Zuangtuia hot mix plant hâl chhiat
Tun hnai May ni 7, 2025 Nilaini zan khan Zuangtui venga hot mix plant, PWD hman lai chu khawtual mite'n an hâl chhia a, a tukah PWD leh khawl buntu Sky Builders lamin Bawngkawn PS-ah FIR an thehluta sawi a ni. Hetianga Mizoram hmasawnna tur leh kawngpui ṭha kan neihna tura hmanraw pawimawh tak hâl chhiat a ni hi a pawi tak zet zet.
Zuangtui khawtual mite'n an venga khawl pawimawh leh man to tak an hâl chhe mai hi a pawi a ni. Mizoram mipui, a bik takin Aizawl mipui pawi an khawihah kei chuan ka ngai.
May ni 5, 2025 zan dar 7:30-ah pungkhawm tur leh a ṭul anga hma la nghal tura inring tura an inhriattinaa a lan danin, hetianga pawi an khawih chhan ber chu hot mix plant khu nasain an veng mipui tam tak harsatna a siam vang niin a lang.
Hot mix plant chu eng ang taka khu nge, engtiang takin nge mipui tan harsatna a thlen ka hre hauh lo a, harsatna chu a thlen ngei ang tih zaa zain ka ring. Mahse, khawl pawimawh leh man to tak hâl chhiatna khawp harsatna erawh a nih ka ring lo.
Zuangtui veng mipuiin kawng siamna tur khawl pawimawh an tichhe vak mai hi thil dik lo, dan lova chetna dik tak a ni a, a changkang lo va, ram leh mipui pawikhawihna a ni. Mizoram mipui, a bik takin Aizawl mipui hnenah thupha chawiin ngaihdam dil hial âwm an ni.
Mizoram hmun tam takah national highway zauh a ni a, kawng chhungah lei an lai nasa. Ruah a surin a diak em em a, khua a ro leh a khu em em a, mihring hriselna atan pawh a ṭha lo ang a, tih tur khawpte a ni. Hetiang hi khaw tam takin a kum têl an tuar a, tunah pawh la tuar mek an awm ṭeuh mai. Mahse, anni chuan hmasawnna tura pawimawh a ni tih hriain chhel takin an tuar mai asin.
He thil thleng hi political party hamṭhatna lak tum nan leh sawrkar dem nan hman an lo tum ve nghal zat a. MNF ho phei chuan FIR la let turin PWD an phût a, an lak let loh chuan Zuangtuia PWD office-a thawkte dan an tum tihte kan lo hre leh zel a.
MNF hi an zaktheilo ka ti hle. Khawl hâl vanga man Zuangtui mite Zuangtui mipuite vekin an thlavang hauhin hma la ni se chuan a hriatthiam theih deuh. MNF an lo inrawlh daih leh PWD office dan an tum tlat hi a mak hle.
Congress Treasurer Dr. Lalmalsawma lahin khawl hâl chhiat kha politics-a lansarhna leh sawrkar lai beihna tur remchang atan hman tumin May ni 12 khan a hmunah a va en nghal. Sawrkar demna lam thu bawk a sawi a ni.
East-I MNF ho leh Congress Treasurer te hian thil dik an duh a, dan a ngai pawimawh tak tak a nih chuan Zuangtui mipui chet dan kha an dem ve zawk tur a ni. Thil dik lo tite dem duh lova sawrkar demna ringawt an tilang duh hian an nihna dik tak a tilang chiang hle a ni lo'm ni?
- Zoramchhana