Kawng pawimawh si ngaihsak loh

Kum 2017 vel aṭang khan Greater Aizawl Water Supply Scheme Phase 3, thlang Setlak lui mawng aṭanga lakna tur chu SIPMIU-in thawkin, Tlawng kam Setlak lui chhuah aṭangin pipe lian ft. 3 diameter an phûm chho a. Sakawrtuichhun kawng Industry pêngah chhuak chhoin, Ramrikawn, Chawlhhmun (Ropaiabawk), Vaivakawnah kal zelin Laipuitlang tuikhuahah a lut a ni.

Pipe lian phûmnaah hian hmun dang zawng zawnga kawngpui chu siamṭhain an metal leh vek tawh a. Luangmual Industry pêng aṭanga Ramrikawn, km. 1 emaw vel lek hi pipe phûm aṭang khan siam ṭhat ve a la ni ta lo reng reng a, ruah a sûrin a diak em em a, khua a ṭhat leh a khu luih luih mai. Highway tur a ni a, tiin, compensation la turte nen tihfel loh niin an sawi.

He kawng hi a lûn em em a, Aizawl leh Industry hmunpui inpawhna kawng a ni. Industry châwm turin raw material phur motor lian pui pui ke 12 nei thlengin an tlan reng a, industry aṭangin oxygen supply, in sakna hmanrua chi hrang hrang phur motor an tlan reng a; leivung paih leh quarry lung leh rawra phur an tlan reng bawk. Picnic spot leh resort/recreation hmun a tam avangin picnic tura kal an tam a, fûrpuiah Vaivakawn/Company peng lei a cheta Airport panna (alternative route) pawimawh a ni bawk.

MLA-in a siam: He kawng hmangtu Industry rama cheng mipui te, Sakawrtuichhun, Lungverh, Sahuan, Central Jail Veng ten an tuar rei tawh avangin MLA TBC Lalvenchhunga (Adviser to CM) hmalaknain Luangmual Industry peng leh Ramrikawn inkar km. 2 vel chu kum 2024 December khan resurfacing tih a ni a, alkatra-in an metal ta a. A lawmawm a, mipui pawh an lawm hle.

Mahse, vanduaithlak takin kawng hi highway tur a ni a, laih chhiat leh tho tur a nia, tih a ri a. Chuvang chu a ni mahna, kawng siam hi a hming maiin an ti ta vel mai mai ni awm tak a ni. Kawng siam hi bitumen-in a hneh lo em em a, a pan em em bawk a. Kawng chhak lamah hman deuha side drain concrete zût sate chu leiin a hnawh vek a, tihfai a ni lo. Kawng chhak aṭanga tuihâwk luang chu kawng a bo va, kawngah a dil pung mai a, motor lianin an rawn dai zît ziai ziai mai. Side drain siam miah lova kawng chhak ruam zawk sia tui tling thei tura an kalsan thei hi thil mak tak a tling.

Highway chu lai dawn pawh ni se, a ram mipui tam takin ni tinin eizawn nana an hman a ni a, mipui hmakhua ngaih pawimawh ber tur a ni dawn lawm ni.

Kan sawrkar thar hi kawng siamah an ṭang a, kawng pawh an siam ṭha a, a hnûm zuih mai a, a ṭhîl ve pheng phung lo. Chutih laiin, Ramrikawn–Luangmual Industry peng hi chu an metal hman tawh lo vang. Sawrkar hian side drain tal siam se, mipui phunselna a bo deuh mahna. Kawng dunga tuihawk dil pung hi a luan bo chuan metal road ṭha lai hi tuiin a chiah lo vang a, a chhe zel tur a veng dawn a ni. Fûrpui hma ngeia siam a nih loh chuan a hma ang tho kawng chhia a ni leh dawn e.

- C Vanlal Ruaia, 9862569310