Krismas ruai

Krismas kan hnaih tial tial a, kohhran tam tak chu Krismas ruai tur an ngaihtuah ṭan tawh ang. Krismas hi kan hunpui a ni a, nuam leh tlai taka hman kan tum vek ṭhin. Kohhran tinte pawhin Krismas ruai a tui thei bera siam kan tum a, sum pawh kan seng hnem leh hle dawn a ni.

Khawpuiah hian Krismas ruai hi kan uluk khawp mai a, ruai chaw sem leh chawhmeh semtute reng rengin kutkawr an bun a, lukhum an khum vek bawk. Thing-tlang hmun tam takah chuan hlui siamin, hnah phah chungah an la kil a, khaw lian deuh chinah chuan hnah lak tur a tam tak loh avang te, lak a harsat avang te, hmun neih loh avangtein ruai hi hluia siam a ni ta lo.

Khawpui bikah Krismas ruai atana kan senso a sang ta hle mai a, kum tluana ruai atana kan thawhlawm thawhin a tlin ta meuh lo. Hetiang reng a nih chuan ruai ṭheh loh hun hi a la awm thuai ang. Ruai atana kan sen nasat em em chhan chu chawhmeh chi hrang hrang kan siam hnem ta lutuk hi a ni. Hotel ṭha taka chaw leh chawhmeh an chhawp ang tluk zet tura tui ṭha chhawp kan tum a, kan ruai senso a san phah hle.

Thingtlangah chuan vawk sa leh bawng sa a awm a, chaw a ni leh mai a, chuti chung chuan puar takin an ei thei. Sa ei thei lo tan thlai aṭanga siam chawhmeh an siam leh mai a, an thawhlawmin a tlin em em a, mipui an puar a, an chawhmeh a tui loh an sawi ngai lo. In lama an chhum leh siam ang thoin an siam a, phunnawi an awm mang lo.

Khawpuiah chuan chawhmeh kan inneih tui siak a, in lama kan ei phak loh tur ṭha ṭha kan chhawp a, thawhlawmin a tlin loh thleng thlengin ruai kan buatsaih a, phunnawi an awm tho. 'Kan thawh hnem nen nen, a tui lo' ti tawk kan awm fur zel. Chawhmeh siam hnem lamah te hian kan inel ta a nih hmel hle mai a, 'chumite kohhranah chuan chutiang chu an siam a, a tui tak tak' tia an sawi chuan siam ve mai kan tum nghal ṭhin.

Ruai tak siam kan tumna lamah hian mipuiah phur a rit tial tial a, thawhlawm thawhah ṭhahnem ngai turin kan infuih sauh sauh a, kum hmasa aiin thil man a to tawh bawk si a, kum hma-saa kan hmuh zat ang chiah kha chuan ruai kan ṭheh thei tawh lo ang, kan ti ut ut mai a nih hi. Krismas ruai atana pawisa thawh tur phurrit insiam belh vak vak ai chuan tun aia chawhmeh tlem zawk, tui tho si, a sehhmeh leh bawlhlo tam vak tawh loa ruai siam lamah kan inel a ngai zawk. Ruai ropui hi mipui tiphunchiartu a nih chuan a hlawk lo hle tihna a ni.

- Lianhminga Tlawmte