Sorkar ṭha leh ngialnghet Siamtu leh tichhetu!

Mi tam tak chuan sorkar ṭha leh ngialnghet kan neih theihna nan hian sorkar/ ministry chauh mawhphurhna emaw kan ti ṭhin niin alang. Chuvang chuan mahni indah ṭhain, hla tak aṭangin sorkar hi kan ral thlir fo. Mahse democracy ramah chuan sorkar ṭha leh ngialnghet kan neih theih nan sorkar chauhin mawh a phur lo a, mipui nawlpui pawhin mawh thui tak kan phur ve. Chutih laiin kan ramah chuan sorkar ṭha leh ngialnghet duh in ti si hian chet chhuah emaw mahni insiamṭhat tumna reng kan nei si lo.

Entir nan- midang leh sorkar chu insiam ṭha turin kan duh em em a, mahse mahniah bulṭan erawh kan tum der si lo mi tam zawk hi chuan kan hamṭhatna tur chuan sorkar chu dan ang lo hretin kal mah se pawi kan ti lo. Chutih laiin midang tan chuan sorkar chu khauh leh dik takin kal se kan duh leh lawi a. Hengtiang hi kan kalphung a nih teh nuai avangin sorkar ṭha leh ngialnghet neih a harsa
ṭhin a ni.

Thufing chuan "Mipuiten an phu ang tawk roreltu an nei ṭhin" a ti a. Hun kaltawhte han thlir kir ila, kan ramah hruaitute demna tur an awm a nih chuan mipuite pawh kan bang lo tihna a ni ang. Chutiang zelin sokarin fak an phu a nih chuan, mipuite pawhin fak kan phu tihna a ni. Entir nan tun sorkar kan hrawn mekah hian nuar leh lungawi lote thawm hriat tur a tam lo hle a, a awmchhunte pawh hmehhmih an ni zel a, hei hi a chhan nia lang chu, mipuite vang a ni. Mipuiten, mahni sahmim puarna tur zawnga nuar leh lungawi lo ṭhinte hi thlawp lohna chang kan hre tawh a. Chu chuan sorkar tha a tichak a, sorkar pawhin huai takin hma a lak theih phah a ni. Chuvang chuan mipuite pawhin kan hlutna leh pawimawhna hi kan hriat chian a ṭul tawh tak zet a ni. Hun lo kal turah pawh hetianga mipui leh sorkar kan ṭanho theih zel chuan, sorkar ṭha leh ngialnghet kan neih theih zel a rinawm.

Sawi tawh angin tuna kan hrawn mek Congress sorkar hi mi tam tak chuan kum sawm bak daih lo turah kan ngai deuh vek a. Chutih laiin he sorkar hi tun anga a kal zel chuan Mizoram hi bung thar min kai puiin, term thum (kum 15) sorkarna a siam lo ang tih sawi theih a ni lo. Kan hriat angin inthlan nan kum hnih ṭha el-awl chauh kan nei tawh a. Chutih laiin opposition-ten sorkar beihna tur point lian tham vawrh tur an nei mumal lo te hi he sorkar hi sorkar ṭha leh ngialnghet a ni tih a tilang tlat. Mahse hengte pawh hi sorkar leh mipuite thawhhona ṭhat vang leh mipuite pawhin thil ṭha leh ṭha lo kan thlir thiam tawh vang nite pawhin alang. Kawng dang lehah chuan kan CM pawh tun hma angin thu buluk pui pui, a phuh chhuak tawh meuh lo a. Ram leh hnam hmasawnna tur a nih dawn chuan huai takin a sawi a, a ti mai bawk a. Tin, sorkar kalphungah dik lo leh ṭha tawk lo a awm a nih pawhin tun hma angin a ṭang buk ruih tawh lem lo a, hengte hian sorkar a ti ngialnghetin sorkar ṭha a siam a ni.

Hetiang a nih mek lai hian he sorkar pawh hian tih fuh tawk loh a nei ve nual. A bikin MLCP Act-ah kohhran duh loh zawngin hma a la a. Hei hian sorkar a tihmelhem deuh. Kan hriat angin he MLCP Act hian kum khat hmel a hmu a, a rah ṭha lo tam tak hmuh tur a awm ta. Kohhranin a hlauhthawn ang ngeiin, zurui vanga buaina veng tinah hriat tur a awm ṭan tawh a. Khawlaia zu rui leh thawm bengchheng hriat tur a tam ṭan ta hle. Tin MLCP avang hian ruihhlo dang a hluar ni te pawhin sawi a ni leh zel a, kan beisei loh lamah sualna a pung ni te pawhin alang. Ruihhlo kaihhnawiha thi pawh kan pung leh ṭan ni te pawhin sawi a ni. Eng ministry-ah pawh kohhran duh dan ang loa kal reng reng sorkar a kal tluang thei ngai lo. Chuvang chuan sorkar ṭha leh ngialnghet tak nei tur chuan sorkar leh kohhrante pawh thil lianthamah chuan inrem taka kal a ṭul ṭhin.

Eng sorkarah pawh sorkar tha leh ngialnghet kan neih theih nan a lang lo lama pawimawh em em chu party worker-te hi an ni. Sorkarin thil ṭha duhin, dik takin kal pawh tum ṭhin mahse party worker ten, vau ti tih, nawr ti tih a sorkar an kar fo chuan, sorkar pawh atum loh lamah avei tluk phah fo thin.Chuvang chuan Party worker te pawh mahni sahmim puarna tur chauh ngaihtuah loin ram leh hnam ṭhatna tur kan ngaihtuah thlen a hun. Chutiang a nih loh chuan sorkar ngialnghet kan neih thei ngai lo ang. A bikin sorkar ṭha leh ngialnghet kan neih theih nan Party worker-te hian kan mindset kan thlak a hun. Hun kal tawhah sorkar a duh anga a kal theih loh fo chhan tam tak chu party worker pamham te vang a ni.

Sawi leh ṭhin ila, tun Congress ministry-ah hian party worker thil tithei fal leh in vaivung lutuk hmel hmuh tur an tam lo niin ka hria. Chu chuan sorkar kalphung pawh a timawiin a tingialnghet ni te pawhin alang. Chutih rualin sorkar fawng vuantute pawhin min thlang tlingtute hlutna hre rengin an phu ang tawk tih sak hi kan bat a ni tih hre reng ila a ṭha ang. A tlangpui thuin sorkar term hnih an chelh meuh tawh chuan Minister-ten mahni vua leh vangte vulh chiam an ching a. Mi tam zawkte chuan dan pel rawk khawpin thil tih an ching bawk. Hengte pawh hi sorkar ṭha leh ngialnghet kan neihna tur daltu lian tak an ni fo.

Sorkar ṭha leh ngialnghet kan neih dawn chuan a chunga kan sawi tawh ang khan sawi nawn leh ta ila. Party chhungah ngiaunger, vuivai an tam loh a ngai ṭhin. Dik tak chuan sorkar tan pawh dan pel si lo hian party worker-te leh kan vua leh vangte pawh duhsak theih an ni. Chu chu party tan leh sorkar tan pawh a him ber fo. Sorkar ṭha leh ngialnghet nei tur chuan a te ber aṭanga a lian ber thlenga kan ṭan rual a ṭul tak zet a ni.

- T.Lalengmawia