Ngaihven hlawh tawk lo Ṭhalai hmuamtelel 'vape'

Vaihlo zial (cigarette) zu lo, electronic cigarette/vape zu si ṭhalai zingah an tam a. Chuti chung chuan cigarette pangngai angin a khapna lamin sawi a hlawh tawk loh ang bawkin, man a nih thu pawh hriat tur a awm meuh lo.

E-cigarette hi China aṭangin Myanmar kaltlangin Mizoramah a rawn luta sawi a ni a, foreign cigarette ang thoin India sawrkarin lak luh leh zawrh a khap zingah a tel. Heti chung hian a hlawm lian tak taka tawlh luh a nih ve lêm loh vang nge, a man theitu–Customs, Assam Rifles, adt. pawhin an man thawm hriat tur a tam lo. Chutih laiin, Mizo ṭhalaite’n an intihhmuh viau lawi si.

E-cigarette/vape hmangtu hi ṭhalai an ni ber a; zutu hi chi hnih an awm. Cigarette zu nasa, a ṭha lo tih an hriat vang emaw, an taksaa harsatna a siam vang emawa a thlakna atan vape hmang an awm. Cigarette zu nasa pawh la ni lo, tunlaia uar a nih vanga ti ve ngawt an awm bawk. High school aṭanga college zirlai zingah hmang an tam zual a, chumi tih loha hmangtu tam ber chu kum 45 hnuai lam an ni ber. Nutling/patling chinah hmang an awm tam lo.

Vape hmangtute sawi danin, a hmanrua ber hi Rs 1,000 chuang aṭanga Rs 7,000/8,000 man a ni ber a, chu aia man to deuh pawh a awm. A tui 'refill' na hi millilitre (ml) 5 (Rs 100) aṭanga awm ṭanin, ml. 30 (Rs 800/900) man thlengin a awm.

A zu nasa chuan thla khatah Rs 2,500-3,000 an seng tling a, Rs 1,000 pawh seng tling lo khawpa fâwp tam lo an awm bawk. Ṭhalai, thawh chhuah mumal la nei lo tan a tui refill-na neih reng a harsa a, an zuk tam lo phah nia ngai an awm. A hmanrua leh tui refill-na hi cosmetic dawr, mart leh mimal ina zuar, home delivery ti thei thlengin an awm a. E-cigarette bakah hookah thlengin social media–Facebook leh Instagram lama langsar tak zuar (advertise) ṭhin an awm. A rim, flavour hrang hrang a awm a; grape, apple, mango, banana, adt. a awm bawk.

Nicotine tel a nih avangin vaihlo zial pangngai ang thoin a ngaih (addict) a nâ a, flavour nei a ni bawk nen, thlah a harsa hle tho tih a hmang rei tawh ho chuan an sawi. Vape hmang duh tan pawh nicotine concentration tlemna lam thlan a fuh tih sawi a ni. Vaihlo zial zûk ai chuan a ṭha zawka ngai, khuh hnawk nei tam lo nia insawi an tam a, ṭhenkhat chuan vaihlo zial an zûka an neih loh khuh hnawk leh hrawk ro a siam niin an sawi ve thung. Taksa tana ṭha lo an pai ve ve a, chuap leh lung a khawih pawi dan pawh angkhata ngaih a ni tho tho.

E-cigarette hi India sawrkar chuan The Prohibition of Electronic Cigarettes (Production, Manufacture, Import, Export, Transport, Sale, Distribution, Storage and Advertisement) Act 2019 hmangin a khap. He dan bawhchhia chu kum khat thleng tàn emaw, Rs 1,00,000 thleng chawitir emaw, a pahnih emawa hrem theih a ni.

Vaihlo zial zûk ṭhat lohzia nasa taka kan inzirtir mek lai hian, a aia ṭha lo zawk tia sawi turin finfiahna chiang tak la awm lo mah se, a aia ṭha chuang lo chu a ni phawt mai a. Ṭhalai naupang zawkte’n an uar thar tak, sum senna chuang tlai tak a nih bawk avangin e-cigarette ti lo tura inzirtir leh a zalen lutuk tur ven kawngah ṭan lak tel a ṭul hle.

- Zohmingmawia