Gas hmuh loh hi ka thin a ur
Tunah hian Mizo-ram mipuiten keima pawisa ngeia ka lei tur gas pawh min pe thei lo sorkar kan nei. He sorkar hian gas min pek hi a mawh-phurhnaah a ngai lo a nih chuan sorkar hi bang mai rawh se. Tunlai khawvelah gas, electric, tui hi kan mamawh (basic needs) lian tak sorkar aṭanga kan beisei a ni a, a bak hi chu indap chawp dan a awm a, hei hi sorkar hian a mawhphurhna a ni tih hi pawm se a ṭha ngawt mai.
He thilah hian political party dem ka tum lova, mimala dem duh ka neih chu Supply Minister leh a thawhpui zawng zawng, officer leh thil hrethiam chin a staff-te hi ka dem a ni. Politics zawngin ka sawi lova, mawhphurna hlen loh vangin ka dem a, hei leh chen kan rama black-a gas an zuar
ṭhin an ngaimawh lova, gas buk tling lo an en lian mai mai a, tun hi kan thleng ta a ni.
Miin an sawi ṭhin MNF sorkar laia 'Gas duh em?' tih pawh kha lawmna tur a ni chuang lo. Khatih laia kan Minister kha a chak pawh a ni hran lova, dan loa gas vir vel kha a pawmzam a, chak takin dan lovin thil an kalpui ngam tihna zawk a ni. Dan lova gas kalpui phalsaktu hi Minister lam aiin official hi an ni zawk a, an man lova, an tang lova, an zalen em em a, chuvangin tunah a tawpah kan buai.
Damna tur chuan damdawi kha a ngai an tia, kan damdawi ei hi a kha khawp mai. Kan sorkar hrawn tawhte hian dan lova gas suasam leh tichingpentute chet vel dan an hmu lo der a, hun kha leh chen kha an ngaihthah tlat avangin mualpho lovin kan awm a ni. Tunah CYMA-in "A tawk tawh e, kan gas in ruk vanga in hausak hi kan phal tawh lo," an tih rualin mipui an hrek let ta a, tunah hian Mizoram state pumpui hi gas inchuh tur pawh nei loin kan buai ta a. Thuneitu level hrang hrang aṭangin inhriatthiamna in kha chen kha kan kal tawh a, driver te thlengin gas khawih chingpen avanga hlawkna teltu hi an intlat thla duah a ni. Mahse tunah kan han hrek ta chiah a, mipui kan buai ta. He kan harsatna
aṭanga chhanchhuah hna thawktu tur chu sorkar a ni.
Tin, buhfai bag phaia kan lei hun rei zawng hi ṭhang engzat lian nge ni tawh ka hre lo. Tun hnaia buhfai supply kan kalpui dan hrim hrimah pawh hian thil dik lo tam tak a inrawlh ngei ang. Thil reng reng hi dan hrulah dan bawh kul deuh lo chuan engmah hi kan kalpui thei tawh lo ni te pawhin a lang. Mizoram hian kalphung dik leh
ṭha kan mamawh a, chutianga kal kan tum a nih chuan siamṭhat ngai hi a la inchhawp chho reng dawn.
Gas hi han ching fel se, petrol pawlh dal hi YMA hian a bi tum leh chat a ngai. Hetah phei hi chuan a huaisen lehzual a ngai ang a, mipui pawhin petrol neih loh hial kan inhuam a ngai dawn.
Kan petrol chhia avanga kan lirthei a chhiat zawh hma hian YMA hi an ṭan a ngai a, gas anga kan mualpho lohna turin sorkar hian back up plan lo nei lawk bawk se i ṭang tlang ang u.
- Lalremsanga (Marema)