Law & Order kengkawh ngam lo sorkar kan hrawn mek (Sorkar bungrua tichhetute chunga action lâk ngam lohna state Mizoram)

Hun a inher liam hlek a, kan ngaihthah zui mai zel a; thil thleng sawi zui loh leh ngaihven zui loha zûzî hi kan hnam ziaa bet tlat hi a ang ṭhin. May ni 7, 2025 zan khan Zuangtui khawtlang mipui chuan PWD Complex, Zuangtui chhunga Aizawl khawpui kawng siam mekna Hot Mix Plant (kawngpui siamna bitumen leh a dangte pawlhna khawl) chu suasamin an tihchhia a, an hâl a ni.

A tuk May ni 8, 2025-ah PWD leh khawl buntu Sky Builders, Nidhi ten Bawngkawn Police Station-ah first information report (FIR) an thehlut a. He thil sual titute hi zawng chhuaka man tura 'report' an ni. Police-te’n PWD-te FIR bawhzuiin Zuangtui khawtlang mi, he thil thlenga rinhlelh mi sawm panga (15) thu zawhfiah turin an man nghal.

Sorkar bungrua tihchhiat leh hremna dan

Mizoramah hian sorkar bungraw tihchhiat hremna dan khauh tak 'Prevention of Damage to Public Property Act, 1984' kan nei a. He dan chiang taka bawhchhetu Zuangtui khawtlang mipuite hi dan anga hrem tur an ni a, sorkar hian a hrem ngei ngei tur a ni. A hrem leh hrem loh chu sorkarin law & order a kenkawh ngam leh ngam lovah a innghat a; sorkar department leh hnathawktute thlavang a hauh tur a ni bawk.

He dan hnuaiah hian sorkar bungraw tichhetute chu kum 5 thleng jail tâng (up to five years imprisonment) tura hrem theih an nih mai bakah, an bungraw tihchhiat hû an chawi tur tih a ni.

Hrem ngei ngei tur ngaihdam

PWD Hot Mix Plant-in khu a siam leh a chhehvela chengte (PWD-in ram an neih hnu fêa cheng an ni a) harsatna chu kan hre awm e. Chu zawng ai chuan Zuangtui khawtlang chêt dan hi dan bawhchhiatna nasa tak a ni a, heti chunga sorkarin hrem ngam loa a ngaidam ngawt hi a him lo a, sorkar kalphung hi a dik lo a ni.

May ni 14, 2025 khan PWD Engineer-in-Chief Mini Conference Room-ah PWD official te, Zuangtui Local Council leh Zuangtui All NGO hruaitute an inkawm a, Joint Press Statement an siam a nih kha (IPR Press Release 596/2025-2026).

Mipui tana hnathawk mek, Aizawl khawpui kawng siam mektu, kan nghahhlelh em em hna kal lai titawp vek thei tura PWD Complex chhunga luta hna thawhna siamtu ber Hot Mix Plant an tichhia hi hrema chawitir ngei ngei tur an ni.

Tum rêng vanga sorkar 'PWD Complex' luhkhunga mipui rawngbawlna hna thawk mektu zah pawh zah lova tichhetute pawh sorkarin an chunga 'action' a la ngam lo hi a zahthlak a, a him lo bawk. Sorkar hnathawk leh mipui thlavâng hauh ngam lo sorkar kan hrawn mek hi a lungchhiatthlak a ni.

Zuangtui Local Council leh All NGO ten FIR hnuhkir a nih theih nana an dilna te, ngaihdam an dilte hi chu a Mizo a, an tih tur tak pawh a ni awm e. Mahse, ti teh ang, 'Law will take its own course' an tih angina, dan anga kal mai tur a ni. Chumi kengkawh tur chuan sorkar kan nei a, mahse, sawrkar kan neih hian he 'Kalphung thar' an tihah hian misual, thil sual titu hrem a ngam ta lo a nih hi. A ngam chinah erawh a che na viau mahna!

Hot Mix Plant tihchhiatte chu

Hot Mix Plant thîr chhah tak chu han tihchhiat ngaihna vak a awm lo a, a behbawm a control-na te leh hna thawhtirtute an tichhe nual a.

PWD leh Sky Builders, Nidhi ten FIR an thehluha an tarlan danin, Zuangtui khawtlangin an tihchhiatte chu: Hot Mix Plant control cabin unit, air conditioner (1 ton), hot mix plant mixing drum, hot mix plant wiring zawng zawng, mixing rum motor, cilinger motor, vibrating motor, feeder motor, filler motor, hot mix plant jection box, grease gun & tool box, solar light, decanter control panel leh decanter diesel pump te a ni.

Tlangkawmna

Zuangtuia thil thleng hi darthlalang pawimawh tak a ni awm e. Political party ṭhenkhatin FIR hnûk kîr tur ten thuchhuahte an lo siam thûl.

Dan bawhchhiaa sorkar property tichhetu, mipui harsatna siamtute thlavâng hauh kher hi a ṭul lêm lo e. PWD hian hna thawh theih hun laia Aizawl kawngpuite hi mâm taka siam an duh em em a, an bungrua suasamtute laka FIR an thehlut hi an tih tur dik tak a ni.

Hetianga law & order lekkawh mumal lo sorkar kan hrawn mek hi a vanduaithlak a. ṬBCC lam ni se, khawtlang buaipui luih luih a ni mek bawk. Hmasawnna lam hawiin dan leh hrai lalna hnuaiah i inrêlbâwl leh tawh teh ang u.

~ Zoa Tlau , Buannel Cabin