Zu zawrh leh fiahna!

Kristian ni sia Baibul zirtirna anga nun tum lo ber, Baibul zirtirna chu bang tarmawia hmanga kan ni tin nuna nunpui tum lo ber kan nih ngei a rinawm. Sakhaw dang betute laka Kristiante danglamna chu Isua'n a dam lai khân heti hian a sawi a, ‘Chinghne zinga beram no awm angin ka tirh che u hi,’ tiin! He kan awm dan tur nia Lal Isua'n a sawi hi; Zoram mipuite (Kristian intite) chuan tlanchhiatsan daih a, chinghne hnawh bo kan tum ngar ngar mai zu nia!

Eden Huan ata tawh Pathianin mihringte kianga awm ve reng tura a siam, phalna a pêk thlap chu sual leh a hmanruate hi a ni. Englai mahin Pathianin a mite lak aṭangin sualna leh a hmanruate hi hla taka dah sawn daih a tum ngai lo! A mite a fiahna hmanrua an ni zawk si a. Huang khata tlattir za a, a mite fiahna hmanrua atana a hman, chu fiahna paltlang zo leh zo lote aṭanga a mi leh sa dik tak hriat tumtu Pathian nei kan ni tlat a ni.

A chhia leh a ṭha hriatna thing, ei vaih chuan ei ni là lâa thihna ni si kha, Pathianin mihring a siamte lak aṭanga hla taka dah bo ahnêkin huan lai takah a langsar thei ang berin a dah tlat a nih kha! Zoram Kristiante tana a chhia leh ṭha hriatna thing rah chu–zu te, duhâmna te, mipat hmeichhiatna leh help rûknate a ni tih kan hre thei lo. Zoram Kristiante hriat ṭhelh lian tak ni fo chu, rinna avanga khawngaihnaa chhandamna changtute reng reng, a tana mi hman tlak an nihzui zel dawn leh dawn loh, rah tam taka rah tur an nih leh nih loh hriatna turin, fiahna a paltlangtir ngei ngei tih hi a ni.

Jeremia chuan Pathian chu chhûngril lam leh thinlung fiah ṭhintu a nih thu sawiin, "Mi hmu a, i lamah ka thinlung i fiah ṭhin," tiin a sawi a. Rinna pa Abrahama kha Pathianin mal a sawm hnuah, "Chung thil hnuah chuan Pathianin Abrahama a fiah a" tih thu hian ringtute Pathianin a fiah ngei ṭhin thu min hrilh. Timothea kaltlangin, "Tin, chungte pawh chu fiahin awm hmasa rawh se, chu mi hnuah sawiselbo an lo nih chuan kohhranho rawngbawl lam hna thawk rawh se" tiin, fiahna paltlang zettute chu rawngbawlna lama ke pên tur an nih thu kan hmu bawk. Heng thute han en hian, Zoram ringtute'n fiahna paltlang aia fiahna hmanrua dah bo kan tumna dik lohzia min hriattir a ni.

Mizote nuna bet tlat zu hi Kristianna kan rama a rawn luh khan Pathianin kan hnam nun aṭanga hla taka min dah bosak a tum ngai lo. Kan hnam a fiahna hmanraw pawimawh takah a hmang ta zawk a. Zu ruih bûng bûngna chu sual a nihzia leh chapona chawk thotu a nihzia, zu ruih hmangte chu vanram kai lo tur an nih thu hmangin, a chhia leh ṭha hriatna thing rah ei chu thih ngei ngeina sual a nihzia thu ang khan min vaukhân ta zawk a. Keini erawh chuan kan kiangah zu awm reng mah se, zu hmanga fiahna paltlang tum ai chuan, zu zawk dah bo kan la tum hlawhchham ta char char a nih hi!

