Black out a hlawhtling teuh
India leh Pakistan inkar boruak a ṭang chho mek zel a, indo mai thei an ni reng. Mahse, India hian Pakistan ram chhungah fing takin a che a, Pakistan sipai leh an hmun pawimawh a bei hauh lo a, firfiakte a bei ber a, Pakistan tan lah han chhan lêt vak theih a ni lo. Lehlamah chuan India a ngam lo deuh chu a ni ber.
Ram leh ram inkar boruak kal zelah April 7, 2025 khan state danga district thlan bik rualin Aizawlah pawh civil defence mock drill neih a ni a, a hlawhtling viau. Tlaiah minute 5 êng (power supply) tihthim a ni a, kha black out erawh kha chu a hlawhtling tluantling lo. A hlawhtling vek lohna chhan hrang hrang a awm.
A hmasa berah chuan mipuiah hriattir lâwkna a awm ṭha lo. Media-ah puanzar mumal loha neih deuh thut a ni. Mock drill leh blackout hi sorkar laipui Ministry of Home Affairs aṭanga thudawn tlai vang a ni pakhat ang.
Hun chêp tak karah mipui hriattirna a ṭhat tawk loh avangin inkhawm zan kher kherah hetiang hun hi siam a ni a, biak in han tih thim khup nachang kan hre mai lo kha a hlawhtlin lohna pakhat a ni. Chu bakah, kawtthlerah leh mimal inah (varandah leh step) solar light kan uar ve mek si a, han off mai a harsa tawh si a, kha khan êng a pek chhuah nual avangin a hlawhtlin lohna pakhat a ni bawk.
Sawi tawh angin, mipuiah hriattirna (information) a awm hman loh vangin kawngpuiah lirthei an tlan a, black out chhunga ding lo deuh vek an ni. Kha khan a tihlawhtling lo deuh. Kawtthler tinah traffic police emaw, police pangngai duty se, lo tidingin light off tir ta se chu a zia deuh mahna.
Black out chhunga light tihthim hun tur minute 5 kha a rei mah mah. Minute nga ni loin minute 10-15 lai a ni tlat khan ruahmanna a ṭhat lohna a lantir phah bawk. Chutihrualin, Aizawl khawpui pum pui a ruala power off hmuk a nih chuan power supply-ah fel lo a awm zui phah hlauhthawnna avangin a ruala off pawp loin, hun inang loah an off nia sawite pawh a awm.
Eng pawh chu ni se, khatianga chawp leh chilha sorkar hriattirna dawng chung pawha mock drill leh black out tluang taka hun hman a ni khan thawhhona a ṭhatzia a lantir chiang mai.
Aizawl SP Office room pakhatah Aizawl DC Pu Lalhriatpuia kaihhruaiin police leh a kaihnawih department hotute'n an vil a, MPRO lamin WT set eng emaw zat nen an duty bawk a. Tuikhuahtlang aṭanga thu an dawn veleh District Disaster Management Authority chairman Pu Hriatpuia chuan DC office-a duty hnenah siren tiri nghal turin thu a pe a. Ambulance chu Tuikhuahtlangah tir nghalin, duty-te'n hliam an buaipui mek chu Civil Hosptal an panpui a, doctor leh nurse-te inring renga lo awm chuan hliam an lo dawngsawng ta a ni.
Hmun hrang hranga duty leh thawktute ṭanrualna mit ngeiin ka hmu ve a, an fakawm ngawt mai. Hun teptêr tak ni lo se chu mock drill leh black out kha kha ai khan a hlawhtling lehzual ngei ang le.
- Lal Rinmawia