Zorama mi huaisen ber – ruihhlo ngaite!

Mahni nihna dik tak kan pindan lairila hnutchhiah a, hmai thingháwng vuah chunga khawlaiah leh mi hmuh tura lem kan chan suau suauna Zoram, Kristian state-ah hian mahni nihna ang anga lang chhuak ngam awm chhun chu ruihhlo ngaite chiah hi zuk nia! He thu dikah hian Zoram kohhran buaina, siam thar a nihna tura harsatna chu phûmin a awm nghal zat bawk.

Zoramah hian ngawlveina hrang hrang salah chhûng tin kan tâng ṭhup a; ṭhenkhatin hur ngawl an vei a, ṭhenkhatin eirûk ngawl an vei bawk. Ṭhenkhat thung chu duhâmna ngawl vei nghet tlat, ṭhenkhat erawh thluaka sum lut natna ngawl vei, ṭhenkhat mi rêl ngawl vei tlatte kan ni nuaih mai! Ngawlveina hrang hrangin a luhkhung ni hlawm mah ila, mi duhâm camping, kawrapsawn camping, sex addiction camping siam ngam awm ta thut se, camp lut tur rêng an awm lo ang!

Mahse, ruihhlo ngai pual camping an han buatsaih ta a, ṭhalai rual a sang têlin an lut ruih ruih zel mai a nih hi. Ruihhlo ngaite chiah hi mahni nihna dik tak pawm ngam, mahni nihna zahpui hauh lo, hmaikâwr hmanga inthup bo tum ve lo mi huaisen an ni tlat a ni. Kohhranin ṭhahnemngai takin kum tin mahni tualchhûnga camping a huaihawtahte hian a kum têlin lut kan tlem tial tial.

Kan ngawlveina hrang hrang lak aṭanga chhuah zalen duh tu mah kan awm lo emaw tih mai tur a ni zo ta. Chumi rah chhiatzia hi kan thlir ngam a va hun ta êm! Kohhranin dam kan duh, mahse, kan natna, kan nihna sual tarlang ngama siam tharna chan tum ai chuan, kohhran camping chu mi sual nia kan ngaih ruihhlo ngaite bawkah kan pêm buhbel zel a; anni chauh hian a ni, an nihna zêp lova pawm ngam ni!

Kum tam tak chhûng mi sual tia kan chirhtheh ruihhlo ngaite testimony ringin, kohhranin harhna chan a lo tum tawh a, a la hlawhchham tluang zel rih. Vawi khat tê mah ei rûk chîng testimony ngaihthlak tur kohhranin kan la nei ngai lo a; thluaka sum lut ngawl vei dam leh pawh an awm ngai bawk hek lo. Heng mite testimony hi kohhran siam thar lehna tura kan mamawh tlan a ni lawi si!

Chu ai chuan, zu chu sual tinrêng bulah chhuahin, ruihhlo ngaite chu rûkrûk hmang ber, dâwt sawi thiam berah kan chhuah fel dêr a. Pisa leh sumdawnna hmunpuia dâwt sawi chîng, mipui chan ai ei rûk hmangte erawh an kel è àwl dêr thung. Sual tinreng bul tangka sum ngainat chu duat takin ṭânglaiah kan kuah bet ngawih ngawih a. Khehpuam, chiahpuam, kuhva rah ro leh damdawi tawlhrûka inhnamhnawihte erawh a rûka hur hmangte nen an hmaikâwr phênah mi dawihzep an nihna angin an la biru tluang ta zel a nih hi.

Lemchanna khawvelah hian ngawl vei dang zawngte khian khawtlâng leh kohhran hi an ngawl vei thup nan an hmang thiam êm êm a; an ngawlveina lak aṭanga dam duh tak tak an vâng pharh mai. Sualnate tihpuna a awm tur thu hrilhlâwkna lehkhabu ringtu kan nih avangin kan rama sualna pun nasatzia leh inlâr nasatzia kan hmuin kan hre mek a. Ualau taka kan hmeichhiate social media hrang hranga an inzawrh ngam tawhna ramah kan chang mek a nih hi.

Sum bâwihah chhûng tin kan tâng emaw tih mai tur a ni a, mipat hmeichhiatna hman khawloh mai a ni tawh lo, mawngkaw hurna sual nasa takin a pung a; kan ramah hian hremhmuna sualna awm zawng zawngte kan tuallaiah an rawn insuan ta emaw tih mai tur a ni zo ta.

Mahse, heng sualah hian ka tâng a, chhanchhuah ka ngai tia damna pan ngam erawh ruihhlo ngaite bâk an awm si lo. Lal Isua ngeiin, "Chhiah khawntute leh nawhchizuarte chuan Pathian ram an luh khalh dawn che u," tia a lo sawi tawh kha a dikna kan ramah kan hmu ta a lo ni.

- Lalremliana Pachuau