauh neiah a dah a, MLA 5 aṭangin 1 chauh neiah a dah mek chu a nih si hi!

Nikum lam aṭang tawh khan Congress President leh hruaitu lawk tak tak te, hruaitu lawk ni ve chiah lote pawhin an sawrkar chuan NLUP an sem leh dawn thu an sawi ṭhin a. Hei hi lal châka an tuihâl vang a ni maiah kei chuan ka ngai. A chhan chu NLUP hi an lal theih chhan bulpui ber a ni tih an hre chiang tlat.

Congress hi hmânah NLUP vangin an sawrkar tawh a, a hnuah MNF kum 10 chhung an sawrkar a. Kum 2008-ah chuan an hman thiam NLUP cheng nuai 1 an tawktarh a, hneh takin an sawrkar leh phah ta reng a. Kum 2018-ah an tla a, kum 2023 inthlanah chuan sum sem ṭha ti lo President Pu Lalsawta an nei a, MLA 1 chiah an nei zui.

NLUP hi an hman thiam, an sawrkar theihna tura kawng ṭha ber niin an hria a, mipui retheih dan leh sum an mamawhzia an hre chiang a, NLUP an zuar leh mek a ni. An kalsan tawh NLUP an zawrh leh chhan chu lal châka an tuihâl vang bak chhan dang puh tur kei chuan ka hre lo.

Kan rama party-te hi party dang lal châka tuihâla va puh tur bik an awm lo, tih hi he thu ka ziah chhan a ni e.

- Lalthansanga