MIZORAM KALTLANGIN MAW?

A kamkeuna

Mizorama cheng hmasa berte lo zîk chhuah dan hi sawi chian a har hle. Mahse, historian leh zir chiangtute chuan kan chet dan phung leh khawsak zia aṭanga an chhui danin, China rama Shinlung emaw, Chhinlungsan emaw aṭanga lo chhuak niin an ngai. Ṭhenkhat chuan BC 210 vel aṭanga lo zi chhuak niin an sawi. Chumi hnuah Burma Shan state-ah insawnin, Kabaw Valley, Khampatah an insawn leh a, a tawpah Chin Hills-ah insawn lehin an ngai.

Mizo chanchin ziah hmasa ber chu kum zabi 16-na aṭanga inṭanin, Lushai Hills-ah, Lushai Hills Autonomous District Council kum 1952 khan neiin, 1972 khan UT-ah, a hnu February 20, 1987 khan state puitling a lo ni ta a. Mizorama cheng hmasate hi tute nge tih dik taka hriat theih a ni lo. Kum sang tam tak chhunga history hausa leh buaithlak tak erawh kan nei tih a chiang. Rin thu inzep erawh tam tak a awm bawk.

Ramri-ah kan awm

Mizoram hian international border km. 722 a nei. Myanmar lam–khawchhak leh chhim lamah km. 404 leh Bangladesh lam–chhim lamah km. 318 a ni. Mizoram hian state ramri Assam, Manipur leh Tripura a nei bawk.

Hetianga international leh state ramri nei thluah kan nih avang hian mihring khawsak phungah nawmna leh awlsamna tam tak awm mah se, dik lo taka sumdawnna kawng awlsam tak a nih avangin hmingchhiat kan tawh phah nasa hle.

1. Drug smuggling: Mizoram hi Myanmar, a bik takin heroin leh methamphetamine aṭanga ruihhlo tawlhruk chingte tan transit point pawimawh tak a ni a, drug smuggling kawngpui ber a ni mek.

2. Cigarette smuggling: Cigarette tam tak chu Myanmar leh Bangladesh aṭangin Mizoramah an luhpui a, chhiah chawi an pumpelh avangin he sumdawnna hi a hluar hle.

3. Gold smuggling: Myanmar leh ram dang aṭangin Mizoramah rangkachak an la lut nasa hle ṭhin a, a tam zawk hi Zo hnahthlak unaute kaltlangin an la lut ṭhin niin a lang.

4. Timber smuggling: Myanmar leh a chhehvel aṭangin far, teak, thinguk, etc. an la lut nasa.

5. Wildlife smuggling: Ramsa smuggling a kal theihna tur transit point ṭha tak a ni. Rannung, sakeibaknei, keite leh sava ram danga thawn chhuahna kawng remchang a nih avangin hetiang smuggling dona kawnga hmalakna Mizoram sawrkar chuan central agency-te nen hma a la mek a ni.

6. Ralthuam tawlhruk: Mizoram hi indona ralthuam tawlhrukna kawng pawimawh tak a ni a, a bik takin Myanmar nena ramri a nih vang a ni. Mizoram-Myanmar ramri hi India rama ralthuam phurh luh nan an hmang nasa hle. Hei hian India hmarchhak biala hel leh firfiakte nen inzawmna thuk tak a nei a ni. Thuneitute chuan ramri bulah surveillance leh patrol an tipung a, ralthuam smuggling leh helna dona tur special task force an din bawk.

6. Lunghlu lak luh: Mizoram kaltlanga lunghlu rubies, sapphires leh jade ang chi lunghlu lak luhna kawng ber a ni. Thawmhnaw, document lem, thamna leh official ṭhenkhat rinawm tawk lohnate avangin a hluar hle.

7. Pawisa lem: Mizoram hi pawisa lem ‘fake note’ hmanga sumdawnna kawng pawimawh a ni. India phai ram leh Myanmar aṭanga pawisa lem lak luh tamna a ni a, a siamna khawl pawh bun tawk an awm a ni mahna!

Hmachhawn a hun

Smuggling dona kawnga hmalakna a nêp rih hle. Heng harsatnate hmachhawn tur hian thuneitute chuan ramhnuai pilrila surveillance leh patrol tam zawk a dah a ngai ta. Smuggling dona tur special task forces chak tak din a hun. Ramri control leh check khauh zawk kalpui a ṭul tak zet ta.

International agency-te nen thawhhona ṭha tak neiin smuggling network-te zawn chhuaha thunun a hun hle. Rorbor Patrols tihpun a ngai tak zet ta. Ramri venhimna tihchak leh ralthuam phurh luh lohna tura patrol tihpun a hun. Inter-agency coordination, central agency-te nen thawhhona ṭha tak neiin, Border Security Force leh Customs Department-te nen smuggling dona tur ruahmanna ṭha zawk kan mamawh.

A tlangkawmna

Heng hmalakna tur pawimawh tak takte hi a ṭhen kalpui mek ni mah se, a la nêp hle a, chuvangin, smuggling activity tihtawp a, Mizoram venhimna tur hi tih tak zeta ngaihtuah a hun ta. A bikin ni tin heroin leh dandawi ruihhlo dang man a tam ṭhin. Khing zawng zawng khi Mizoram Kristian 87.16% awmna ram, inkhawm taima tamna, Pathian biak in ṭha leh changkang tamna, zawlnei ngah, politician ṭawngkaa ram hmangaihtu tamna ram, eiruk leh sum thianghlim lo hmanga inchhekarbawm tamna, a ruka nawhchizuar tamna nia sawi kan Zoram riangtê kaltlanga tawlhruk ṭhinte vek a ni a; kan zavaia ṭanruala do rêm dan ngaihtuah a hun tak zet ta e.

Rorelna in sang berah zu ringawt kan buaipui luai luai reng ringawt a nih chuan Mizoram kaltlanga sualna chi hrang hrang ni tin zan tina kal liam zut zut rengte khi kan do reh tawp lo vang. Chuvangin, aw Zoram, i Pathian tawk turin inpeih rawh le.

- Dr. C. Lalrampana