Zoram mipuite hlimna tur MUHCS
Kan sawrkar neih mek ZPM sawrkar chuan healthcare scheme ṭha leh tluantling tura a duan MUHCS chu hman ṭan mek a ni a. A taka mamawhtu leh he MUHCS hmang mek Zoram chhung leh pawn, hmun hrang hranga mite lawmzia leh hahdamthlakzia kan lo hre ve ṭhin a; a lawmawm hle a ni. Hetiang healthcare nei ram, ram changkang zawkte chanchin an sawia thawnthu ngaihthlaka kan lo ngaihthlak ṭhin chu kan ramah, Mizoramah ngei mai kan han hmang ṭan ve der mai chu a ni a, mumang a ang zawk hial chuan ka hria.
Cashless healthcare scheme hi heng USA, UK, Canada, France, Australia, Germany, Singapore leh Thailand te hi a hmang langsar zual kan han hriat theih maite an ni awm e. A nawm bikzia leh a hahdamthlakzia hi an sawi kan hre ṭhin. Tunah pawh a ṭhen chuan kan tem ṭan a, cancer patient-te lawmzia report kan dawng ṭhin. Kei, ngaihtuahna thui vak bik lo pawh hian a tluantlingin private hospital zawng zawngahte hian hmang thei ila, mipui tana a nawm turzia hi ka hisap thiam ve tlat.
Tunah hian sawrkar hospital tih lohah chuan private hospital tlem azawng leh Baptist kohhran enkawl Serkawn Christian Hospital te leh a dang tlemin an la zawm rih a. Private hospital-te intêl khawm hian engtikah nge an zawm ve theih ang tih hi Tlumtea thlir takin kan thlir a nih ber hi maw. Kohhran lian ber damdawi in Synod Hospital, Durtlang pawh hi rilruah chuan a lang lian ve ta hle mai. Durtlang Hospital hian kum tin hian nuaih 200/300 vel chu damlo bill pe thei lo bâ an nei ṭhin a, zawm ve se chu heng bâte hi an nei tawh dawn lo niin a lang. Damlo bill zawng zawng sawrkarin a tum tawh ber chuan a enkawltute phurrit pawh a zâng sawt dawn niin a lang bawk. Phurrit zânna ngawt ni lovin, mipui, harsa zawkte rawngbawlna nasa zawk a ni bawk si. Samari miṭha nih tum ṭheuh ṭheuh, kan va nghakhlel ve.
Kan MLA zahawm tak Pu TBC Lalvenchhunga khan kan private hospital-te hi Delhi leh Mumbai hospital-te inenkawlna rate-in package-1 an pek theih thu kha a sawi a. Tin, hospital tinah cheng nuaih 50 zel invenna atan lo pek lâwk te, chawlhkar tinin hospital bill pek an tum thute leh, thla khat aia rei an bat chuan bat man chawi an huam thu thlengin private hospital-te an thlêm tih an sawi bawk a. Hetihlai hian private hospital lam chuan ni tina sum lut an neih loh chuan an tan inenkawl a harsat thu an sawi pawh chanchin thar puan aṭangtein kan hre bawk.
Engpawhnise, keini mipui lam tan chuan thil han sawi ve viau ngaihna awm hek lo le; kohhran leh politics vela neutral tan hian thil ṭha hi hmuh thiam a lo awl dawn a nih hi ka ti ta deuh. Cashless scheme hi chuan mipui leh damdawi in lama thawkte pawh hlemhletna lakah min veng ṭha viau dawn tih a lang reng mai.
Sawi ṭeuh lo teh ang. Ka mumangah chuan Durtlangah te, Sakawrtuichhunah te, hmun hrang hrangah hian private hospital a lo awm thar ṭeuh mai a, mipui hian kan lo bawr hut hut mai nia.
- Malsawma pa, College Veng