State govt enkawl rehabilitation center mumal tak neih a ṭul tak zet
A bik takin democracy hnuaiah politics dik takin kalpui a tum angin ram rorelna dik ziktluak hi nei thei ṭhin ila chuan hmasawnna dik leh tlo kan nei ang a, chu chuan material development mai ni lovin, ram mipui rilru sûkthlêk dik ( moral development) a thlen dawn a ni.
Politics kalpui dan dik lo hi a pawi hle a. Sualna a lo punlun te, social evil lo pung te, misual leh kawhmawh bâwl lo pungte hian state sorkar chak lohna a entir a ni.
Heng sualna hrang hrang leh misual leh thil chin ṭha lo chingte an punlun hian ram roreltute hian moral obligation neiin, zah nachang an hre tur ni âwm tak a nih lain, zah nachang pawh hre lovin thil thleng ve pakhatah an ngai mai niin a lang; hei hi a pawi hle a ni. Helam ngaih pawimawhna lamah hian ram hruaitute an harh chhuah a ṭul ta hle.
Ram rorelna dik hnuaiah chuan khua leh tuite hriselna ṭha leh hamṭhatna leh himna ngaih pawimawh a ni ṭhin tur a ni a, chhungkua leh khawtlangnun tibuaitu ruihhlo ngai te, zu ngawl vei te, nu leh pa leh chhungte’n enkawl ngaihna an hriat tawh loh an manganpuite enkawl leh siamṭhat hna hi state sorkar mawhphurhna a ni ngei tur a ni.
Sorkar awm chhan hi Pathian aiawha ṭha taka ram rorelna enkawl te, ram mipuite enkawl leh venhimte a nihzia hi kan thlan lal ram hruaitute hian an hriat chian a ṭul tak zet. Sualna chi hrang hrang lo punlun te, chhungkua, khawtlang tibuaitu te, ruihlo ngai te, zu ngawl vei te, chhungkaw phurit ni ringawt te, an nu leh pa leh chhungte’n tihngaihna an hriat tawh lohte enkawl leh siamṭhat hnate hi state sorkar mawhphurhna a ni.
Chuvangin, ram roreltute hian Pathian aiawha ram rorelna dik leh ṭha kalpui te, ram leh mipuite ṭhatna leh himna tura hmalak te, misual siamṭhat hnate hi an mawhphurhna a ni tih hriatna lamah harh chhuak se la. Material development lam ai mahin mihring siamṭhat hna–moral development lam ngaih pawimawh nachang hriain, chhungkua, khawtlang leh ramin kan buaipui mek ruihhlo ngai te, zu ngawl veite mumal taka enkawlna bik tur rehabilitation center state sorkarin a din vat a ṭul tak zet ta. Hemi atan hian sorkarin budget hranpa a siam a ṭul bawk.
Material aiin mihring siamṭhat hi dah pawimawh nachang sorkarin a hriat a ṭul khawp mai.
- C. Lalthanmawia, IPS (Rtd)