SUPER TEACHERS

Colombian zaithiam leh lâm thiam tak Shakira hian zirna hi a lo ngai pawimawh êm êm mai a, a bik takin miretheiten zirna ṭha an dawn theih nan tiin school tam tak a lo din tawh a ni. Khawvel miten zirna an ngaih pawimawh theih nan campaign a la nei fo bawk. Khawvel muanna leh himna duhtu a ni tih chu hai rual a ni lo. A ngaihsânawm hle mai.

India ram pawh retheihna avanga zirna leh zirna ṭha dawng lo naupang tam tak an awm avangin kum 2009 khan Right to Education Act (RTE) hi fundamental rights zingah telh a lo ni tawh a ni. Hemi avang hian naupang kum 14 chin hnuailamten a thlawna zirna ṭha an dawn hi an chanvo a lo ni ta a ni. Tunah hian SSA hian hma la mek zelin naupang school kai tawh lo (drop out) te thlenga dap chhuakin a thlawna zirtirna ṭha a pe mek zel a ni.

Mizoramah pawh naupang school kai duh tawh lo thingtlang leh khawpuiah an awm ve nual mai. Kum 2015 chho khan kan veng Vaivakawn-ah rukruk leh ruihhlo a hluar deuh nia kan hriat avangin Vaivakawn Volunteer Force (VVF) kan din a, chutah chuan veng chhung ṭhalai leh tleirawl fel tak takte nen khawtlang thenfai hna kan thawk a. Chuta kan mi man ṭhenkhatte chu ka lo kawm ṭhin a, tam tak hi chu mirethei, zirna ṭha dawng lo, school pawh kai thei loa kawng dik lo zawh ta maite an ni tih ka hre chhuak a, rilru a na duh khawp mai.

A chhan ni theia lang chu hêng naupang leh tleirawlte hian school hi nuam an ti lo a ni thei. Tin, chhungkaw retheihna mai bakah school hmingṭhat kan duh luatah zirtirtuten a thiam thei lo deuhte hnâwl kan ching ṭhin hi a ni. Tin, khawvel sualna pung zelah ṭhian ṭha lo an kawm avangin thil ṭha lo an lo ti palh ṭhin a, chutiang zirlaite chu siamṭhat ahnêkin kan hnên
aṭangin inthiarfihlim se tih hi school zirtirtu tam takte duh dan niin a lang. Duhsakna leh hmangaihna an dawn loh avanga sual ta viaua inngaiin school an bân phah ta niin a lang. Zirtirtute hi zirtirtu satliah mai kan ni lo a, zirlaite nu leh pa, zirlaite ṭhian, zirlaite tana roreltu, zirlaite nun siamṭhaa kawng dik kawhhmuhtu kan ni tel tih hi kan inhriat a pawimawh khawp mai. Zirlaite hi football player ang maia a ṭha ṭha chauh thlan chi a ni lo.

Aamir Khan lemchan Taree Zameen Par-ah pawh khan zirlai zawng zawngin special bikna an nei vek a, thil thlir dan leh thiam theih dan an nei vek a, chumi zulzuia zirtir a pawimawhzia a entir a ni. Chu chu tuna Continuous and Comprehensive Evaluation (CCE) kan tihin a tum pakhat a ni. A thiam thei lo, a buaithlak, a luhlul, a thatchhia, a hahthlak tia a ṭha lo lampang hlir kan thlir chuan naupang school bansan (drop out) an pung zel mai ang. Counsellor kan ni tih hi zirtirtuten kan inhriat a pawimawh khawp mai. Kan ram education system thar Inclusive Education-ah phei chuan zirtirtute hi sorkar hian a dah sangin a beisei sang hle a, engkim thiam turin a beisei a ni ber. Super Teacher min nihtir a tum ni berin a lang. Naupang pangngai leh, rilru leh pianphunga rualbanlote thlenga enkawl thiam turin min beisei a ni. Tin, hremna chelek miah loa zirtir thiama an nun kaihruai turin min la beisei cheu bawk. Dawhtheihna leh hmangaihna tel lo chuan a har ang. Naupang thiam thei, thu awih thei leh pangngai chauh zirtir tum ringawt hi hringnuna hrehawm tuar miah loa nuam chauh chêna damchhûng hman zawh tum ang hi a ni.

Mihring chher aiin result ṭha neia hmingṭhat kan thlan zawk ṭhin avangin enkawl ngai zirlai khawngaihthlak tam takte ngaihthah leh hnâwl an nih phah fo. Hei vang hian hnâwla awm zirlaite hian nun kawng dik lo an zawh phah ṭhin a lo ni. A lungchhiatthlak hle mai! Private school ṭhenkhatin Pathian Kohhran rawngbawltu fate a thlâwna an zirtir ang chite hi a lawmawm takzet a ni. Rawngbawltute fate ang bawkin annual income tlêm lutuk, BPL dik tak fate pawh hi duhsak bik thei se chu a lawmawm lehzual ang. Sorkar school-ah chuan tu pawh an leng vek a, zirtirtute inpek leh inpek lo-ah engkim a innghat vek.

Shakira ang bawka zirna ngai pawimawh India mi, lemchan thiam êm êm mai Aamir Khan pawh khan zirna hi a lo vei ve hle a, 3 Idiots leh Taree Zameen Par lemchanahte zirna lam hawi zirtir ṭha tak tak neite a lo chang tawh a, a hmuhnawmin chona ṭha tak a siam a ni. 3 Idiots lemchanah phei chuan tawng pawng by heart lo a, chhawrtlak thiamna (quality education) nei tura beih a pawimawhzia a entir a ni. Hei hi tuna RTE Act 2009-in a tum lian berte zinga mi a ni nghe nghe a ni. Hemi avang hian zirtirtu tur pawh sorkar hian a duhtui sâwt hle a, trained lo leh qualified lo tan phei chuan classroom-a luh ringawt pawh a remti tawh lo a ni. Zirtirtu ni turin qualified a ngai a, trained a ngai bawk a, professional qualification hrang hrang neih a ngai tawh a ni. Chhawrtlak thiamna pe turin chhawrtlak zirtirtu kan mamawhzia sorkarin a hre chiang a, zirtirtu ni tura tehfung pawh a tamin a hautak tawh hle a ni.

Tunlaia rukru kan man fote leh zu leh ruihhlo bawiha tâng tam takte hi mirethei, lehkha zir thei lo, zirtirna ṭha dawng lo, school aṭanga hnawhchhuah leh chhungkaw kehchhia aṭanga seiliante an nih deuh zel avangin zirna in tin leh zirtirtute hian zirlai chawl (drop out) an awm loh nan ṭan i la sauh sauh ang u. Zoram tinuam mektute hi zirlai ṭhate an ni a, Zoram tinuam lotute chu zirlai ṭha lote an ni. Zirlai ṭhasa chauh enkawl puitling ni loa zirlai ṭha lote pawh zirlai ṭhaa siama enkawl puitling thei zirtirtute hi zirtirtu
ṭhami super teachers an ni si a.

- Miltona, Vaivakawn