Mitthi vui kan awm dan hi!

Mitthi awm nikhua hian ka lêng tam ve viau a, keimahni khuaah chauh lo, khaw dangah pawh hian thihna avang hian ka kal tam ve ta fût a; hetiang nikhuaa kan awm dan hi chhût ngun a ngai khawp awm e. Ruang awm lai hian inchhung hi hmeichhe chan tur emaw kan ti deuh emaw ni chêk ni, hmeichhia deuh hlir mai hi inchhungah an awm ṭhin a. In chhung lama pa ho lo awm sate pawh hian hmeichhia kian ni awm tak hian kan chhuak leh deuh vek zel ṭhin a, hei hi chu a ṭha loin ka hria. Mitthi chhungte rilru kal ding lutuk tur kaih pên nan kan han zai a, mahse, hmeichhe hlang ringawt chuan zai a lo har fût mai si a, a zai tui theih tlat ṭhin lohte hi inen lêt a ṭha khawp mai.

Hman ni Chhingchhipa mitthi vuinaah pastor, a vuitu tur a han ding chhuak a, a’n hawi vel a, inchhungah ṭhutthleng ruak a awm tam viau mai a, pawn lamah pa-ho an ṭhu ṭhup mai si a. A ngaihdan a ni meuh lo a ni ang, pawn lama paho ṭhukhawmte chu, ‘Lo lut rawh u, ṭhutna ruak a tam a nia,’ tiin a sâwm a. Hetia a sawm pah hian pahote chu zilhhauna angrengin, ‘In lama in hawn chuan mitthi vui hawng tiin, mithi inti vui takin in awm dawn si a, mahse, pawn aṭang ringawt chuan eng in hre bawk si lo,’ tiin a sawi a. A ni tak a, pa ho hi pâwnah kan ṭhu a, mitthi chanchin leh kaihhnawih lam eng sawi awm si lovin, politics lamte leh thil dang kan rilru a awm ang ang kan sawi khawm luai luai a, mitthi vui zawhah kan hawng ve leh ringawt zel a. He kan chîn dan hi chu sim atan a ṭha hle mai.

Tin, mitthi ina kal hian kan hmeichhiate pawh hian inenfiah kan ngai hle awm e. Tam tak hi chu zai hunah pawh zai hauh lova lo awm mai mai, mahni phone lo kheuh lo kheuh maite pawh kan tam viau awm e. Hengte pawh hi sim a ṭha hle mai. Hei mai bakah, tam tak chu mobile phone hmanga thla lo lak phêt tum tawkte hi zuk tama maw le! Mitthi khawharah kan kal a, kan va lenpuite kha lungchhe takin an awm a; chutih laia an hmuh phâk maia lo in pose vel hi chu an tan hmuh a nuam vak chuan a rinawm lo. Kan kal chhan hriain, kan kal chhan ang ngeiin awm tum hram ila a ṭha hle awm e.

Hetih ruala ka sawi duh leh pakhat chu, khawpuiah pawh, thingtlang khaw lamah pawh, thihna avang hian ka kal ve ta fo va, han kal velna khaw tin maiah hian zunram thiarna hmun mumal awm lo hi a ni veiawm ber pakhat chu ni. Vui hun thlen hmain darkar hnih/thum vel te ṭhut a ngai a, mi pangngai tan pawh zun a chhuak hman viau thei a. Hriselna a inchen lo va, ṭhenkhat tan phei chuan zun a chhuak hman fêt tawh ṭhin. Hetih hunah hian han inthiarna mai tur, zun in hmuh tur a awm si lo. Mitthi in bul hnai hriat ngai mang hleih lohte inah zunram thiar dila han luh ngawt maite hi a hrehawmin inthlahrun a na em em ṭhin si a, dil mai loh phei chuan puitling a pumpa zun cheh mai kan hmabak a ni tawh bawk si a, a hrehawm duh kher mai.

Tun hma lam deuh kha chuan khawpuiah pawh, thingtlang khuaah pawh, hmun fâl leh remchangah chuan zun in kha a awm deuh zel ṭhin kha a ni a, mahse, tunah chuan hmuh tur a vâng ta fût mai. Hengte hi kan changkanna ken tel nge maw ni dawn le? Kan intihchangkanna ken tel a nih ngai chuan changkanna kebai a tih theih mai lo maw le?

Kan sawi tak ang khian chhiatnia kal nikhua reng reng hian a hrehawm duh em a, thuneitute pawh hian zun in siam hi uar leh deuh se a ṭha hle awm e a! Tun hma deuh lawk, tlem lai deuh khan khawtlang hruaitu ṭhenkhat sawi dan khan, ’Zun in siamna sanction a awm tawh ngai lo,’ ti te khan an sawi a. Hengte hi tak tak a nih ngai chuan kan hmasawn tum dan hi a Pharisai hle awm e, ka ti mai mai ṭhin. Hetiang a nihte chuan Chhurbura thawnthua Mawngping khua ang fang leka insiam kan tum a ang awm em mai a!

Kan sawi tak ang khian mitthi ruang awm lai hi chuan pa ho pawh hian inchhung lam hi i luahlum ve deuh teh ang u. Keini Mizo hnamte chu khawhar lenpui a, zaia inhnêm ṭhin kan ni si a. Nu ho ringawt zawng zai tui a har em mai a, a inpawlh tawk deuhin pa ho pawh awm ve hram i tum teh ang u; kan len chhan ang ngei hian. Chutih rualin, nangni nu ho pawh, in chhung an khat tawh tih hre reng chung pawhin inzeh luh hram tum ni awm taka in la awm ṭhin hi sim ve bawk u la, pawn lama lo awm ve maite pawh thiam tum ve bawk teh u, tiin ka’n zilh ve hlek teh ang che u.

- Patrick Z, Chhingchhip