TBCC mualpho ṭum khatna leh ṭum hnihna hi sawrkar thiam loh ve ve a ni

Thuhma

ṬBCC chungchangah content duh vanga youtuber chhuak thar (kan mamawh belh tawh loh teh lul nen, thil thleng lian deuh a awmin kan neih belh zel a, a pawi e!) kan neih belh ṭeuh.

ṬBCC sawiseltute sawisel ve leh chhawngte nen lam inhmuhmawhna a tam tawh a, chu lam hawi chu sawi lo ila. ṬBCC-a mi an thi ṭhin leh, hur sualna hmanga khuaikhem tawk nia insawite an awm avangin, 06.05 2025 khan ṬBCC chhui chiangtu tur inquiry committee din turin Social Welfare Director hnenah ziakin ka thehlut a, an chhui chian duh loh chuan an thu ni se. He welfare state hi a welfare lo hle tihna a ni ang a, kan tualzal nunah social welfare ni loin, social injustice a tlangnel zawk tihna pawh a ni ang.

Kei pawh ṬBCC an sawiselna a dik leh dik loh chhui chiang tura thuneitute hnena lehkha ka thehluh vang ngawta min hmu mawh an awm a, a pawi lo. Zu leh ruihhlo ngawlveina te, hur sualna te, hausak thut duh vanga dan phal loh thila sumdawnnate leh hlemhlêtnate hi ram inrelbawlna felhlel rah chhuak a ni a. Kohhran hoin social justice a ngaihthah vang a ni bawk tih hi Bible-ah a inziak chiang em a, ka hnual chuang lo.

Mipui/sawrkar hnathawkte hian eng nge an tih ṭhin? Social welfare department hnuaiah zu leh ruihhlo ngawlveite enkawl lama mawhphurtu, mahni inrelbawl hrana office changtlung tak nei, thawktu pawh eng nge maw zat awm Mizoram Social Defense & Rehabilitation Board (MSDRB) hian ṬBCC mualpho ṭum khatna leh ṭum hnihna inkârah eng nge an tih ang tih ka ngaihtuah fo ṭhin a. Engati nge hma an lak sawk sawk loh? MSDRB nen hian building khat kan luah ho tawh a, de-addiction centre dintute training an pe ṭhin a, ṬBCC an tel ve ngai lo a ni mai thei. Kum khata MSDRB tana sum ruahman (budget) engzat nge ni ang, a beitham viau ang em? Phullem phah ai chuan mihring hi a pawimawh zawk tih hria ram hruaitu kan neih chuan a beitham lutuk lo ang. Tin, hnathawktute hlawh atana kum tin mipui sum (mipui chhiah pek khawm) eng zat nge ni ang? Hetiang zawnga chhut neuh neuh chuan ziaawm ve deuh tur chu kan ni.

FBO leh CBO ten sawrkar thawh ai an thawk taima a, khawvel pumah ruihhlo chi hrang hrang ngai/ngawlveite chhan chhuah harsatzia chu zirchianna tam tak awmah ruihhlo ngai enkawl dam/hlawhtlinna rate chu 10% hnuai lam a ni tlangpui a, 7% te a ni. Thihpui tham dam lohna khirh tak a ni. Chutiang khawpa thil harsaah chuan sawrkar a inthlahdah em em a, kut a kuangkuah a, dan awm sa pawh a hmang ṭangkai duh lo. Rinna behchhan pawl (faith base organization/FBO) leh khawtlanga mipui pawl khat (community base organization/CBO) ten tlawmngaih chhuaha an enkawl zarah sawrkar a kel-e-âwl der a! Zahthlak haih haih tak a ni. FBO leh CBO lah an tlawmngai em em a, an tlawmngaih chhan hi an tlawmngai hrim hrim nge, sawrkar chak loh vanga kan chhe lutuk tur an ngaingam lo ni ang? A enga pawh chu ni se, sawrkar chuan mipui chhiah pek hmangin chutiang addiction lama thawktu tur a ruai ṭeuh lawi a, bân vek se; chutiang mite hlawh chu kawtthlera zu leh ruihhlo rui man khawmtu YMA leh zu leh ruihhlo ngawlveite enkawltu FBO-te pe ṭhin tal se, kan ti dawn em ni ang? Kan kalphung hi a ngaihna hriatthiam a har a ni.

