CM a khawhar rei ta em?

Nikum May thla bul lam khan 'Chin Baptist-in CM khawhar an hnem' tih kha ka ziak a; khami lam kaihhnawih bawk kha ka han ziak ve leh ta ngawt a nih hi.

COVID-19 hripui len lai kha Pu Zoramthanga chief minister a nih lai kha a ni a. Kan Mizo zepui rawn lang chhuakin, thingtlang leh khawpui kan inṭanpui tawn mup mup kha a ni a. Chu bakah, Chief Minister Relief Fund kha pawl chi tin mai aṭang khan a lut a, a ropuiin a lawmawm hle; kan la hre ṭheuhin a rinawm.

Kan han inthlang zo va, ZPM-in sawrkar an han siam tirh lam khan CM Relief Fund kha a lut ṭha leh hle a, mahse, rei lo teah a hân ta deuh thuai a. Chumi hnu deuhah USA lam Chin Baptist ho khan an rawn pe ve leh ta kha a ni a; chu chu a nia, Chin Baptist-in Chief Minister khawhar an hnêm, ka han tih kha.

Vanglaini chanchinbuah hian ṭhalaite’n thisen an pek te, CM Relief Fund pe an awmte hian kan lo hmu ṭhin a. Thisen pek (blood donation) chungchang thu hi chu a khât tawkin chhiar tur hi a la awm reng a, chutih lain, CM Relief Fund pe thâwm hi chu a reh rei ta riau. Hemi kawngah hi chuan kan CM hi a khawhar rei ta riau mai. Kohhran, pawl ho leh mimal te pawh kan chêt deuh a hun ve leh ta viau em le?

Kan hriat ṭheuh angina, kan ramah hian chhiatna chi hrang hrang kan tawk ṭhin a. Tlang rama awm kan nih avang hian fûr khat chhung ngawt pawh hian lei min/ tawlh avanga chhiatna kan tawhte hi a tam ṭhin a ni. Accident hrang hrang avanga chhiat tawk kan awm reng bawk.

Sawrkar hnathawk–pawl ho, NGO, kohhran leh mimal te pawh kan chet chhuah leh a hun ta viau mai, Relief Fund-ah CM hi a khawhar rei ta mah mah e.

- Rev. Biaka Chinzah