Ruihhlo ngai enkawlna hmun ṭha ber

Kan duh emaw, duh lo emaw, tunlai titi pui ber chu ruihhlo leh a ngaite enkawlna chungchang a ni awm e. Mi pangngai tan chuan ṭanna lam tur hriat thiam a har hle. Keimahni min effect dan aṭang ṭheuha tehin thutlukna kan siam ṭheuh mai niin a lang a, kan demawm hran lo ve. Mitthi in titi pawh a luah hneh viau mai a, kei pawh mitthi in titi aṭangin a ni he rilru keimaha awm hi a lo pian tak ni!

Mahni inhnek hi mi dang hnek pah hian tawrh a ziaawm duh deuh a. Rawngbawltu kan nihna anga kan mawhphurhna a tamzia hre rengin sorkar lamte pawh han nêk tel hi a rem ṭhin a; anni nêk an lo nuam ṭhin a, an kovah hian han bun leh thâwr phawt mai ṭhin ila!

Ruihhlo ngaite enkawlna in hi dan mumal tak hnuaia tih ni se ka ti ngawt mai. India sorkar laipuiin fahrah châwmna in leh a enkawl dan, worker pattern leh chaw leh chawhmeh leh a enkawltu qualification thlenga dan a nei ang deuh hian, ruihhlo enkawlna in hi mahni duh dan dana tih loh deuh theih ni se a duhawm khawp mai a lo nih hi.

A tirah hmangaihna nen liau liauva dinin, a hmingte chu han phuah mawi viau ṭhin mah ila, hming ṭha elkhên Gabriela ten drugs kan addict leh tlat si ṭhin ang deuh hian, eng eng emaw thlir hian mihring hi kan kal ngil lo leh mai ṭhin. Sum leh paite a lo awm deuh a, bank saving chhiar tham a lo nih hian Pathian lama chhêk khawl lova bank lama chhêk khawl mai duhna a lo awm leh ṭhin zawng a nih hi. Mi ṭhain misual an vei tur a nih laiin, misual leh misual kan lo inkhung khawm mai palh ang tih pawh a hlauhawm thei rum rum mai! Chuvang chuan, sorkar lam hian dan an siam chak deuh pawh a ngai hle ta niin a lang.

Khawhar in titi, ka lo ngaihtuah ngai hauh loh lam zawk hi ka sawi tum tak chu a ni a. Kha titi ka ngaihthlak aṭang khan, ‘Addict-te hi eng vanga jail-ah te, addict center-ahte dah nge kan nih?’ tih lam hian ka rilru a luah lian ta em em mai a. Ka nau chiah hi a addict ve ṭhin a, kan farnute thuamhnaw te, ka pain in hnuai siamna tura a dahṭhat thingzaite kha a bo ve deuh reng mai ṭhin a. Mahse, ka nu leh ka pa kha an lo ropui mang e ka ti; ka nau kha nuam ti takin in chhungah a awm a, addict a ni tih mai bak kha chu mihring nunphung pangngai takin, chaw ei hun bia eiin kawng engkimah mi pangngai khawsakin a khawsa thei tlat. Ṭum khat phei chu an ṭhianpa OD thihnaah khan a addict-puite thlalaknaah a lo han tel ve a, a lo haw chu kan sawihova kan nui dar dar nghe nghe. In chhung erawh a tlaran duh viau mai!

Kan fate addict, kan enkawl ṭhat theih loh enkawl ṭha tura mi dang kan beisei dan kawng thute hi chhût chian a ngai deuh em le aw? Khawhar in titi tupa chuan hetiang deuh hian a sawi a, “Kan ning a, kan khawsakpui peih loh avangin jail-ah te, center-ahte kan dah ta chêng a, kha hmunah khan an hrehawmin kan rilru a na leh si,” tiin.

Ka ngaihtuahna a kal thui hle mai. Addict-te pawh hi bâwm khata khung khawm tawp chi chu an ni lo vang tih te, a ṭhente chu chhungte tan chuan kawng dang awm miah lo, jail emaw, center emawa an awm mai loh chuan an nunna chân mai hlauhawma awmte pawh an awm ngei ang tihte pawh ka dâwn thleng a. Chutih rualin, a ṭhen hi chu chhungte kianga khawsa a, hmangaihna nena duat taka enkawl chung zela zawi zawia siam ṭhat theihte pawh an awm thei bawk ang.

Eng pawh ni se, a bul lama kan sawi tawh angin, kan tunlai titi chu sawi thiam a har, ṭanna tur lam hriat a har a ni ber e. Amaherawhchu, ‘Ruihhlo ngaite enkawlna hmun ṭha ber chu mahni in chhung a ni’ a tih kha chu a dik thui khawpin ka ring a ni. A theih chhung chu mahni in chhungah, duat leh hmangaih takin enkawl ni ta se la a ṭha berin a rinawm. Chutih rualin, chhungkaw mumal nei lote pawh addict zingah an tam viau thei ang. Chuti ang mite chu center/home lamahte emaw enkawl ni ta se la, invuipui luai luaite hi chu a kiam deuh mahna maw le!

Ruihhlo ngaite enkawlna hmun aṭanga ṭha chhuak, Pathiana piantharna tluantling leh tlo nei ta an awm meuh loh thu an sawi te hian thinlung a chhun na viau mai a. Tunlai mihring hian zahna hi kan bosal tawh em avangin, piangthar em em lova zahna kâwna zak miah lova kal tlang mai thei, thar em em lem lo pawha han inhlan mai thei te hi kan awm ṭeuh tawh avangin piangthar hrilhfiahna kan han siam ṭhinte pawh revise a ngai ta fo mai a nih hi. Piangthar hrilhfiahna mumal tak hi nei thei ila chu, a sual hlei hlei hi a piangthar ṭha ṭha pawh an ni thei mai thei a ni. Hei hi hre fuh thei ila chuan, in chhung ai chuan camping center-te hi ruihhlo ngaite enkawlna ṭha tak chu an ni theiin a rinawm!

- Rev. Jh. Za Hluna (Paula Pu)