ṬBCC hotute interview kha

Zonet Cable TV-a Ṭawngṭai Bethel Camping Centre (ṬBCC) hotupa Pu TT Zohmingthanga (Zohminga) leh Advisory Board member pahnih Rev. K. Lalzuala, Synod Moderator hlui leh Er. C. Lallunghnema, PHED Chief Engineer-a pension-te interview kha uluk takin ka lo en a, a ngaihnawmin a bengvarthlak hle.

YouTube lama Zonet Channel-ah an dah avangin ka ennawn ngun hle a. Zawhna zawttu ṭhianpa Lalnunṭawma Fanai (Manuna tia kan koh) khan zawhna fing leh hrawl hreih hrawih a ngah a, a zawt thiam hle a, a tingaihnawmin fak a hlawh hle.

500 chauh an la thei tawh dawn

Interview aṭanga thil pawimawh tak pakhat lo lang chu ṬBCC-ah hian Advisory Board Member-te pawh hian patient awm hi an tam mah mah an lo ti ru reng ṭhin a. Buaina leh harsatna an tawh ring chungin an ṭha-en tawp a, tun hi an thleng ta a ni.

Ruihhlo leh ruihtheihthilin a tihbuai mi 1,000 chuang zette an enkawl a, an hmunhma pawhin a zo lo a ni ber a, a enkawltute pawhin an enkawl zo hek lo. Tunah chuan mi 500 chin chauh lâk an tum ta a, bul an ṭan ṭha dawn a ni. An hnehsawh ngeiin i beisei ang.

ṬBCC hotupa a dik lohnaah a inpawm

Zawhna zawttu hian a thiam khawp a, a hriat duh point zêlah a luhpui thei a. A dik tâwk lohna a inpawm em tih lam hawia a zawhna chu Pu Zohminga chuan a inpawm thuin a chhang. Hei vang hian ruahmanna thar nen an chhunzawm dawn tih an sawi. Advisory Board member-te pawh hian an capacity tlin tawk patient la tawh lo turin Pu Zohminga pawh an hmin tih an sawi a. Amah Pu Zohminga pawhin 500 chin bak chu an lâk theih tawh loh tur thu kimchang takin a sawi a, CYMA, Excise, adt. pawhin an nawr luih a rin loh thu a sawi. Course rei lutuk, drugs ngawlvei tan thla 12, zu tan thla 10 an tih pawh chu thla 6-a chawhrual vek a nih tawh tur thu an sawi bawk.

Thil thar an sawite hi Board member tam zawkte nen an la sawiho anga an pawm tlan ve phawt erawh a ngai dawn thung. An pawm tura ngaih a ni.

Pawisa leh home mamawhna

Kan ram dinhmun en hian ṭhalai sang chuang rual ruihtheihthil vanga home pakhata an han awm ringawt mai hi lungchhiatthlak deuh a ni.

ṬBCC hi a inziak danin 27.01.2005-a din a ni a, tuna an awmnaa an inbenbel tak takna tur hian Congress hun laia cheng nuai 200 an pêk kha a ni deuh ber ang. Kum tin Krismas dawnin pawisa fai cheng nuai 12-13 vel an dawng niin Pu Zohminga hian a sawi.

Kan society hian ṬBCC ang hi a mamawh tak meuh meuh a, tunah pawh sêlna leh hlauhthawnna nasa tak avangin Pu Zohminga hian mahni thuin a duh chu an chhuak thei a, a duh an la awm zui thei a ti a. An chhuak nasa êm êm a, mi 66 chauh an awm tawh! A chhuakte chu damdawi hmansual vanga thi lo turin a chah. Chhuak zinga pathum chu drugs OD ni ngeia ngaih turin an thi tawh thung.

