Zirtirtute hi phurrit ni lovin hun lo la awm tura kan din khawchhuahna tur an ni (Teachers are not liabilities, they are investments in the future)

Zirtirtute hi a ram leh hnam anga kan changkan nana fawng pawimawh ber vuantute an ni a, ram leh hnam dintu ‘Nation builders’ ti tein an sawi ṭhin. Chutih laiin kan ram hruaitute zinga pakhat chuan high school leh higher secondary school teacher-te chu clerk entry level salary pawh phak lo Rs 20,000 vel lek pe ila a tawk tiin kan Assembly-ah a sermon nasa mai a; zirtirtu role a hre lo vai vai hle mai. A rilru tak tak a sawi a nih ngat chuan a seilenna a hmusit hle tihna a ni ang. Zirtirtute dinhmun, qualification te, an inpekna leh khawtlanga an mawhphurhnate kan hmuh hniamsak a nih chuan kawng kan bo nasa hle ti ila kan sawi sual lo vang.

Career progression awm lo, hamṭhatna leh pension pawh awm chuang lo leh ngheh beisei miah lo tura intiamkamtirin post graduate, B.Ed., M.Ed. chhuak tawhte chu sorkarin temporary-in IV grade hlawh pawh phak lovin a chhawr ṭan a. Kan ṭhianpa chuan hetianga sorkarin casual-a hna lak hi hmân hmânah lo kalpui daih tawh tur a ni a ti a; ṭha a tih hmel viau mai. Zirtirtu indaih lohna nasa tak phuhrûk nana hmalakna a nihna te, sorkar sum dinhmun ṭhat lohziate en chuan kan ṭhianpa ngaihdan hi kan ṭâwmpui viau awm e. Mahse, sorkarin an hlawh a pek tur zat en hian a lungawithlak loh hle a, a nghette nen hahdan inang rengin an thawk ve dawn tho si a, zirtirtute dinhmun a hmuhhniamthlak viauin ka hria. Ṭhenkhat ngaihah chuan sorkar hi hna siamtu leh thawk ṭha deuh (model employer) angin an lang mai thei a, mahse, an hmalakna hi hmasial taka lehkhathiam/mithiamte chhawrsualna (exploitation) angin a ngaih ve theih tho mai.

Zirtirtu hnaah hian a nghet leh nghet lo dinhmun leh hlawh inthlau lutuk hi ngaimawhawm tak a ni bawkin ka hria. Kan inthawhpawlh ṭeuh bawk si a. Hna inang rengah hlawh inang lo hian inthliarna a piantir ve thei bawk. US ang khuan tawnhriat leh seniority ang hian hlawh hi kal se a ṭha hle ang. Ngheh beisei lo tura intiam luihtir angte hi fair labour practice bawhchhiatna a ni a, Indian Constitution Article 14 leh 16 hmanga khin theih hial a lo ni khiah lo maw?

Hna zawngtu tam zawkte hian job security hi kan ngaihtuah hmasak ber a ni fo va, sorkar hna kan ûm nasat chhan pawh a ni. Kan ram politics ṭhat loh vangin private sector-ah job security kan hmu thei lo va, public sector-ah kan inhâwr khawm a. Hna pahnih khat lek pawh sorkar a nih tawh chuan a sang a sangin kan inchuh tawh. Job security chhe viau mah se, a hminga sorkar thil a nih tawh chuan kan bawh huam huam zel a ni. Hetiang hi kan politician-te chuan remchangah hmangin hna contract leh temprorary-a lak nan an lo hmang ta a. Department ṭhenkhatah chuan thil tih chi tak pawh a ni mai thei a, mahse, zirtirtu hnaah kher hi chuan temporary lutuka hna lak hi rawtna ṭha lo, ngaihtuahna sêng tam vak lote ngaihtuah chhuah ni awm tak a ni.

Zirna chuan thawktu nghet (stable workforce) englai pawhin a mamawh reng a. Zirtirtute hi NEP tarlan dan chuan training pek ngai reng, inzir reng tur, job security ṭha tak nei tur an ni. Temporary zirtirtu tan training lak vak ngaihna leh ṭulna a awm lo thei a, ngaihtuahna pawh temporary tak a neih loh theih loh va, zirtirnaah rilru zawng zawng pek a har dawn bakah, hlawh a tlem dawn miau avangin hna dang han thawhsan lâwp lâwp châng a awm lo thei dawn lo va; rilru hrisel tak leh inpumpek taka zirtirna kalpui pawh thil har tak a ni ang. Hna nghet lo na nâ nâ chuan zirtirtu ni tura mithiam tak takte (best talent) hîp pawh a har viau bawk ang.

Zirtirtu hna hi a rem rem thawhtir a, inbel mai maina tur ang deuha kan ngai a nih chuan quality education kan hlat viau ang le. Kan sorkar sum dinhmun chhiat vanga zirtirtu dinhmun hnuh hniam (sacrifice) leh ngawt zel hi inrelbawlna dik lo (false economy) a ni. Kum 4/5 lek daih turah ngaihtuahna sêng lo va, nakin hnu (long term) tana thil kan thlir thiam a ṭul hle. Kum rei lo tê pawh zirna kan thlir dan a dik loh chuan a ram pumin kum tam tak kan tawrh phah thei tlat a ni.

Zirna hi mihring hman tlaka inchherna (human capital siamna) awm chhun leh ṭha ber a ni a, chuvang chuan National Education Policy (NEP) pawhin zirtirtute hi chawh phûr te, thuam chak te, zah phu taka siam te, an career kawng hawnsak te, hmasawn tura training pek te, office lama an work load tih tlemte hi a thiltum lian tak a ni nghe nghe a. Tuna Mizoram education kalphung hi chuan a kalh char char a ni ber. Sorkarin zirlai detail leh ni tin data lak khawm UDISE+ leh VSK aṭangin a kalpui a, zirtirtu indaih tawh loh sa nâk alaiin hengte hi zirtirtute’n an thawh te a la ngai deuh deuh a. Hei pawh hi Right to Education Act (RTE) Section 27 (No teacher shall be deployed for any non-educational purposes other than the decennial population census, disaster relief duties or duties relating to elections to the local authority or the State Legislatures or Parliament, as the case may be) kalh tlat a ni. Education Dept. hi politician-te hian an inkhelhna ball ang leka ngaiin an chhuih lîr sek a nih tâk ber hi.

A tawp berah chuan, zirtirtute hi sorkar sum leh pai khawh raltu satliah leh sorkar tana phurrit ang maia kan chhuah ta hi a pawi tak zet a. Hun lo la awm tura he ram tichangkangtu tur, kan tu leh fate siam puitlingtu tur, kan investment pawimawh lutuk an ni tih hi i hre thar leh ang u. Zirtirtu pakhat vangin khawvel hi a buai thei a, misual an pung vak thei bawk. Zirtirtu pakhat vangin doctor leh engineer ṭha tak tak an piang thei a, zirtirtu pakhat vangin misual an tlem phah thei a, zirtirtu pakhat lungawi loh vangin mi tam tak future a buai thei a ni.

- Mawia HL