Two wheeler taxi fimkhur rawh se
Aizawl khawpui chhungah leh district khawpui dangah two wheeler taxi a service mek a, mipui pawhin kan ṭangkaipui viau. Taxi pangngai aiin a rate a tlawm a, kal duhna thlen hma pawh a awl zawk a; hei vang hian mipuiin kan hmang nasa a, ṭhil ṭha tak a ni.
Hetih lai hian, Aizawl khawpui hi lirthei a pun nasat em avangin kawng a tâwt em em a, two wheeler pangngai pawh pung nasa tak a ni. Hetiang khawpa chêpah pawh kan polite tlang a niang e, intihpalh pawh a khât viau a; lirtheiin khawpui chhungah mi a sut palh emaw, chil hlum hial emaw a awm khât hle. Hei hian lirthei khalhtute hawihhawmzia a lang. State dangte angin horn kan hmet ri chuah chuah lo ringawt pawh hi a ṭha a, mi tam takin 'Silent City' tiin an sawi hial a ni.
Lirthei a pung nasa a, khawpui chhung kawng a ṭhang ve dêr si lo a; chuvangin, lirthei khalhtute kan fimkhur zual a ngai hle. A bik takin motor sir dinglamah two wheeler kan tlan tlangpui a, chhutih lai chuan two wheeler taxi khalhtu ṭhenkhat khalh dan erawh a hlauhawm ṭhin hle. An hmaa intlar diat diata kalte veilamah an lehpêl a, line pangngaiah an lut leh zuk zuk fo. Hei hi chîn miah loh tur a ni a, mahse, two wheeler taxi khalhtu ṭhenkhatin an ching a, chuhhelh vang leh polite loh vang a ni. Traffic police pawh hian kawng laklawhah hetiang lirthei polite lo taka khalhtute chu lo tiding se, lirthei khalh dan mawi lo hrilh fo se a duhawm.
Two wheeler taxi khalhtu ṭhenkhat chuan an hmaa lirthei dang, four wheeler-te veilamah lehpelh an ching a, a hlauhawm hle a ni tih hre mang lo an awm fo. Hei hi danin a khap tlat piah lamah, mi dang tan a hlauhawm em em. Hetiang tih ching hi two wheeler taxi khalhtu zawng zawng an ni lo, a mâwl fâl bik an ni a, hlauh nachang hre lêk loin an tlan pur pur zel a ni. Aizawl Two Wheeler Taxi Association hian an member-te fuih fo se a ṭha ang.
Two wheeler taxi khalh zingah raltlan leh state pawn mite an awm niin an sawi a, enfiah a ṭha khawp mai. Traffic police-te hi an indaih lo viau chungin heng ho control tur hian ṭan han la leh sauh sauh teh se.
Tin, chuan man chungchangah pawh two wheeler taxi hian dan an bawhchhe nasa viau, taxi pangngai pawh an bâng bik lo. An rate hi sorkar rate bituk let fê a ni tlangpui. City bus erawh 'fare' ah hian an 'fair' viau thung.
- Lalkhirhvela