Forest Department hian eng nge an thawh
Environment, Forest & Climate Change department hi ramngaw humhalh, ngaw siam thar leh nungcha humhalh hna thawk tura ngaih an ni a. Hetihlai hian, hna thawk ve reng nia kan ngaih laiin kan ramngaw chereu nasa lutuk hian eng nge an thawh tih hi zawhna lian tak a ni.
Mizoram chu tlang ram lo neia eizawng kan ni a. Kum tin ramngaw ṭha kan vât darh a, kum khat eizawn nan kan hmang a, kan kalsan leh mai a. Kan ramngaw vah chereu kha ram ngawa siam leh turin Forest department kan beisei a, mahse, chutianga kan ram vah chereu han tihngaw leh an tum bau lo.
Mizoramah kawngpui sialin ramngaw an ṭhiat nasa em em a, chung ramngaw an ṭhiah khuh leh nan leh ramngaw siam leh nan he department hian pawisa (compensation) tam tham tak tak a dawng ṭhin a, khawiah nge an ramngaw siam leh chu a awm. Tuma'n kan hmuh pawh a rinawm loh.
Compensation sum hi khawiah emaw chuan eiruk leh officer liante insem mai maiin a ral a ni mai lo maw? Kum tin Green Mizoram Day kan hmang a, kan hma lawkah pawh kan hmang leh dawn. Kawngpui sira thing phun kha kan duhtawk leh mai mai hmel a, sum erawh a kal ral hnem leh ngawt ang.
Central aṭanga ramngaw leh nungcha humhalhna tur pawisa pawh kan dawng hnem tawh viau ang. Mahse, a hmanna tur dik takah kan hmang lo tih chu kan ramngaw chereu dan aṭang hian a hriat a ni.
Hetiang lo hian hmân hmânah khan hmalakna chu awm se, heti em em hian ramngaw a chereu lo mai thei a ni.
Tlang ram lo neihah an thlai chin karah thing ṭhang duh chi leh thei hrang hrang phun tur pe ta se, kum khatah a enkawl nan kûng khat atan Rs. 100 zel pe bawk se. A kum lehah chuan kum 5 chhung kum tin a bul an sâm faina tur kung khatah Rs. 200 zel pe ta se. Thingtlang lo neitute tan pawh a phûrawm ang a, sum tam tak an la lut ve bawk dawn a ni.
Hetiang hian kum 20 kal ta aṭang khan lo tih daih tawh chu ni se ramngaw chereu tur nasa takin a veng ang. Lo neitu thing leh thei phuntute pawhin an thei rah eizawn nan nasa takin an hmang ṭangkai ngei ang. Chutiang ngaihtuahna chu kan Forest officer kal tate khan lo hmang tawh se chu ramngaw kan la nei ṭha deuhin a rinawm.
Ramngaw siam nana kan sum hman hi engzat tak maw thawktute account-ah lut tawh ang maw!?
- Lal Rinmawia