Lirtheia intlan pelh dan Over taking prohibitted in certain cases: (As per The Rules of the Road Regulations 1988 Section 6)

Kawngpuia lirthei intlan pelh hi a him leh remchang têah lo chuan tih mai mai phal a ni lo. Chutiang bawkin a him leh remchangah chuan aia hmanhmawh zawkte intlan pelhtir phal lova tihbuai hi phal a ni lo bawk. Intlan pelh hi eng vang pawhin a ṭul thei a; amaherawhchu, pawngpaw intlan pelh mai mai chu a hlauhawm a, accident a thlen phah fo avangin danin intlan pelh dan fel takin hetiang hian a siam a ni.

i) Hmun him leh kawng zau lai, hma lam fiah taka a lan theihna hmunah chauh lo chuan intlan pelh hauh loh tur a ni.

ii) Lirthei tlan pelh tur (being overtaken) khalhtuin a him e, tia kian chunga tlan pêl tura signal a pek hunah chauh hmaa mi tlan pelh tur a ni.

iii) Hmun him lo, kawng kawi leh kual laiah te, mahni tâwk zawnga lirthei dang lo tlan laklawh laiin intlan pelh loh tur a ni.

iv) Lirthei pakhatin lirthei dang a tlan pelh lai mekin a tlan pêl mektu lirthei chu lo tlan pelh ve leh chhawn loh tur.

v) Hmaa mi tlan pelh tur lirthei khalhtuin pêl rih lo tura signal a pek chuan tlan pêl ṭan reng tawh mah se, ṭhulh leh tur a ni.

vi) Intlan pelh nan harsatna a awm lo chung pawha aia hmanhmawh zawkte inpelhtir phal lova dan luih emaw, tlan pelh laia lo tlan chak ve sauh phal a ni lo. A hlauhawm a, chetsualna thlen phah theihna a ni.

A chunga sawite hi kawngpuia himna atana intlan pelh chungchanga dan chu a ni a, zawm ngei tur a ni. Dan zawm loh vang te, a him leh him lo pawh sawi lova pâwngpaw intlan pelh bawrh bawrh vanga accident rapthlak tak tak kan tâwk tam ta hle a. Dan hriaa zâwm chung leh fimkhur taka lirthei khalh ṭhinte'n an pumpelh thil ṭha lo hi dan hre lo leh zâwm lote'n kan tawng baw ṭhin a ni ber mai.

Lirthei hi mahni duh dan dana khalh theih a ni lo va, dan a awm a, chumi dan ang chauh chuan khalh ṭhin tur a ni.

- PC Hmangaihzauva