America ram aiin kan vannei asin maw le. America ramah ruihhlo ngaite enkawltu FBO an awm ve lo a, khawlaia mi senghawitu YMA an nei bawk si lo a, an khawpui hrang hrang lamlian hrûlah an rui bu suau suau mai a. Mizoram chu FBO-te’n ruihhlo ngai an enkawl ṭhin avangin ruihhlo ngai an tam ang aiin khaw chhung lamlian sira a huhoa rui bu suau suau hmuh tur an tam lo a; de-addiction centre-ah kan vawm bo duak ṭhin. Khawlai leh biak inah kan felfai hmel tlat a lawm.

A nia sin, sawrkar hi bawng ni loa (bawng chuan tawlailir a hnuk ṭhin a, tawlailir hi bawng hmaa a kal chuan buai hun a awm lo thei lo) bawngtawlailir a nih rau rau chuan tawlailir hnuktu FBO leh CBO te pui se la, mipui sel luai luai ngai loin fel taka de-addiction centre a kal theih a beiseiawm. Hetianga a sawrkar ber a kel-e-awl der ṭhin vang hian mipui kan chiai zo ta ṭhin a, youtuber hoin min hnûk kual vel mai mai a nih hi. Phûng velh ang maiin an pung tawlh tawlh lehnghal!

Engati nge heng dan hi hman a nih loh? The Narcotic Drugs & Psychotropic Substances Act 1985 Section 71(1) chuan ruihhlo ngaite treatment, management, education, after care leh social integration atana tling leh tlin home/centre chu mamawh dan azirin sawrkarin a tam thei ang a dinin emaw, mimal leh pawlin an din te a lo recognize ang tih a chuang.

He dan leh section behchhan hian The Mizoram Management for De-addiction cum Rehabilitation Centre (Alcoholic & Drugs Addict) Rules, 1993 kan nei a. Kan lo neih thlip thlep kha sawrkar leh a hnathawkte’n engmah an tih ṭhat peih loh avangin an lo uṭawk tûr vawn mai mai a. Drug addict-te pawh chu centre/home lama pawh an uipui tui lian thlir liam mai mai ni awm tak a ni. State sawrkar ve reng ruangin Act, hnuaia Rules eng atan maha hmang ṭangkai lo rei lutuk hi a lungchhiatthlak hle a ni.

Dan (act) thupek zam (rule) kaihhruaina (guideline)-te hi kan nei ṭha asin aw! A hmangtu tur sawrkar hnathawk ho hian an rûl-a-raw neih mai mai a. Rûl hian rua an nei a, an hmang ṭangkai lo reng reng a, chutiang vel chu a ni. Police hote hian an hnenah FIR lutte hi misual hrem an nih ngei theih nana chhui chhuah tum ai chuan inbiakremtir zel hi an duh tawh an ti a, tak tak ni maw? ‘Jail a tâwt lutuk a, inngaidam mai rawh u’ te an la tih a nia ka rin. Motor accident te hi traffic leh executive police ten an insawiremtir nasa lutuk a, insurance company an hlâwk ngawt ta ve ang! Sual hi kan pawmzam thei khawp a, sual kan pawmzam theih chhan chu Pathian ṭih lo hnam kan nih vang a ni.

Eng pawh ni se, he rules hian de-addiction, counseling, rehabilitation, after care home kalpui dan tur te, daily routine tur te, vantlang nen an thawh dun dan tur te, enkawltu tur te, doctor leh psychiatrist thlenga nei tur an nih te a sawi vek a. Hetiang taka kaihruaitu tur sawrkar ber a kel-e-awl dêr avangin tun dinhmuna home/de-addiction centre kalpui mek hote en hian he rules hi an zawm lo a ni. A chhan ber pakhat nia lang chu, home kalpui tur hian sum ngai a tam a, tuna kan centre/home neihte erawh mimal, FBO leh gospel team ṭhahnemngaite’n an din a ni tlangpui a; felfai taka funding emaw an dawng lo a, sawkar aṭangin support an hmu ṭha lo bawk a, an kal ve naw naw ni berin a lang. Tute emaw thil pekah an innghat tawp mai.

