Dr title dah hi

Mizote hi hnam chapo ve tak, nihna duh leh nihna ngaisang tak hnam kan ni vein a lang. Engineer zingah Mizo tluka hming bula Er dah tam hi kan awm ang em aw ka ti; Vai zingah hian an dah uar vak lo nge ni, hmun khatah deuh chiah an dah ka la hmu. Architect zingah Ar an dah phei chu hmun dangah hian ka la hmu ngai lo va, advocate ho zinga Adv dah phei chu kan hre tam lo khawp mai. Mizo zingah chuan a rem leh rem lova title hrang hrang dah hi kan tam viau awm e. Pastor ho phei chuan Rev hi dam chhungin an dah a, khawvel thilah pawh kan ziak deuh ta zel mai. Hming tawpa ‘S’ dah pawh hi pension tawh (retired) ho zingah hian kan uar viau niin a lang. Hengte hian Mizote hi nihna duh, nihna lawm tak kan nihzia a tarlang chiang viau awm e.

Mizo zingah hian tun hnaiah hian hming bula Dr dah thei kan pung ta hle mai. PhD zo kan pung a, MBBS zir zo thar kan pung a, dental doctor lam kan pung a, vety lam aṭanga dah thei kan pung zel a, physiotherapy lam thlengte pawh hian Dr kan dah ve ta zel a. Pastor zingah leh pastor ni chiah loah pawh Pathian thu lama doctor title dah thei kan pung ta hle mai. A lehlamah chuan hmasawnna ken tel ti ila a sual lutuk awm lo ve. Chutihrualin, phû lêm lo leh ril lutuk lo thleng hian kan dah fir fer mai awm mang e tih theih a ni.

Tun hnaiah hian honorary doctorate degree nei ka pung ta deuh a ni awm a; kan phû vang ai mahin a ṭhente hi chuan he degree hi a leia lei theih deuh hian a lang deuh roh avanga nei kan ni mai ang em? Social media velah hian doctorate nomination tih theihte hmuh tur a tam hle mai a. A lei a lei anga lang chiah lo, mahse, thilpek anga kaltirin mi tam tak chuan heng aṭang hian honorary doctorate hi kan lei mek niin a lang. Heng degree pe theite hi university lem deuh deuh leh university pawh ni chiah lo, hming phuah chawp lutuk aṭanga degree dawng hi kan awm ve ta fo ang em? A dik tak chuan mi ṭhenkhat hi chu mahni hnathawh ṭhat leh thiamna lamah chuan mi chhuanawm tak zawng an ni ngei ang. Mahse, Mizo zingah pawh mi hmingṭha leh officer lal deuh deuh heng degree hûm hnawk tum lo hi kan tam a; chutih laiin, rem leh rem lova Dr dah ṭâlh tum erawh kan pung zel ni hian a lang.

Honorary doctorate neih a, hming bula Dr dah chungchangah hian mi tam tak ngaihdan a inang viau lo. University ṭhenkhat hi chuan honorary doctorate degree an pek hian a kaihhruainaah a theih hram chuan hming bulah Dr tih hi dah kher loh ni se tih an tarlang tel ve ṭhin. Mi chungchuangte tana pek, mi hmingṭha leh a phu ngawi ngawihte hnena pek ṭhin a ni. Mahse, Dr tih hi dah kher lo turin an chah ṭhin a, mi tam tak hi chuan an dah zui lo ni pawhin a lang.

India President lar tak APJ Abdul Kalam kha bachelor degree thleng chauh zir a ni a, ani tluka honorary doctorate dawn phu leh dawng nasa kha an awm kher awm lo ve; a dawnna lah kha university tha leh lar deuh hlir a ni. Ani kha Dr APJ Abdul Kalam tih a koh a ni a, ama indah aiin an dahsak a nih a rinawm. Tin, Dr Manmohan Singh kha PhD ngat a ni a, ani kha chu tun hma aṭanga a lo put tawh a nih avangin Dr a dah tlang a ni ngei ang.

Mi ṭhenkhat chuan doctor tih vel dah hi an buaipui viau lo khawp mai. Kan Prime Minister ni mek Narendra Modi hian kum 2016 khan Banaras Hindu University aṭanga Doctor of Law degree an pek tum chu a lo hnâwl tawh a ni. Rem leh rem lova, a phû vak lote’n Dr tih man chawia an lei, lem deuh deuh kan dah hram nen chuan inang lo tak chu a ni.

Mizo zingah hian Pathian thu lamah D.Th. (university ṭhenkhatah PhD-in a kal a) hi zir dan phung leh kalphung pangngai deuha zir a ni a, zir chhunga pawh a rei deuh. Hei zet hi chu doctorate puitling kan tih ang kha a ni awm e. Tun hnaiah hian doctor of ministry kan tih hi a awm leh a, hei hi chu full time-a zir a ni ve lo va, rawngbawl paha an zir a ni a, beih ve fe chu a ngai awm e. Heng bakah hian theological college pangngai tak, Senate of Serampore tih angte’n an pek doctor of divinity a awm leh a; kan Mizo Pathian thu thiam zingah pawh dawng an tam ve ta viau mai a, a lawmawm hle. Hetih lai hian university pawh ni lo, college ṭhenkhat hian PhD course leh honorary degree an pe ve nual a; a ṭhente chu sumdawnna atan hmangte pawh an tam viau awm e. Kan doctorate degree lakna tam tak hi college zawm mumal nei lo, pawmtu nei vak lote pek hi a ni nual ang em aw ka ti ṭhin.

A thiam leh theite chawimawi hi Bible pawh hian thu min pek a ni a, mahse, mi tam tak chuan mahni inchawimawi nan, hmingṭhatna atan khawi lai vel aṭang hian emaw doctorate hi kan leiin kan dah vel niin a lang. Rem leh rem lova dah tlar tuar hi kan la lawm hle. Rev karah Dr dah tel hram te, upa kara Dr dah tel hram te, ka hming tawp lamah ‘S’ dah duh bawk, hming hma lam Dr dah duh bawkte hi kan kat nuk ni hian a lang. Kan hnain a ken tel ni miah lo, kan lalna leh hmingṭhatna chhuanlam deuh Dr dah tum pawh kan pung zelin a rinawm.

Kan phu tak zet a, university pangngai takin honorary doctorate degree min pe a nih chuan a lawmawm. Chutiang pawh ni lo, khawi lai university nge tih pawh hriat loh, mi zinga pawh kan sawi zah deuh roh tur aṭanga degree neih hi a hlu miah lo. Tin, certificate pawh kan tar ngam lohna tur vela doctorate degree neih hi chu i ngaihluin i thlahlel lo vang u.

Mi tam tak chuan PhD tiin rim tak leh hrehawm takin an zir chhuak a, MBBS zirlaiin rilru hah reng rengin rim taka an rawn zir chhuah ang hi pension tawh hnu, kan hnathawh man zawng zawng kan dawn tawh hnu vela rem leh rem lova neih ve ngawt hi i tum ṭâlh lo teh ang u. Mi hian min ngaisang tak tak chuang lo. Pathian thu lamah phei chuan zirna lama kan dawng a nih loh phei chuan i thlahlel vak lo vang u. Vanah heng degree aia hlu hi kan nei tih hriain, van lawmman min pek tur hi i ngaihlu zawk teh ang u.

- Lalrintluanga