Engtin nge sawrkarin hmasawnna hna chak leh ṭha zawka a kalpui ang? (Use of Competency Framework in Public Administration)

Ram Danpui thu awihin political party, inthlana chak chuan hmasawn nana an tih tum leh ruahman (policy) chu an sawrkar khâwlpui hmangin mipui hnen thleng ngei turin an thawk ṭhin tih kan hria; mahse, sawrkar programme chu 100% hlen chhuah a ni phak ngai lo ṭhin tih pawh kan hre tlang âwm e. A nih 'sawrkar' chu eng nge ni ta?

Sawrkar laipui, state leh tualchhung rorelna zawng zawnga hma sawnna hna buaipuia enkawltu hi 'sawrkar' (public administration) kan tih bera chu a ni a. Sawrkar rorelna hmun, zau leh hrawl pui mai, a Sâp ṭawnga 'public administration' hi sawrkar tih hming kan hriat lar tâk nena inkaihhnawihna nei, science a ni a. Dan siam pawl (legislature) leh dan hmanga rorelna hmun judiciary-a roreltute hian an inrelbâwlnaah harsatna nei ve ṭhin mah se, sawrkar (public administration) kan tih taka hi chu hna thawhna hmunpui executive branch huam chin chauh hi a ni, tih hi Luther Gullick-a thlîr dan a ni.

Chutih laiin Pfiffner leh Presthus-te chuan, "Kan duh ang hlen chhuah nana pawl/organisation leh a mihring enkawl hi a ni," tiin an sawi ve thung (organisation leh sawrkar tih hi PA-ah chuan a thu azirin awm ze inang renga hman ṭhin a ni). Tin, sawrkar (public administration) chu public policy hrin chhuah nan leh thawh chhuahpuina hmanraw neitu, eng hna pawh huam vek hi a ni (LD White). "Sawrkar chu a tahtawl leh chipchiar taka dan hman hi a ni," tiin Woodrow Wilson chuan a sawi a. Sawrkar hi chi hrang hranga sawifiah theih a ni a, mi thiam tam takin an sawifiah bawk tawh bawk.

Tun hma, a bikin Mizoramin lei rem a rah (state nih 20.2.1987) aṭanga sawrkar hmanga rorel a nih hnu hian ‘Keini mipuite hian’ (‘We the people of India’ iangin) titute hian state budget leh centre aṭanga ṭanpuina leh sum pûkte hmanga mipui hmasawnna hna kan thawh hian a tak takin eng zat chiah nge kan hlen chhuah a, 100% chu mipui hnen a thleng tak zet em tih chu research neih loh chuan hriat chian tak tak a harsa hle a. Heti chung hian a hlen chhuah lam hi chu a ṭha tawk lo ṭhin hle tih chu tuna kan ram dinhmun aṭang hian a fiah thawkhat hle thung si. India ram pumah chuan Five Year Plan aṭangin hmasawnna hna ruahman chu a ṭha; mahse, politician-ten an din chhan ber hna thawh tur ruahman chu ṭha viau ṭhin mah se, a nihna tur dik taka hlen chhuah a ni lo ṭhin tih hi seminar leh journal hrang hrangahte ziah leh sawi chhuah a ni ṭhin ang hi keini state-ah pawh thui tak chu a dik ngei tih a rin theih. A chhan ni thei ṭhenkhatte:

1. Department/organisation changtu minister/chairman ṭheuhte’n tih tak zetna nen an department/board/commission luah, an enkawl ṭhin loh vang, an hna an hriat hneh tawk loh vang.

2. Policy, programme leh project hlen /thawh chhuah dan an hriat tawk loh vang, chutiang hlen chhuak tura an hnuaia hna thawktute kaihhruai dan (direction pek) an thiam tawk loh vang.

