Ration card siamna khawl chhe rei lutuk hi

Sawrkarin healthcare scheme thar a siam a, inziak lut turin ration card en mil a ngai. Mi tam tak tan ration card siam ṭhat a ngai a. Healthcare chungchangah chauh lo pawh ration card siam ṭhat ngai kan tam em em a ni. Chutih laia ration card siamna khawl ber, server an ti emaw ni, rei tak a thi tlat tawh mai si a, he thu ka ziah lai thleng hian thla hnih a tling ṭêp tawh. He thil hi he laia tihthih pawh ni lo, thil tih dan thlakthleng tur vanga phai lam aṭanga tihthih a ni awm e. Mahse, a rei ta em mai a, mipui kan mangang ta a ni. Hetih chhung hian kan lo damlo ang tih a hlauhawm a, a ṭhen buhfai lak dan buaichuar takin an awm ang a, a ṭhen ration card en mil ngaia tih tur neite tan a buaithlak ta em em a nih hi.

Hla tak tak aṭangin min bialtu DCSO office kan pan thlawn zing ta hle mai. Ration card buaipui tawk vel mihring hi chu office-a thawkte lah hian min lo ngai pawimawh lo angreng si a. Han zawt thui deuh dawn ila, ‘Engmah kan hre bik lo, pawna saw kan tar saw,’ an ti hmuk zel si. An office luhna kawngka biang lehlam lehlama hrui thlungin, ration card siamna khawl chhiat thu leh a ṭhat hun tur an hriat loh thu ziak an khai a; luh pawh inthlahrunawm khawpin hrui an thlung po mai si a.

Ni 4.4.2025 khan min bialtu DCSO West office ka pan a, an khawl chhiat thu min hrilh a, a kar leh lama kal leh turin min ti a. Ni 9.4.2025 chuan ka kal leh a, a lo la ṭha chuang lo va. Kal thlawn a buaithlak thu ka sawi chuan, "In veng hnaih lama mi DCSO East office lo zawt hmasa la," min ti a. Tichuan, a hnuah DCSO 'E' office chu ka zawt ta a, a lo la ṭha chuang lo. 'Lo kal buai ngai lovin tu emaw phone number min pe thei mai em?' ka ti a, an pek theih loh thu min hrilh a. Keiin, 'A uiawm viau em ni? Pakhat mahin in phal lo a maw? ' tih leh ṭâlh pahin ka hawi kual a. Ka dawr deuh ber nu chuan, ‘Phone number inpek hi a uiawm. I duh leh in bialtu office-a mite dil rawh," min ti ta a. Zak angreng tak chuan ka chhuak ta a ni.

Ni 15.4.2025 chuan DCSO 'W' office chu ka pan leh ta a, khawl chu a lo la ṭha chuang lo. ‘Lo kal thlawn ngai lova phone number min pe thei in awm mai em,’ ka ti leh a. Ka biak deuh ber, ration card khawihtu deuh ber ni âwm tak pa chuan, ‘Kan pe thei lo. I duh leh sawta ṭhu saw va dil rawh,’ min lo ti leh a. Chhak lam kil bera ṭhu hmeichhia chu ka va pan ta a; a bula lo ṭhu pa pakhat, peon siniar ni âwm tak chuan, ‘Canteen number pe rawh,’ a lo ti a. Mahse, chu nu chuan phal zân lo hmel tak hian a number chu min pe ta hram a.

Mahse, an phone number an ui em a, phone loin vawi eng emaw zat chu ka kal leh tho a, vawi hnih erawh inthlahrung takin ka phone hram a, a hnuah pawh ka kal ṭang ṭang tho. Tunlaiah chuti taka phone number confidential hi a lo awm tih ka lo hre ve si lo. Tin, tunlaiah heti taka mipui hnuaihnung zawkte laka inti-sawrkar hnathawk viau hi an awm meuh tawh lo emaw ka lo ti ngawt bawk a ni.

Supply department changtu Minister hi mipui lam awlsamna leh ṭhatna tura ṭhahnem a ngaihzia leh, mipui tana a ṭan nasat thâwm a rin tehlul nen hian, office lama mite chuan mipui awlsamna chu an lo ngai pawimawh leh lêm si lo a nih hi, ka ti ta deuh a ni.

Chuvangin, mi tam tak mamawh ration card siam hi a theih hrih loh a nih pawhin, a la ṭhat loh thu hi department hian zau zawk leh zing zawka puanzar ṭhin ni se. Tin, tunah hian a ṭha tawh a nih pawhin puanzar tho ni se, tih hi ka'n rawt a ni e.

- K Hmingthankaia