AIDED SERVICE TEACHER TE HI

Zirtirtute u, in hna pawi-mawhzia, ṭhangthar lo la awm tur leh awm mekte, nun kawng kawhhmuhtu in nih hi englai mahin theihnghilh ngai lo ula. In hna-ah rinawm tak leh taima takin thawk ula, itsikna leh elrelna tel hauh lo, sorkar tana rinawm taka hna in thawh hian ṭhangtharte tan malsawmna thuah tam tak in ni tih hi theihnghilh hauh suh ang che u.

Entirna pakhat han sawi mai mai ila. Ka rawngbawlpui zirtirtu pakhat chu kum 25 chuang Aided Sikul service a neih hnuah, a sikul thawhna chu Sorkarah hlankai a lo ni a. A fapa kum 20 mi vel chuan a pa-te sikul sorkar a hlan kai (provincialised) hma chiah kumah sorkar sikulah zirtirtu hna, hmu ve-in a thawk ṭan a. Kum thum a liam hnu chuan headmaster kai turin sorkar chuan inter-seniority list an ti chhuak a le, a fapa kum 20 chuang fe a thawh hnu a, sorkar sikula lut thar chu kum khatin a senior ta daih mai a. A pa hrilhhai lutuk leh zak lutuk chuan “Kei aia pawl hniam leh a let tam taka thawk tlai zawk, ka fapa chu a senior zawk ang maw? Eng dan nge maw ni ta ngai le!” tiin beidawngin a thle a thle ta mai a.

Kei chuan aided/ deficit sikula i lo thawh tawhna (service) kha sorkarin a pumpui-in seniority-ah a chhiar sak thei lo che a nih pawhin kum thumah kum hnih emaw, kum thumah kum khat ang zel tal chu i service seniority-ah an chhiar sak thei mai thei che asin, dil ve ngawt mai rawh. Sorkar tan cheng khat mahin a hek phah dawn si lova, thil uihawm lo pawl tak a ni ngei ang, tiin ka hnem ve a. Sorkar sikula thawk zirtirtute hi a let tam taka thawk ṭha leh thiam leh taima chungchuang te chu nise, an thiam awm tho mai le. Chutiang zirtirtu chu an duhsak pui awm ngawt ang.

Ka ngaihtuahna a kal thui hle mai a. Tuna deficit/ aided sikul a thawk zawng zawngte hian (Primary School aṭanga Higher Secondary School) an service, inter-seniority-ah an chhiar ve thei dawn hauh lova, an khawngaih thlakin an lainat awm em em hlawmin a lang. Hei vang hian kan sorkarin nghilnei leh nu leh pa chan chang taka fanaute an enkawlnaah hian aided service lo nei tawh zawng zawngte hi kum hnihah kum khat emaw kum thumah kum khat ang tal chu Inter Seniority-ah hian han chhiar sak ve thei se chuan fak an hlawh ngawt ang le.

SSA leh RMSA a thawk zirtirtute phei chuan kut an beng ring ngawt ang. Josefa, a unauten an ngai thei lo ang deuh khan, Sorkara thawk zirtirtute hian aided/ deficit sikula thawk mekte leh SSA leh RMSA leh contract a thawkte hi hriat thiamna thui tak neiin, in hmangaih tawna in lainat tawn tur an nih hi theihnghilh lo hram se. In duhsak tawn a, chhungkua a khawsa ho an nih hi vawng nghet tlat se a van
ṭha dawn tak em.

Kum tam tak aided sikul zirtirtuah, ṭhahnem ngai tak leh taima taka zirtirna hna phak ang tawka lo thawk ṭang ṭang tawh leh, an ṭhatlai hun khawtlang leh ram tan sorkar thu leh hla zawma hmang liam tawh e, ram leh khawtlang tana rawng an lo bawlna te kha, en liam san mawi lo lo se. An nu leh pa sorkar chak tak hian a hriat sak ngei ang tih hi ka ring tlat a ni.

- Hc.Thanchungnunga J