Hnathawh hun hi

Mizoram sorkar hi hna-thawk tlem ber pawl a nih loh pawhin hnathawk tam ber chu a ni lo chiang mai a, sorkar office kai hun hman thar turah chuan October 17 aṭangin zing dar 9:30-ah ṭanin tlaiah dar 4:00-ah an bang a, hei hian company leh firm tam tak nuih a tiza ang a, hnathawk tak tak ṭhin business office lam chu an nui ru tet tet dawn a ni.

Kan sorkar hnathawk hlawh tamho hnathawh tlemzia sawi avang hian anmahni ka thik lova, hnathawk mang lova hlawh lak hi a zahthlakin a hmasawn lo zia tih kan inhriat hunah tun aṭanga kum 20 velah chuan kan hnathawh hunte pawh kan la siam ṭhain kan sikul ṭan hunte pawh kan phun kan phun tawh lo vang. India ram zau takah a khaw chhak berah kan awm a, ni a chhuak hma bera hna kan thawk ṭan tlai deuh ber emaw tih tur a ni a, a tehna chu sikul ṭan hunah a ni.

Keini aia darkar 1 dawna tlai tura ngaih Mumbai te aiin sikul kan han ṭan tlai mauh mai hi chu zing kar hun in khawhral siak awm ta se pakhatna kan ni ngei ngei ang.

Hnathawh hun tlem leh tam lam hi chu mi thiam zawkin han khaikhin ṭhin se anni kutah dah ta ila. Ka sawi duh chu kan hnathawh hun inang tawh lo hi a ni. Tun hma chuan kuthnathawk vek kan ni a, kan hnathawh dan kalphung a inan vek avangin engkim mai hi a huhova tih dual dual theih a ni a, hun bi fel tak neih theih a ni; tunah chuan a theih tawh loh.

Khawpuia private hospital tam tawhzia hi en la, henga hnathawktu hi engzat nge ni ang le? Henga hnathawktu zawng zawng hi Inrinni zana inkhawm ve hman lo, Sunday School-a hming pawh dah ve hman mang lo khawpa buai an nih hi. Pathiannia office hawng tlat chi hi an awm nual tawh a, private security duty zozaite pawh hian holiday an hre ve lova, inkhawm hun leh hun lo pawh an nei hrang ve thei lo. Heng hnathawktute hmakhua ngai a, anni lam nena inzawm tura thusawi hi ka hre khat a, khawtlang leh kohhran rorel phei chu ka la hre lo.

Inkhawm laia engmah tih loh tur mentality hi kan paih a hun tawh a, a bikin private-a hnathawk tam tak hi inkhawm ṭan hma avanga bang hma thei an ni lo. Millennium Centre leh shopping mall kan neih vete hian krismas dawnah inkhawm zanah dawr an hawn a ngai a, mi zawng zawng hi Nilai zana kan inkhawm loh avangin hetih huna hnathawk an awm ṭhin tih hi pawm ila, inkhawm huna hnathawh hi sawisel tawh lovin, hnathawh huna inkhawm lo awm tlat hi anni lam ngaihdan a ni zawk thei tlat a ni.

Hnathawk tlem zawk sor-kar office mila thil teh a, hnathawk tam zawk private hnathawktute thlirna ṭawmpui lova, kohhran inkhawm lai a nih vanga thil dang tih thiang lo ang maia kan ngaihna pawh paih ila, inkhawm hian a inkhawm lote awm dan lehzela thuneih hi tum lo ila, hnathawh hun a inang lo tih hi pawm ila a ṭhat ber ka ring.

- Sangtea