Mi ngeiawm takte laka lo inven dan
Certified Master Trainer on Entrepreneurship & Development
Ngeiawm taka min ṭawng khum hian engtin nge kan inven ang? In lo inzawt ngai em? An mi tih dan anga han tih ve dawn ila, anmahni ang lek nih kan duh bawk si lo. A harsa ṭhin tiraw?
Midang te mizia leh nihphung chu kan thlak thei lo, mahse an mizia chimawm leh ngeiawm tak atang chuan engtin nge kan ka kan inven ang?? A hnuaia ka tarlan te hi rilruah hre vawng reng ila, a hunah tak hman tangkai kan tum dawn nia.
KAN HRIAT RENG TUR CHU:
1. Mi ngeiawm hi thil thar a ni lo: Hmân aṭang tawha mihringa bet ve tlat a ni. Kan mizia (habit)-a kan neih loh hi a ṭha. Sawi chu a awl, zawm erawh a har ṭhin, mahse, a zawm theih a ni, kan tum phawt chuan.
2. I thinrimna mi dangah kang kai suh: In chhungkuaah intihthinrimna in lo nei a nih pawhin, i hnathawhnaah thinchhiat phah suh. In lama in buaina kha i hnathawhnaah mi dang lakah bun suh.
3. Ngeiawm taka an lo ṭawng khum che chuan ngawihsan rawh: Kan pute’n emaw, kan thawpuite’n emaw, kan hmelhriat miah loh pawhin mi dang zingah min han tih êrh châng pawhin insûm hram rawh. Dik lo taka an lo puh che a nih pawhin ngawi la, hun remchangah thu dik chu hrilhfiah zawk rawh.
4. Fiamthuah laksak rawh: Fiamthua laksak kan tih hian nuihzat rawh ka tihna a ni lo. Ngeiawm taka a ṭawng khan nangmah lo inngaihbel lo la, nuihsan la, a rawn pangngai chho ve mai ang.
5. Chhâng lêt suh: A harsa ang; mahse, a fing zawk i nih kha hre reng rawh. Han chhan let a, ngeiawm tawka han tih let ve sak chu a châkawm ṭhin ngawt ang; mahse, insûm hram rawh aw.
6. Kalsan rawh: A chunga mi zawng zawng khi apply a, awmzia a neih loh chuan kalsan ngam tur a ni. Kalsan han tih hian, a bul hnaiah awm loh tihna a ni (Sap ṭawnga ‘avoid’ kan tih hian a kawh chu, hmu lo der, pehhêl emaw, an awmna hmuna kal loh).
A tira ka sawi tawh ang khian, kan mizia, kan ṭawngkam chhuakah chuan thuneihna chu keimahni chauhin kan nei. Ṭawngkam mawi leh ngaihthlak nuam chiah i chhâk chhuak ang u.
- Jacinta Colney
Certified Soft Skills & Communication Trainer