PUJA LEH KRISMAS

Puja chawlh rem-changa hmangin Kolkata-ah ka fate kan zinpui a, zin hi zirna lama thil ṭangkai tak pakhat a lo ni ve bawk nen, a manhla viau mai.

Tunlai chuan TVaṭangin engkim kan hmu thei ta vek zawk a, tun hma phei kha chuan kan zir leh kan hmuh hi a inhlat khawp a, zin a har zual bawk nen, excursion pawh a lar zual ṭhin kha. Puja laiin thil a tláwm an tih hi a dik a, a tlàwm hun tak phei chu puja dawn hnai të, urlâwk ni kan tih ang vel hi niin an sawi. Chutih lai chuan heng dawr lian - Big Bazar, City Mart, Pantaloons, Westside leh a dang tam takah hian thil man hi a zatve laiin an tihniam a, 60% laia tláwmte pawh a awm
ṭhin an ti.

Keini Kristiante erawh chuan ... tih zui hi a remchang khawp mai a, dik pawh a dik. Sumdawng tam tak hian kum khata thla 11 chhunga an lei belh khawm aia tam hi December thlaah hian lei phâkin an insawi fo a, a dik a nih chuan thil man to lai berin hun danga kan lei ngai loh kan lei chiam zel tihna a ni phawt mai a, a to pawha lei hrim hrim kan nih chuan, a zuartuten an tito sauh hi a mak lem lo. Puja laia thil tlàwm chhan hi 'an hunpui a nih vang' tih vel bâk chu ka hre thui lova, kan hunpuia a to sauh chhan hi 'kan hunpui a nih vang' a nih ve bawk si chuan, hunpuiin a zuartu leh a leitu a khawih dan chu a inang lo tihna chu a ni phawt ang.

Mamawhna a sànin thil man a to tih hi eco-nomic theory mawl leh satliah ber pakhat, zir lo pawha hriat sa a ni. Miin an duh viau thil chu a to tlangpui. Mizo phei chu a to apiang a ṭha emaw ti hi kan tam khawp a, hralh theih loh hralh nana a man tihhniam a hnêka tihsàn sauh pawh a awm ṭhin.

Economic law kalh hian kan che fo a, mi tana dik lo hi kan tan a dik ṭhin a ni mahna. Pawisa a váng ti reng bawk si, a to zawng tlat site hi kan awm a, hnam mak tak zawng kan ni. 'Miin an duh tho' tih vang ngawta àwm lo lutuka thil man chhiar hi rilru hrisel lo thawmhnaw a ni a, hmuingil ziktluak loh a hlauhawm. A leitu dinhmuna indaha lei ngamna tur hian zuar ila rilru a nuam tlangpui.

Thil a harsa tih thawm a awm avang maia a hmaa kawl sa reng tihto ringawt te hi a Kelkang rilru lo. Mahni hmasial chin tâwk neih loh hi mihring rilru put hmang fel tâwk lo a ni hrim hrim a, a sawh-khawk pawh hlauh-na cháng hriat a ṭha. Hausak kan hmanhmawh lutuk emaw ni, kan sumdawn dan hi a tla nghet mang tlat lo. Kan ṭhang uak uak a, kan chim leh rup fo. Sumdawngte hian hlép an nei tur a ni tih mi tinin kan pawm a, hleihluak leh uchuak taka thil tih chingte nun hi a hahchawl tak tak chuangin a rinawm lo. Kumin Krismas chu kan sumdawngte rilru danglam hret se aw! In ti ve em?

- RK Lianzuala