Zuangtui an Barbarian bik lo ang

Tun hnaiah Zuangtui venga PWD chuan alkatra chawhpawlh nana an hman Hot Mixed Plan chu khawtlanga mi ṭhenkhatin an hâl chhe vek a, an hâl chhiat chhan pawh a inmung rei fe tawh a ni chêk ang. Mi ṭhenkhatin Zuangtui khawtlang an dem a, Barbarian cheta che ni awm takin an puh a. Mahse, an thu kal mek hriat chuan an Barbarian lem lo e.

He khawl hi tu ta nge hriat a ni lo a, a ṭhenin PWD ta an tih laiin a ṭhen chuan PWD-in mimal hminga a lei ni awmte'n an sawi a. Tu ta pawh ni se, khawl hi khawtlang tan a hnawk ngang a ni ang e, hâl chhiat hial a ni ta a ni. Hâl chhe lo se chu duhthusam a ni ngei mai. Mahse, hâl chhiat ngai khawpa a hnawk a nih chuan PWD inenfiahna tur a nih hmel.

A thuhrimah he khawl hi Aizawl khawpui kawng siam nan a ṭangkai em em a, a ṭangkai ang hian enkawl emaw, khawtlang tana hnawk khawpa hman tur a ni bik lo ang. PWD an nih vanga khawtlang tana hnawk khawpin an khawsa bik tur a ni lo. Mahni hna ringawt ngaihtuah engineer ho pawh hi inenfiah ve a ngai ta a ni.

Kha khawl kha hun eng emaw chen aṭang tawha hman ṭangkai a nih hmel a. Eng angin nge a bul hnaia mi chengte tan harsatna a siam tih pawh engineer-te’n an hre reng si a, mipui tana harsatna thlen lo zawng pawhin a hman theih ngeiin a rinawm. Mahse, engineer-te chuan alkatra a chawh theih phawt chuan lehlam harsatna kha chu an ngaihsak miah lo tihna a ni.

Khawl an han hman tak tak chuan mihring tana hlauhawm khawpin khu dum ngêk ngûk a chhuah nasa ṭhin hle a, a bul hnaia khawsa tan chuan hlauhawm khawp a ni ziah. Hei hi khawtlang hotute pawhin PWD hotute hnenah pawh vawi duailo an thlen a. Kan engineer-te lah chuan engah mah an ngaih si lohah chuan mipui thinrim khap beh theih lohin boruak a kal ta ni berin a lang.

Sawi tawh angina, he khawl hian khu dum ngêk ngûk a chhuah loh nan a oil hman pawh hmang tawh lo turin khawtlang hruaitute chuan PWD hotute hnenah an ngen châmchi tih pawh hriat a ni a. An benga rawngah an thun lo a chek ang chu, tiang hi a thleng ta a ni. He kawng panna pawh mipui lungawi nana siamṭha ve deuh tura khawtlang hruaitute'n an thlen pawn awmzia a nei lo tih hriat a ni bawk.

Engapawh chu ni se, khatiang thil a thlen khan PWD lamin FIR an thehlut a, police chuan a tih tur tiin mi sawm zet an man kha a ni a; nimin piah lawkah an inremna angin FIR an hnûkdâwk leh chauh a ni. Khawtlang thiam loh ni loin PWD thiam loh, khawtlang hruaitute pawhin mipui hriselna atan a him lo tih an thlen ngawih ngawih palzut lui ngat PWD hi inenfiah se.

PWD Minister fel tak kan nei a, he thil hi a chingfel thei turah ngai ila. PWD mawhphurtute thlengin action lak a ngam turah ngai bawk teh ang. Hetiang reng renga mipui hriselna leh zahawmna department pakhat ve maiin an palzût hi a dik thei lo. Chuvangin, Zuangtui khawtlang kha an Barbarian miah lo. An thinrim tawngkhawng kha khawlin an tuar a ni ve mai.

- Lal Rinmawia