Mizo ṭawng 'Nghafuan ven'

Ṭawng chung changah hian mithiam leh ngaihtuhna hmang peih, mi taima tak tak an awm a. Ṭawng hi humhalh a ngai reng bawk a ni. Mizoṭawng ngei pawh hi humhalh a ngai a, ṭawngkam ṭhenkhat tunlai ṭhangtharten a awmze hloh ṭhaka an hman mek chu ngha fuan ven tih ṭawngkam hi a ni.

Pi leh puten he ṭawngkam an hman a, a awmzia chu 'October thla (Sahmul phah thla) hian sangha inthlah pung tur a huhovin, hmun khatah emaw in hnaih te teah te, sangha tam tak tak an tui a. Hetiang hunlai hian sangha man a awlsamin a nuam em em ṭhin a ni. He hun hi chuhin, pa pahnih emaw, pathum emaw, a aia tam a ni emaw, pakhat chauh pawh nise sangha man turin luiah an awm chilh a, an riah chilh mai ṭhin.

Sangha chu an chang ran a, an chan fuh a, an ven fuh chuan sangha tam tak manin, an hlawhtling hle
ṭhin a ni. Tun laia 'nghafuan ven' tih ṭawngkam kan hman dan leh kan kawh tir dan erawh chu pi leh pute hman dan letling thawk a ni ta tlat mai.

Ṭawng reng reng hi a thumal awmzia leh nihna anga hman vek theih loh leh remchang lo a awm tih hriat a ṭha; ṭawng a nih tlat avangin. Tun laiah nungcha humhalh nachang te kan lo hre telh telh a, sangha fuan ṭhin pawh hi veng lovin, i humhalh tawh zawk ang u.

- PC Lalringliana (Sena)