Sual riau–fel riau

Khawvel awm ṭan tirh aṭang hian mihringte hi eng zat nge lo pianga thi leh tawh ang aw; a zirmite chuan ngaihruatna talin an hriat theih ka ring. Misual leh mi ṭhate pawh hi eng zat nge kan awm ang aw. Mi ṭha tam tak karah misual hi chu an awm ve zauh zauh ṭhin han ti ila a dik khat ve thei viauin ka ring. Kan zavaia min siamtu chu Pathian a ni, mahse, misual kan tihte hi chuan an duhthlanna an hmang dik lo, sual lam kawng an zawh lui tlat a ni ber mai e.

Kan hriat ṭheuh angin sualna hian pawi a khawih theih nasatzia chu, chanchinbu, TV, radio, etc., aṭangte kan hmu ṭhin ang. Pawi sawi lo nunna tam takin a tuar ṭhin a, eirukna, thamna kan tih ang chite pawh hian pawi a va khawih nasa thei tak em. Pathian pawh hian a duh lo hle a, sual a tih ve zeuh avang khan Mosia, zawlnei ropui pawh khan Kanan ram a luh loh phah dêr a nih kha. Chuvang chuan, sual hi kan do, kan do chung zel hian kan ti reng tho bawk a; mi tihsual kan hmu a, kan tihsual erawh kan hmu hlei thei si lo a ni.

Sual riau

Ṭum khat chu kein thui ang reng tak ka vâk chhuak e ka tia, nipui lai a ni bawk a, a lum duh khawp mai. Kan hnathawhna hmuna lo lengte ṭhutna tura an dahah chuan ka ṭhu hahchawl vang vang a, a nuam khawp mai. Mahse, hman ni deuha a lung ka tihâwi vak loh pa kha a lo kal a, ka ṭhut chawlhna bul sêtah chuan a phone chu a be ta mawlh mawlh mai a, hmun dang pawh a awm nual tho si a, ka ti deuh. A tuk leh lamah chuan chutiang bawk chuan thil a thleng leh a, mahse, hmeichhe pakhat, hmelṭha ang reng tak hi a lo kal phei ta hlauh mai a; chu pa chu a tlanchhia/inthiarfihlim ta vat a, chu nula chuan a thlir zui hê hâw a, thil awmzia hre thiam lo tak hian.

Thawhpui pakhat pawh a nau pai a fuh vak lo a, office chhhuahsan leh mai chu a tum a; inthlahrung tak chuan ka kal mai dawn a ti a. Mahse, a bula ṭhu nu chuan hre lo der tlat, a chhang duh miah lo. Aw, kal rawh, kal rawh te han tih ve mai mai awm, a harsat loh tehreng nen. Tichuan, rilru hrehawm tak chuan a kal ta a. Mi inrin loh lai taka hetianga ti duh tlat chi hi an awm ve reng mai; ṭhenkhat chu tlema rilru lam harsatna nei an ni a, ṭhenkhat erawh harh fim pangngai tak te an ni.

Fel riau

A hmeichhiatpui 4/5 laite chuan an han chhawnchhaih, bâwl,nuih, fak el vel lai chu ka lo thlir reng a. A buai chuang vak lo a, a thinur chuang lo a, a zo viau tho mai, a nui thei tho mai. Kei chu ni ta ila ka puak keh ngei ang, aw râwl a ring riau ngei ang. Nia, a nunah khan tlâwmna nun ka hmu tel deuh tlat mai. A hnu deuhah chuan ni khata chhung inkhawm an neih zat, vawi eng zat nge a ṭawngtai ṭhin tihte chu kan zawt ru a. Nau pawm a ni a, hma takah office a thleng a, bân hunah a haw leh ṭhin. Chawlh pawh a la ngai lem lo a ni tihte ka ngaihtuah chhuak a. Ka rilruah chuan, hei hi Pathian thu awih dik tak chu a lo nih hi a, ka ti a. An vengah chuan kohhran hruaitu (upa)-te pawh a ni awm e, mahse, ka hriat ve theih chinah hna tibahlah zawngin a rawngbawlna lam thil chhuanlamah a hman awm ka la hre lo; lo hmang ve zauh pawh ni se mak lem lo tur hi a ni. An veng a hla a, mahse, a hun takah a thleng a, tlai bân thleng rak a ṭhu ṭhin bawk. Hotute’n hna 2/3 an kawptir pawn a phun lem lo a, phûr takin a ti thei zel mai. Kei chu ni ila ni khat chhung lek hna kawp pawh ka peih meuh lo ṭhin. Ka thusawi, ka sermon, a ti dum dum lo nâ a, thil awm dan kan thlir let vang vang hian mi zahawm tak chu a ni phawt mai. Eng emaw chang phei hi chuan a nunah khan Isua hmel hmu deuh tlat hian ka inhre ṭhin.

