Singapore zebra crossing

Khawpui hulûm laia lirthei intlan chhâwk hun traffic light-in a thununna hmuna kea kawng kân duhte kânna laiah chuan kawngpuiah zebra crossing inziak râng hi a awm miah lo! Kea kân hun kan nghak a, a hun a lo thlen khan lirthei an ding a, rîn vâr pahnih inkar zau ṭha takah kan kân mai.

Kawngpui lian ni lo, traffic light awm lohna hmunah, kea kawng kân duhte kânna turah hian zebra crossing a awm ve thung a; chutah chuan kea kalte an lal tlat a nih chu! Kea kawng kân duh an awm chuan motor a ding mai a, kea kalte kawng a kian zawk. 'Ding rawh' titu hâmrîk emaw, êng sen emaw a awm hran lo; kawng kân duhte kha lirtheih khalhtu khan a zah tlat.

Malaysia-ah khan ka hmu ṭhin bawk. Traffic light-in kawngpuia veivâk a thunun lohna chin kawngpuiah khan kea kawng kân duhte an zah em em a, zebra crossing lo laiah pawh min kian a, min nghâk zawk zel.

Kan ramah chuan traffic a jam pawhin zebra crossing thlengin lirtheiin kan luah vek a, kan din hnan hmiah zel! Mi ram ang diak diak chuan kan la ti thei lo a nih pawhin, kea kawng kân duhte kânna hun siamsak hi lirthei khalhtute hian chîng ve ila chu a nuam sawt ang. Zebra crossing em ema ding chut lo tur hian lirthei khalhtute hi fing ve tawh ila.

Ka lehkhabu pakhat, 'I thu ber lo' tih bung tawp berah zebra crossing chungchang hi ka lo ziak ve tawh a, hetiangin:

"Zebra crossing bulah lirthei tlan zel thei loa din a ngaih tho tho chuan, kea kalte'n kawng an kânna remchang atan hmun âwl zuah nan zebra crossing lai taka ding loin, a thlen hma chiaha din tur a nih hmel."

"Kan nun traffic buai tak karah hian mi dang tana kawng ken ve hun, din ve hun, chawlh ve hun te a awm ve tur a ni. Chuti a nih loh chuan mi hnawksak kan ni fo thei dawn."

"Kan nunah hian mi dang leng ve se, khawvel kan hman mekah hian mi dang tan remchang siam ve ila, nun ho hi a nuam lehzual ang maw le!"

- Dr. C. Lalhrekima