Khawvel thlirna aṭang chuan zu hian mimal leh chhûngkua a tihbuai êm avangin khap hi thil tih âwm tak a nihna lai a awm ngei e. Mahse, kohhran berin zu hi sual tinreng bul ang maia do a, Pathianin a mite fiahna hmanrua ni tur ve renga he leia a dah a nihzia thlarau mita hmu fiah pha si lovin, englai pawha do rêm tuma hmalakna a lo phûrpui em em reng hi zawng, a thutlukna siam sual a ni reng fo dawn a nih hi.

Pathian chuan a mite a fiah ngei ngei ṭhin. Mahse, fiahna tlansan zawnga inzirtir (a lang chuan kan inzirtir hauh lo, kan thil tih hmang zawkin kan infuih si) ta reng reng chu, khawvela Kristian duap ber, ruah leh thlipui mai maiin a do hneh theih ringtuah kan chhuak ta mawlh mawlh mai a nih hi. Zoram Kristiante tan chuan zing taka ṭawngṭai tura biak ina kal te, zankhuaa ṭawngṭai tlaivar te, Nilai zana inkhawmte hi fiahna pawh ni pha lo. Ringtute tih âwma mawi ve reng zawk ni si hi fiahna khirh tak ang maia kan paltlang zawh loh an han ni ta ṭhin a nia, Pathian mi hman han chhuak zawih zawih tur hi kan awm mawlh lo e!

Federick-a ten kâr khat, ni 21 chuangte chaw nghei ṭawngṭaia Pathian fiahna an paltlang kaltlanga thlarau ruai an buatsaih chang tura phûr taka kal ṭhinte hian, mahni ngeiin Pathian fiahna paltlanga thlarau lam malsawmna chan tumna kan neih si loh avangin, Pathian mi hmante hun hman a zawh rualin kan thlarau nun a hniam nghal zel a. Mahni ngeiina fiahna paltlang lo chuan thlarau lam malsawmna a chan theih loh tih kan zir chhuak thei mawlh lo a nih hi!

Kan ramah hian kawi tinah zu changkang leh mit la tak tak zuarin, pisa tinah eirûkna hun ṭha leh remchang inhawng mawlh mawlhin, thlêr tinah mipat hmeichhiat hman khawlohna hun inhawngin, sumdawnna hmun tinah hlêp rûk theihna hun awm mawlh mawlh mah se, Joba angin heng Pathianin amah ringtute a fiahna hi paltlangin, mei fiahna kal tlangtu rangkachak ang maiin ka thianghlim zawk ang ti ngam Pathianin Zoramah hian a zawng mek a ni.

Ama mite a fiahna hmanrua tur dah bo tuma hmanhlel ringtu, an mi leh sate fiahna tur hmanrua dah bo tum tlat kohhran hian, Pathian mizia zir chiang leh rawh se. Khawngaihnaa chhandamna changtute hian van ram kan kai vek dawn lo! He thu pawh hi kan inzirtir ngam lo leh zel a. Israel fate kha Aigupta sal aṭangin an zavaiin, an tih tel miah lovin a thlawnin hruai chhuak vek mah se, thlalera fiahna paltlang zo mi pahnih chiah, Josua leh Kaleba bakin ramtiam an lut lo. Anni bak ram tiama hruai luha awm zawng chu thlalera piang, fiahna hautak ber ber hmachhawntute chiah an nih kha.

Zoram kohhrante kan harh a hun ta e. Zu hi a do zawng leh a khap beh tum zawngin Pathian remruat dan kalhin i khawsa fo tawh lo ang u. Eirûkna, duhamna bawlhhlawh leh mipat hmeichhiat hman khawlohnate nen Pathianin a kohhrante a fiahna hmanrua an nih zawkzia, kan tana chinghnia an nihna inzirtirin, heng fiahna paltlangtute chuan thlarau malsawmna an dawn ṭhinzia leh, Pathian mi hman tlak an lo nih ṭhinzia kan inzirtir a hun ta zawk e!

- Lalremliana Pachuau