Ministry of social justice hnuaia National Action Plan for Drugs Demand Rehabilitation (NAPDDR), centrally sponsored scheme-te hi he laia kan home-te hian an hmang ve phak lo a ang khawp mai. Sawrkar lamin ṭan han la thar se la, tuna harsatna kan tawh a zârah Mizoram Drug Treatment cum Rehabilitation Centre Accreditation (Amendment) Rules 2020 pawh an sawi ri ve tawh a. Tun 2020 khan lo peih hman se la chuan he rules hmang hian de-addiction centre khuakhirhin, nurse, counselor leh visting doctor te lo pe tal se la chuan centre-a thihna thleng ṭhin a thleng lo ang. ṬBCC dintupa pawhin mi sawisel vang mai maiin Pathian thu nena a enkawlte a se-zâwl chhuah lo mai thei a ni.

Sawrkar ai maha ngelnghet kohhran tinin an member-te tal buaipui thei turin han sang phek bawk se la, ruihhlo ngawlvei piah lama a enkawlna centre/home harsatna hi a ziaawm ngei ngei ang. Kohhran ṭhenkhat a hausa thêr thûr lutuk hrim hrim hi a ṭha lo, Pathian theihnghilh a hlauhawm. Biak in ropui leh bank-a tangka an dahte vanramah an chhawm thei dawn chuang si lo. Lal Isua lo kal hunah a chuang hnem lutuk dawn a, a uihawm.

Hmawrbâwkna

ṬBCC sawiseltu sawisel ve leh chhawngtute’n an ngaihtuah phak loh chu, ṬBCC enkawl laia thihna tawk chhungte rilru na lutuk puak darh ṭhin a ni tih hi. Thihna hi chu a tawp chiang em bawk a. Inrelbâwlna mumal lo vanga lungawi lohna, ei leh in chhia, saruaka inbual, tui tlan bawlhhlawh, chhungte thil thawn hmu kim lo, thil an zuar to lutuk, etc. tih vel hi chu a la pawmzam theih a. Zu leh drug ngawlvei an chhungte’n an enkawl theih loh, Pathian thu behchhana din centre-a enkawl ve lêm an thi ta mai ṭhin hi an ngaithiam thei lo ni berin ka hria. Kum 2017-a buaina a chhuaha centre-a enkawl mekte an chhuah chum chum ṭum khan Pu Zohmingthanga hmaihma ngeiah, ‘Pu Zohming, tuna helna chhuak hi i centre-a mi an thih vang a ni a. Tun ṭum lo pawh i enkawl lai an thih vanga lungawi lo kan hnenah an rawn complaint fo mai. Thihna avangin TNT pawh veng pakhatin an hual tawh. Herald for Christ Children Home, Lungleng pawh home-a an veng naupang thih vangin suasam tumin Aizawl veng lian tak mipuiin an pan hem hem tawh. Mihring hi kan hlu lutuk! Ruihhlo ngawlvei pawh ni mah se la, an chhungte tan chuan an hmangaih leh an mi lungduh, tuma dawm hlum loh leh damdawia enkawlna dawng loa arte thiha thih ringawt hi a na lutuk. Ruihhlo ngaite hi hriselna derdêp tak an ni a, heta i enkawlte hi an dam loh chuan damdawi inah dah lut vat zel rawh. Centre-ah ni loin, damdawi inah ngei thi tawh se la, miin an huatna che pawh a ziaawm ngei ngei ang,” tiin khawvelin custodial death a huatzia leh police lock-up leh jail-a mi an thih ngai meuh loh thu pawh ka hrilh zui chiam a. “Ni e” a ti duam duam nghe nghe.

A tawp nan tak tak

Zauthanga Memorial Ṭawngṭai Bethel Camping Centre (ZMTBCC) a nih laia thihna tawk vengte’n an au khum vanga a enkawl mekte a chhuahtir hum hum leh ṬBCC a nih hnu, tuna sawiselna vanga a duh duh chhuah a phal leh si hi a inbûk tawk lo a, a ngheh lohthlak hlein ka hria. Tuna chhuak huk zinga drug overdose-a thi pawiti viaute hian ṬBCC-a thite kha pawi an ti viau ang em? 

- Ruatfela Nu