Puipunna ei leh in

Tun hnaiah Pres-byterian Kohhran inkhawmpui ei leh in sawiselna lam rawngkai kan han chhiar leh zauh a, he thil hi vawi tam sawi tawh a ni a, siam
ṭhatna thinlung pu lem lova sawisel hrim hrim chakna rawngkai ang ka ti a. Kohhran inkhawmpui thil sem kan sawisel dawn a nih chuan Mizo mipuite puipun ei leh in hi kan hre chiang tawk lo a ni zawk lo maw?

Tun hma aṭang tawhin pi leh pute pawh khan eng vang pawha puipun an huaihawt dawn chuan ei leh in an phak ang tawka tuihnai an hlui ṭhin. An neih ang ang, nidanga an chhungkuaa an ei phak loh thlengin an inlengte tan tiin an pe ṭhin kha a ni ngai.

Hun a kal zel a, tunah chuan chhiatni ṭhatni kalpui dan a lo danglam chho a, Lungphun nikhua pawhin ruaite kan buatsaih tel a, inneih ni se kan phak tawka tui midangte eitir tum ṭhin hnam kan ti. Piancham lawmna, pass lawmna leh kum pawimawh bik lawmna ang chi reng rengah pawh vantlang puipunna atana ei leh in tur buatsaih a nihin mimal pawhin a neih phak sang ber emaw, a neih phak loh thleng thlengin a hlui ṭhin a ni.

Kohhran a nih tak avanga a tui lo deuh leh man tlawm deuh sem tura indah hi chu ka pawm ve lo. Kohhrante chu kan zavaia ta a la ni zui a, mipui aiawha rorel inkhawma kalte chu lo ei tui deuh ang hmiang, tih hi ka pawm dan a ni. Keia ngaih ve danah chuan ei leh in chu phak tawka a tui leh ṭha ber sem mai tur.

Kohhran inkhawm-puia an thil sem man to kan ti a, hmun dangah pawh an sem man to ve tho. Hmun hrang hranga sorkar thil tih pawimawh hi en ila, mahni in chhunga kan chhun thingpui hmeh aia u deuh chu an sem a ni lom ni? Kohhran thil sem a nih tak avanga sawisel kher kher tur a ni dawn em ni?

Puipunnaah chuan ei leh in hi kan duhtui ṭhin a, pawn lam thilah mai mai pawh ei in hi kan duh tui a nih chuan Biak Inah pawh a tui tur a ni tih hi ka ngaihdan mawl te chu a ni.

- Lalchhanchhuaha