Tute nge kan nih

Darthlalang lian fiah ṭha taka kan inen chuan kan inhmu chiang viau ṭhin, kan lang deuh kulh mai ṭhin a ni. Kan hmel ṭhat leh ṭhat loh, nalh leh nalh loh chiang takin kan inhmu thei a ni. Hetih lai hian, mahni dik lohna leh tlin lohna lai erawh inhmuh leh inhriat a har khawp mai. Kan han hre deuh a nih pawn inpawm a har duh khawp mai. Tute tih dan takah side A/B nei ṭheuh kan ni; mahse, lungawi loh lai, hlim loh lai chuan mi dangte felna, ṭhatnate hi hriat a har duh khawp mai. Lawmte lawmpui a har ṭhin, ṭapte ṭahpui erawh a tih ve mai theih ṭhin.

Sawi ta zel ila, fel leh ṭha kan intih viau lai hi chuan kan fel lohna, ṭhat lohna mite’n an lo hre viau duh khawp mai. Mizote hian tlawmngaihna, rinawmna kan duhin kan ngai pawimawh em em a, mahse, a ṭul hunah chuan kan ti lo leh mai ṭhin. Hotute’n emaw min hauh dawn ai chuan, kan chân daih ai chuan dik lo takin thil tih kan hreh chuang lo leh mai ṭhin. Dik taka tia sawi thei tur chuan ni tin kan pianthar a ngai. I piangthar zel mai ang u, thil ṭha tih i zak lo vang u, i ning lo vang u. Tichuan, mite’n hei chu Mizo, dâwt a sawi lo vang min tih theih nan.

Kan thupui hi a va ho ve, hetiangte chu ngaihmawh tehchiam pawh a ngai a mi aw kan ti mai thei. Mahse, fel riau bula awm leh sual riau bula awm chu a inang lo khawp mai. Sual riau bulah chuan fimkhur a ngai a, kan hriat loh laiin min ti si ang. Han thinrim tehchiam chi a ni si lo ang a, naupang hoin a rûka tuar chi an tih ang deuh khan, rilru lam a nghawng ṭalh ṭalh si ang. Fel riaute bula awm erawh a hahdam; tute tih dan takah, an hmelte hi a ṭha ngawih ngawih a ni ber mai e.

Siamtu’n min siam danah mi chi hrang hrang kan ni a, tumah inang chiah kan awm thei lo; hmel ṭha deuh leh ṭha lo deuh, thinchhe deuh leh zaidam deuh, etc. Van aṭanga a rawn thlir dan phei chuan pastor leh dam chhunga tâng tura convict-te nen ni tin ang khatin ni a chhuahtira a tlaktir leh ṭhin. Hetih lai hian sim duh lote erawh a hremna a na ṭang ṭang dawn, sim duhte erawh eng lai pawhin min pawm thei reng a ni.

Sual riau hian eng nge hlawkna a neih le? Fel riaute erawhin mi thinlungah thu an sawi; an nunah Isua hmel mite’n an hmu ṭhin a, vana vantirhkohte pawh an lawm ṭhin ngei ang.

- Lalchhandama Colney, Ph–9862982321