Hnam ro hlu museum

Inrternational Museum Day hi kum tinin 18th May-ah hman ṭhin a ni a. International Council of Museums (ICOM) chuan kumin International Museum Day thupui atan ‘The future of Museums in rapidly changing communities’ tih thupui a hmang a ni.

A thupuiin a sawi tum ber chu museum hi tunlai khawvel changkanna ṭhang chak tak karah hian kan cultural identity, kan hnam nihphung kawhhmuhtu leh suih khawmtu pawimawh tak chanvo museum kutah a awm mek zel a. Kuta khawih theih loh (intangible cultural heritage) kan Mizo hnam nuna kan ni tin nunphung te, kan zai leh lâm te leh adt. Vawng him tlattu a ni reng a. Kan ṭhangthar, zirna lama theihna sang taktak neite thiamna hman ṭangkai thiam zel leh information technology hmasawn chak tak mil zela museum tihhmasawn a pawimawh thute an rawn tlangaupui a ni.

May ni 18, 2023 khan International Museum Day lawmna programme a vawi khatna turin 1st International Museum Expo 2023, Pragati Maidan, New Delhi-ah Prime Minister Pu Narendra Modi hoin ropui tak a hman a lo ni tawh a. Mizoram State Museum pawh min rawn sawm angin stall/booth siamin a zu tel ve a ni. Nikuma 2nd International Museum Expo 2024, Science City, Kolkata-a neihah pawh stall/booth siamin Mizo hnam nun lan theihna zuk pho chhuah a ni leh bawk.

Mizoram State Museum hi multipurpose museum a ni a; tunah hian gallery paruk–Zoology, History, Anthropology, Ethnology, Textile leh Archaeology kan nei mek. Object display lai mek hi 789 a ni a, Reserve Collection-ah 3,495 kan nei mek bawk.

Museum-a dah tur kan hnam ro hlute leh thil hlui, museum-a vawn ṭhat chite chu museum-ah dah bel ve zel a ni mek a. Hetiang thil hlu neite chuan paih bo/tiriral mai lo leh mahni maia kawl ṭha bo mai lo va, Mizo zawng zawngte tana ro hlu chhenfakawm kan zavaia kan hmuh leh hriat theih tura Mizoram State Museum-a mipuite hmuh theih tura rawn dah khawm zel turin kan inngen nghal a ni.

Kumin 2025 kum tir khan Pu Vanlallawmzuala Varte, cyclist, India Book of Records leh Asia Book of Records-a hming lanna pathum lai nei chuan a thirsakawr leh record a neihna medal leh certificate hlu tak takte chu mipui hmuh theih turin Mizoram State Museum-ah a rawn hlan a; Mizote tana a inpekna ropui tak hi kan chhuang hle a ni.

Museum bungrua (object collection) lak khawm hna hi ngawrh taka kalpui reng a ni a, mi inphal tak takte zarah hma kan sawn chho zel. Mipui hmuh theiha zirlaite leh ṭhangtharte tana museum-a dahṭhat hi intihhmuh deuh deuh ang u.

Kan hnam nun pholanna hmun a nih avangin Mizoram pawn leh India ram pawn thlengin tlawhtu mi ṭhahnem tak a kum têlin an pung ve zel a. Hmun laili taka awm a nih avangin khualzin hîp hnem ber pawl kan ni awm e. Kumin kum 2025 May thla thleng pawh hian entu mi 5,939 kan nei tawh zingah Mizoram pawn aṭangin entu mi 809 lai an ni.

Research scholar-te leh sikul naupang leh college zirlai tam tak tan zirlai puitu pawimawh tak he Museum hi a la ni reng a. International Museum Day bakah kum tin Museum Week kan hmang bawk ṭhin a, ni khata entu 3,000 chuang neih changte pawh kan nei hial ṭhin. Research scholar-te bakah under graduate leh master degree, state pawna zirlaiten internship tihna atana Mizoram State Museum rawn thlang kan nei kum tin ṭhin.

Tun hmain mi tam zawk chuan museum chu thil hlui leh thil mak dah khawmna angah an ngai ṭhin a, mahse, kum eng emaw ti aṭang khan ṭhangthar tam takin museum pawimawhna an rawn hre chho thar zel a, Mizo culture, custom & tradition hriat theihna hmunpui ber a lo ni ta. ‘The past is kept alive for the future’ an lo tih angin museum hi non-formal education centre pawimawh tak pakhat a ni.

Museum hi hun kal tawh, hmânlai hun leh tunlai hun dawh zawmtu leihlawn pawimawh berte zinga mi a ni ti ila kan sawi sual awm lo ve. Hetiang taka kan hriatna leh kan khawhawi zawng tizautu a nih avang hian museum hi zirna leh hriatna lama min puitu ṭangkai tak a lo ni reng a. Mihringte hian lehkhabua kan chhiar leh television leh cinema-a kan hmuh ngawt ai chuan a taka kan hmuh ngei leh kan experience tawh ngeite hian kan rilru chhungril a luah zawk avangin tunlai zirna lam kawngah pawh zilaite’n museum hi inzirna hmun atan ṭangkai takah an hmang chho ta mek a ni.

Hnam angin Mizote hian museum hi ngaih pawimawhin, ngaihhlut nachang kan hre meuh ṭhin lo va. Tunlai ṭhangtharte leh zirlaite’n ngaihhlut nachang kan hre ve ṭan ta hi a lawm hle. Tun dinhmunah hian museum tlawhtu tam tak hi hnam dang an ni ṭhin.

Hmun dangah kan zin emaw, kan awm dawn a nih chuan, chu kan zinna ram chanchin kan hriat theihna awlsam ber chu museum-ah hmuh leh hriat theih a ni ṭhin. Museum vawi khat kan tlawha kan thil hriatte hi lehkhabu aṭangin kan chhiara kan hre dawn a nih phei chuan lehkhabu tam tak kan chhiar chhuah a ngai hial awm e.

Kumin International Museum Day hi Pathianni-ah a tlak avangin Mizoram State Museum chuan May 16, 2025 (Zirtawpni)-ah a hmang leh dawn a; hemi ni hian en man awm lovin mi zawng zawng museum rawn en turin kan sawm nghal a ni.

- C. Lalruatfela, Curator, Mizoram State Museum, Art & Culture Department