Tunlai ration buhfai chhekkhawl hi
Mizoram Supply Kudam tam bera ration buhfai chhekkhawm mek hi chik taka thlir atan a ṭhat hmel hle mai! Hmun tam taka an buhfai chhek khawl hi chu a bag aṭanga han thlir reng reng hian rei han dah ṭhat chi a nih hmel mawlh lo. Mizo pa sawi dan takah satha bag sen deuh leh a var, awm nem tak a ni hlawm a, han piai deuha thler mai tur hmel a pu hlawm.
A buhfai han thlir lahin sen deuh ang chil chial, a vai leh a hum tam ang reng tak a ni hlawm. Sehrep lah chu a la tam viau lehnghal. Engti zai zia nge ni anga Food Security Act hman a nih hnuah hian kan supply ration dawn hi a chiang kuan loh tak fo mai le? A chang leh ration full lova semte kha a awm a, a chang leh buhfai chhe lutuk semte a awm bawk nen. Thil hi a chiang kuang thei vak lo chu a ni hi!
A phurtu driver-te sawi dan takah ‘Contractor-ten FCI Kudam aṭangin an la chhuak tawh lova, an duhna hmun hmuna mi buhfai hi an lei mai’ niin an sawi a. Hetih vang hian buhfai chhe tak takte pawh an lei niin sawi a awm.
Buhfai contractor-te tan chuan mipui rawngbawlna lam aiin an sumdawn hlawkna lam an ngaihtuah a ngai si. Chutia an kal fawr tur lo control-tu tur chu sorkar a ni. Sorkar chuan a mipuite chan
ṭhatna lam a ngaihtuah tur a ni a, ei leh bara hnianghnar tur leh ei chhe lutuka kan awm lohna tura hmalak hi sorkar tih tur a ni.
Tunah tak hi chuan supply Kudam ṭhen-khata buhfai an chhek khawm hi han bih chian chuan sumdawng
ṭhen-khatin vawk chaw atana an zawrh nen a lem chuang falua awm lo ve tih tur a ni. Tun hma khan FCI Kudam aṭangin sorkarin supply ration buhfai hi a lei khawl ṭhin a, engti zai zia nge ni a tunah FCI a mi ni lo, contractor-ten an duhna hmun hmuna mi buhfai lei kan sorkar hian a phal tak mai le? Supply phur
ṭhin driver-ten hetia an sawi hi a dik tak tak a nih ngat chuan sorkar hi a mipuite ngaihtuah lo leh chawm zo lo kan ti thei mai lo ang maw? Supply Kudam tam berah hian FCI Kudam bag chhuak ni lo sumdawng buhfai bag ang chi buhfai a tam a, hei hian ngaih a ti ṭha lo chu a ni e.
Kei ni thingtlang lam ngat phei hi chu a buhfai chhekkhawl a chhiat leh kan ei a chhia a ni mai. Kan sorkar hian hetiang lo deuha kal dan hi ngaihtuah se, thingtlang mite ei ṭhat ve deuhna tur zawngin kudam supply hi kalpui ni leh se kan va ti ve le.
Food Security Act min han hman sak a, a man tlawmin buhfai kan han lei ve ta cheng a, a buhfai lama a chhe deuh deuh mai dawn a nih chuan Food Security Act pawh hi a hnemhnan pui awm vak dawn pawhin a lang nem le! Sorkar hi han ṭang leh deuh teh se tih hi kan ṭawng-
ṭaina a ni e.
- Patrick Z, Chhingchhip