Khuarel chhiatna
Khawvel awm chhung chuan khuarel chhiatna hi kan pumpelh dawn lo va. Mahse heng chhiatna chi hrang hrangte hi pumpelh theih a ni a, tawrhna tihnep dante a awm a. Chung chu kan mithiamten mut mawh hnar mawh bera an neih a ni awm asin!
Mi tam tak thihna lirnghing leh tlang kang te kan la tawng ve lo ve, kan vannei hle. Khuarel chhiatna kan tawn tam ber chu leimin te, thlipui te, kangmei te, luipui kama mi tlem te awm ve te tan tuilian te, ṭek den leh motor accident te hi a ni mai awm e.
Mi thiamte chuan heng chhiatna hi chi hnih lian pui pui, mihring siam chawp chhiatna (man-made disaster) leh khuarel chhiatna (natural disaster)-ah an ṭhen. Kangmei thu-ah ram changkang tam tak tawn ang, nisain ngaw a em nat avanga a maha kang ang hi kan la tawng ve lo va. Keini tawn chu lo hal leh huan hal avanga kang te, kut hleiin ram an hal te, electric hrui zawh bak eng chhit vang te, ar ina eng chhit dan fimkhur loh vang te, electric meilum leh mei tihmih lohva kalsan te, eirawngbawlna gas hman dik loh vangte a ni tlangpui. Heng zawng zawng hi fimkhurna leh a hman dan tur dik tak anga hman chuan pumpelh theih vek a ni.
Motor kawng zau pui pui kan mamawh vangin kawng chhak ko a sang lo thei lova, kan ram lei a lo thawl bawk nen, kawng chhak min hi chu kan pumpelh thei lo. Mahse, min hlauhawm zawn kawng thlang lama in, leimin in a hnawl hi chu pumpelh theih tam tak a awmin a lang.
Khuarel chhiatna hmachhawn dan tura mitthiamte ngaih-pawimawh ber chu invenlawkna a ni. “Lei min thei leh nghet lo hmunah chuan in sak loh tur,” an ti mai. Lei hian thil rit dawl zawh tawk a nei a, a zawh tawk ngaihtuah lo leh kan ram leilung ngaihtuah lova duh zat zat kan bel mai hi chu sim tawh a hun. Laipuitlanga chenna in chim aṭang khan inzir fin a hun hle lo maw?
Mithiamte chuan a ram zawh tawk teh a, chu aia rit lova in sak an thupui ber zu nia! In sakah hian a daihzai leh dawng hlawk aiin a chhunga chengte himna a pawimawh zawk. Chumi tluk thuaka pawi-mawh chu a mawina leh nawmna a ni.
Mizoram hi fur lai chuan ruah bawhawkin min nuai chamchi a, ruah bawhawk hi a tawp mai a rinawm lo. Khawpui leh thing-tlangah min hlauh-awm leh min hnawl hlauhawmna hmunah mihring chenna in tam tak a ding a, tuman kan hai lo. Heng hmuna in dingte hi thuneitute hian hmun hima suan dan zawng ta sela, nunna tam tak kan chhan thei ngeiin a rinawm. Ngaihtuahna i hmang tam deuh ang u hmiang.
- Lalbiaktluanga, College Veng