CYMA, branch YMA, Police leh Excise lam pawhin ṬBCC hi an mi khawmte dah nan an hmang nasa a. Veng chhungah nu leh pate’n an fate an enkawl zo lo a, YMA-te leh Police-te kovin an fate ṬBCC-ah hian an dahtir ṭhin tihte kan hriat a ṭul ve a. Heti tak hian kan mamawh chu a ni si.

Central emaw, foreign emaw aṭangin ṭanpuina an dawng lo. Social Welfare Dept. chuan hmanah chuan ṭanpuina an pe ṭhin a, mahse, an dawng ngai tawh lo. A manganthlak châng a tam dawn teh e!

Sêlna leh anmahni

Pu Zohminga te phur hi a rit em em tih a lang reng a, an hnathawh hi ropui tak a ni. Chutih rualin, an zawh loh mihring an la a, a enkawlna lamah expert an nei lo bawk. Hei mai a ni lo a, security aṭanga medical i/c thlengin addict, tlêma ziaawm tawh deuh an hmang hian inenkawlnaa 'administration' a tichhia tih a hriat. Sawi tur a tam khawp mai.

Buhfai man kha a sawi sual/tam mah mah em

Zonet interview-ah khan Pu Zohminga khan an buhfai eina man zat kha a sawi uar hlek em a tih theih. An hautak turzia leh a enkawltute fakawmzia chu kan hre ṭheuh ang.

Vawi khat chaw eiah Rs 55,080 mante an ei niin a sawi a, a bag-in a sawi avangin a kg zat erawh a hriat loh a; bag 18-te an chhum a, sa an hmehin bag 20 te a zo!

Pioneer canteen aṭangin buhfai bag 1 Rs 1,530-a an lei thu te, a changin BPL quota a tih mai, Welfare Institution quota chu thla 1-ah quintal 132 te an lak thu a sawi. Hei hi kg 1 Rs 6 man chauh a ni.

Pioneer canteen-a a man to hleka buhfai bag 1 Rs 1,530-a an lei anga a insawi ang hian vawi khat chaw eia Rs 55,080 man bag 18 an ei a tih hi chhût chuan Rs 55,080 hian bag 36 lâi a lei theih thung. Bag 18 lêta tam a lei theih, ni khat tla a nih zawk hmel, vawi khat ni lovin.

BPL quota-a thla 1 quota an lak pawh hian quintal 132 an la theiin a insawi a, hei hi kg chuan kg 13,200 tihna a ni a. Buhfai kg. 13,200 into Rs 6 chu Rs 79,200 tihna a nih chu. Vawi khat chaw eia buhfaia an senso a sawi kha chu a dik chiah lo a ang. Ni 2 chhungin buhfaiah Rs 2,00,100 a tih pawh hi a turu mah mah. In chhût thiam tawh maiin a rinawm.

Tlangkawmna

Engpawhnise, Mizoramah hian kohhran leh NGO ten ṭan lak zual kan mamawh hle mai. Drugs la khawih ve lo ṭhalaite ven ṭhatte a pawimawh ang. Ṭhalaite an him nana nasa taka thâ leh zung kan sen zual a ngai a, kan hun pawh kan hman (invest) tam a ngai tak zet e. Awareness nasa leh awmze nei zawka kalpui nasat kan mamawh.

Tuikual Kohhran hian an biak in hnuaiah Recreation Centre an siam a, an entawn tlak hle mai. Mipa 25/26 chu an capacity a ni. Kohhran dang dang pawh hi pawisaah chuan kan buai lovin a lang a, recreation siam hi intihhmuh a va ṭha dawn ve le!

Kan ram hian vei tur dik tak kan vei a hunzia ṬBCC boruak aṭang hian kan hmu fiahin a rinawm. Tun boruak hi kan harh thar leh nana Pathian remruat pawh a ni thei hial ang. ṬBCC ngei pawhin inseamṭhatna atana anmahni vaw harhtu atan an pawm theih phei chuan rah ṭha a thleng mêkah i ngai ang u.

~ Zoa Tlau, Buannel Cabin