3. An hnuaia sawrkar hna thawk nghet (permanent bureaucracy)-te enkawl leh thawhpui dan phung an hriat tawk loh vang.

4. A changtu minister berin eng vanga kha organization kha chang nge a nih, kha mi hmang khan eng tin nge an rawngbawlsak mipuite chu dikna chanvo an pek dawn tih ngaihtuah lova thil dang, e.g. contract, etc buaipui emaw, inthlan leha tlin ngei ngei tumna rilru emawin an ngaihtuahna a luah zawk vanga an department/organisation chanah an serious tawk loh vang.

5. An hnuaia thawk (civil service & bureaucracy)-te’n thiamna leh hna hnehna lam skill & efficiency an neih tawk loh vang.

6. Higher civil service e.g. under secretary/deputy director/EE/DFO, etc aṭanga secretary/commissioner inkarte’n an hna an hneh tawk loh vang; Zoram pawna meeting tura secretary chin kal ngei a ngaihna nia lang, mahse, an hnuaia mi executive department/organisation thlenga officer-te tirh an ching nia a lan vang.

7. Hna thawktu zelthel, inthlahdah leh hlemhlête laka a changtu minister leh higher civil service lam an nêm lutuk vangtein sawrkarin mipuite tana hmasawn ngei ngeina tura a ruahmante a nih dan tur ang takin hlen chhuah a ni ta lo ṭhin niin a lang.

8. Administrative department leh executive department-a officer-te hian lehkha an chhiar tam tawk lo niin a lang; a bik takin, executive department lam hi chu hna thawhna hmanraw nghawngkawl (dan bu hrang hrang, working manual, etc) nei sa an nih avangin, tun aia hmasawn tur pawhin an chung aṭanga direction & leaderdhip azirin hmasawnna tur an ngah viau lem lo mai thei. Programme hlen chhuah nana training chi hrang hrang–in-service, budgetting, etc leh chung lam aṭanga kaihhruai ṭhat a ni deuh mai awm e.

Administrative deptt lam thung erawh hi chuan an deptt chan hna thawhna dan bu, etc hneh kawngah hmasawn an mamawh hle; (ṭawng thu chhe lovah) UPSC leh SCC direct recruitee ni lo chu thu dang ni se (fit tak ṭhenkhat erawh chu an awm), MPSC direct recruitee takngial pawh ni lovin, top level management (secretary) ṭhuthmun an thleng thei si. "India ram state 28 leh UT 8 awmnaah hian Tamil Nadu state-in finance secretary thleng thei tura Finance deptt atan liau liauva a recruit tih loh chu, Mizoram state bureaucratic structure & promotion kalphung anga mak hi a awm lo a ni," tiin IAS pakhat chuan a sawi. Heta ṭang ringawt pawh hian hmasawn chu kan ngai nasa tih a chiang hle. Mahni hna hneh taka thawhtir theitu–recruitment leh training aṭanga thiamna (skill & competency) pawhin a phak tawh loh hialna hmun thlenga hna thawktu kai santirna hmun nia lang hi Mizoram state chauh a niin a lang. Chutiang chu kan bureacracy nihphung a nih chhung chuan policy ṭha mah se, chak taka hma sawn kan inring em?

Engtia siam ṭhat tur nge?

Indian Journal of Public Administration kan tihchhuah hrang hranga thupui hlapuia kan neih ang hian, ṭangkai tak leh chak zawka mipui rawngbawl dan chipchiar 'Competency Framework in Public Admimistration' hi siam a, chu chu hlen chhuah ngei a ngai tawh niin a lang; Mizoramin hmasawn tak tak kan duh chuan. Hemi chungchang ringawt pawh hi chipchiarin ziak dawn ila, lehkhabu pakhat tihchhuah a ngaih phah ang! Chuvangin, tun ṭumah kan sawi zui viau hman rih lo ang.

