Literacy drive Kolasib District-ah (Mizoram khawiah nge a din ang?)
Mizo hawrawp a lo piang a, Missionary-ten 1894-ah mi pahnih an zirtir ṭan a. Gospel Jubilee 1944 velah chuan India ram District literacy-ah kum sawm vellai pakhatna in ni, an ti ṭhin a. India ram zalenna a lo thleng a, State dangten ṭan an la a, Mizoram zirna sawrkar kutah a awm ta bawk a. India ram State-ah pahnihna kan ni ta a.
Kum 1993 chho vel khan Adult Education Jt. Director Pu R. Lalrawna hoin nasa taka ṭan lak a ni. Mizoram pum huapin a thiam a piangin, thiam lo zirtir ni se tiin beihpui thlak a ni a. Central sum a lo kal bawk a. Thupui "Each one teach one" tiin Education Officer zawng zawngin ṭan an la a, an zin kual a. Kei pawhin mi pathum chu ka thiam tir, lawmman ka dawng.
Heng vang te nge ni India ramah pakhatna kan ni 95% tiin Director Education Office tualah 'Thangchhuah lung' tiin 2000 kum khan Minister hoin kan phun a. Mahse, census a lo ni a, pathumnaah kan awm. Tunah hian Tripura chuan min lehpel mek a. Census-ah eng tak ang maw. Tunah chuan 95.34% kan awm e. (Adult Edn. Reprt) Ram pum inelna ṭha leh Mizoram tan chona, kan rual pawlna a ni a. Central-in pawisa min pek loh chuan kan chawl mai em ni ang? State dang an chawl si lova. Hetih lai hian Kolasib D.C Pu H. Lalengmawia, IAS hova hmalakna Kolasib DEO K. Lalrinmawia'n min hrilh a. Entawn tlak hlein ka hria.
Pu H. Lalengmawia chuan Education-a thawk hote
ṭanrual pui atan a sawm a. Kum tirah khua, veng habitation tin tlawh a, ziak leh chhiar thiam lo kum 6 - 60 hming an ziak chhuak vek a. D.C hnenah February thlaah thehluh a ni a. Heng mite thiamtir tur hian kawng hrang hrangah hmalak a ni.
MLA Model Village-ah ṭan a ni a, SSA leh CRCC te an ṭangkai hle. Zirtirtu leh a thiamte sawm an ni a. Director DRDA Project Director te hmuin MNREGS inhlawhna Job card nei zirtir thei leh zirtir ngaite chu chhun chawlh laia zirna an siam sak a. Zirlaite mamawh ziak loh bu, pen, pensil, etc. District SSA Mission School-a an sem bang an thawhkhawm bawk a.
Kumin Teachers Day 5th Sept khan Depth talent hrang hrang Officer-te group 36-ah inṭhenin, thupui 22 kengin khua/veng hrang hrangah beihpui an thlak a, mipuiin an hlut hle. Kolasib vel hi a ram a ṭha a, state ramri hrul hnam hnufual leh Refugee te an awm bawk. An taima a, zirna an ngaisang vak lo niin a lang.
Tuna thlen chin (achieve-ment) chu ziak leh chhiar thiam thar 180 report, Total Literacy khaw 2. Chhawp chhuah tawh, la puan loh khaw 5. Hetianga an beih zel chuan Total Literacy District a ni mai awm e. Heng bakah hian DC hovin Higher Education lam pawh seminar neih a ni ṭhin. (2015 record- Kolasib District 96.30% illiterate 6-14 yrs = 198) District dangten kan ti ve thei ang em le? Serchhipah illeterate tlawmna 21 a tamna ber Lawngtlai District 1674.
- V.L. Nghaka