Zirna sang zawk chhunzawm tumte ngaihsak an ngai
Sawrkar laipui chuan India rama zirna sang (higher education)-a zirna chhunzawm tumte tan dik leh langtlang taka admission tih a nih theih nan huang khata inelna (common entrance) a buatsaih ṭhin a. Heng–IIT, medical, management, university leh zirna sang danga lut turte tan inelna buatsaih tur hian National Testing Agency (NTA) kutah a dah a; NTA chuan inelna hrang hrang buaipui turin ION digital a hmang leh chhawng a ni. A bik takin college leh university-a lut turte tana Common University Entrance Test (CUET) pe an tam thei hle. Online exam a nih avangin computer mamawhna a sang em em a ni.
Kum 2024-a MBSE hnuaiah chauh (supplement tel loin) pawl 12 pass chu zirlai 9,227 an ni a, kum 2025 chuan zirlai 9,817 an ni. CBSE leh state pawna zirlaite nen phei chuan zirlai sing chuang fe kum tin pawl 12 pass thar kan nei tihna a ni.
Heng kan zirlaite hian India ram khawpui lian leh zirna hluna kal ve duhin entrance pek duh mah se, Zoramah exam theihna seat kan neih tam theih loh avangin entrance exam tur ringawt hian cheng tam tak sengin India ram hmun dang an pan phah fo a, a ṭhente phei chu an exam loh phah hial bawk.
Kan zirlai thiamna duha zirna sang zawk chhunzawm tumte hi kan sawrkar hian ngaihvenin ngaihsak se ka duh tak zet a ni. Department officer ṭhenkhatte’n ngaihven deuh ṭhin mah se, a concern department–Education/Higher & Technical phei hi chu an la muthlu nasa em em a ni.
Kuminah hian exam centre 3 kan nei thei hram a, Agape Computer Centre Institute, MZU leh ION Digital Centre te a ni. Henga leng lo zawng zawng chu Silchar thlang lamah sem sawm an ni ta a, a hautakin a buaithlak em em. Department hall emaw, computer facility nei ṭha deuhte hi sawrkar hian exam centre atan ruahmanna han siamsak se la, kan zirlaite hian rilru zalen leh insengso tam loin ṭha zawkin exam an pe thei ngei ang le.
Aizawl chauh pawh ni lo, chhim lam district 4 aṭang pawhin kum tin pawl 12 pass zirlai 2,000 chuang an awm ṭhin a. Sawrkar hian Lungleia computer facility nei ṭha deuhte hi han ruahman se la, awlsam zawka exam thei an va tam dawn tehlul em.
A tawp berah chuan, exam buaipuitu ION emaw, exam buatsaihtu NTA lama ngen hian kori a tu vak lo niin a lang a. Exam-na seat kan neih tam chuan seat kan nei tam mai dawn tih hriain, chumi ti thei tur chuan kan sawrkar hian hma han la se la, concernt department secretary emaw, director emawte kaihruaiin exam seat kan neih tam theih nan theihtawp chhuah ngei turin zirlaite aiawhin ka phût tlat a ni.
- Joseph Lalhimpuia, Ex MLA