Singapore-ah hian sawrkar hnathawkte’n ṭha, chak leh hneh taka hna an thawh avangin khawvel sawrkar dangte entawn tlak inrelbawlna ṭha chungchuang (model for public service) an siam a. Sawrkar hnathawkte chu kum khatah darkar 100 tal training nei tura tih an ni. Hna thawktute’n an hna thawh nana pawimawhte chu department-te’n an hriat zawk avangin budget pawh training institution-ah dah lovin deptt-ah dah zawk a ni bawk.

He thu ziahah hian zirna ina thawkte chungchang kan sawi lo va, deptt-a thawkte, a bikin Gullick-a sawi executive branch chungchang kan sawi a ni. Chutah pawh, eng service ber emaw chungchang kan sawi hran lo. Amaherawhchu, sawrkar hnathawkte kai san theih tawk hi chu an luh dan (competitiveness) te, an thiamna (education, training), theihna (competency), degree, training rei lam, etc behchhana a thar siam chhuah vek hi chu a ṭuah hle tawh. CM kal ta pakhatin IGP thlenga constable kai santir chungchang a sawi nia lang phei hi chu sawi chhâwn ringawt pawhin kan ṭim uai uai thei a ni. Kawng hrang hranga hmasawn kan duh a, mi retheite kan hmangaih tak zet chuan development administration leh administrative development inlâwm tuak dante hi hriat bel hle a ngai tawh.

A thu hrimin recruitment hniam zawka lûtte'na recruitment sang zawka lûtte ûm phâk emaw, lehpelh emaw theihna dan/system emaw awm hi Right (Article 14-na) kalh a ni. Ram Danpui Article 309-in state dan siam pawlte thuneihna a pek hmang ṭangkaiin tun mai ni lo, eng tik aṭang emawa hman tur recruitment, service conditions, promotion leh training dan thar siam ni se, chu chuan kan ṭhalai, India ram pum inelna rilru pu phâkte a tiphûr leh ang. Tun hmain Mizoram chu IAS leh AIS dang bakah central services chher chhuahna pûm tia sawi a ni ṭhin dinhmun kan hloh tawh chu tun aṭanga kum 30-50 velah chuan kan hmu let leh dawn a ni. Tichuan, UPSC Civil Services exam & interview aṭanga zi chhuak All India Services (IAS, IPS) leh Central Services group A (Indian Foreign Service, IRS, ICAS/IDAS, IAAS, etc) leh group B te an rawn chhuak leh nual thei tawh ang.

A tawp nan, hetiang hian kan thu ziah han tlip ila: American political scientist Gullick-a, sawrkar inrelbawlna chu 'POSDCORB (planning, organising, staffing, directing, coordination, reporting and budgeting)-in a khai khawm theih titu theory-ah hian tlakchham kan nei em tihte inenfiah ila. Sawrkar a sawifiah dan hi tlemin a zîm deuh tia sawisel tawk awm mah se, India ram angah hi chuan executive branch a tih hian heng pisa–secretariat leh executive organisation, e.g. directorate hrang hrang, E-in-C, registrar, PCCF, commissionerate, etc hi a huam vek avangin, hmasawnna hna thawh a ṭhat leh ṭhat loh pawh heng organisation-te hian welfare state nih dan tur tak hlen chhuah nan hian mawh an phur tlat a ni. Dan siam pawl leh thubuai hlabuai rem pawlte hi chuan development work-ah an inrawlh lem lo.

Chuvangin, kan hmangaih em em, kan ram riang tê, pachhe rih angreng tak, mi thiam leh hnam hmangaihtu ngah em em si hian râltiang a kai theihna turin ṭang rualin ke i pên saih sauh ang u.

Râwn ṭhenkhatte:

1. Unique Quintessence of Public Administration published by Unique Publishers (Incorporating Kay's IAS Study Circle), New Delhi-1992.

2. Indian Journal of Public Administration (Quarterly Journal of the Indian Institute of Public Administration): Spl Issue, July-Sept, 2012.

3. Durga Das Basu, Shorter Constitution of India, 2001

-Dr J.T. Vanlalngheta