Maichâm leh a chhunga betu

Kan Bible-ah hian ‘Maichâm leh a chhunga betu nen teh rawh’ tih hi a awm a (Thup. 11:1). Thupuan bu hi hriat thiam a har khawp mai a. Thil lo la awm tur te, awm tawh leh awm mek te ṭhen hran thiam a har hle.

Tu pa emaw hlo thlo turin thlâm a thleng a, naktuka thlawh tur te, tuk leha thlawh tur te, kar leha thlawh turte a sem a sem a, vawiin a thlawh tur a awm lo va, thlâmah a mu mai mai e, an tih ang deuhin, Pathian thu hi chu mi huna mi leh chu mite tana ziak tia ben per zel chuan, a tih tur tlem deuh ber pahnih Pathian khawngaihna leh hmangaihna bak zawng hi mi dangte chan tura ben per vek mai theih tak a ni awm e. Eng pawh ni se, harsain khirh deuh mah se, kan Bible-a thu awmte hi directly emaw indirectly, engti kawng zawng emaw tal chuan kan tana zawm tur, kan inenna tur darthlalangah hmang ila kan sâwtpui berin a rinawm.

Maichâm leh a chhunga betu teh dan tur hi mistiri-te’n furniture an siam a, a zau zawng leh a sei zawng te an teh ang emaw, puan ṭhuitute’n a hatu tur an teh anga teh tur chi a nih hmel loh va. Maicham leh a chhunga betute’n maicham an hman dan te, a betute biak dan leh thinlung lamte teh tur chi a nih a rinawm. Kan tunlai thil awmzia ngun taka thlirin, a huhova Pathian kan biakna maicham te, chhungkuaa Pathian kan biakna maicham te, mimal anga Pathian kan pawlna maichamte hi ngun taka kan teh a ṭul zual ta hlein a lang. Dik tak leh huaisen taka kan tunlai hun tawng hi kan hmachhawn a ṭhain a rinawm. Zirsangzela hlain a sawi angin, lang chhe deuh ṭhin mah ila, darthlalangah hian kan nihna dik tak kan hmu ṭhin si a!

Kan biak in a ropuiin a lian tual tual a, Pathian biak ina kal kan uar tual tual laiin, hlêp ruk leh smuggling, ruihhlo leh thil ṭha lo dang a hluar hle bawk a. Thil ṭha lo lamah ram pum record kan siam leh ṭhin. Heng thilte hi sang dun thei leh kal dun thei tur chi an ni lovin a lang. Pakhat a san chuan pakhat a hniam ngei tur ni awm tak a ni. Tunah tak phei chuan zing lam ṭawngṭai bakah, tlai lam ṭawngṭai pawh kan ching leh ṭan mek a ni awm e.

Kan maichama ding ṭhin te, Pathian kan biaknaa a puipa leh fatu ṭhinte hi uluk taka kan inteh a ṭul ta hle niin a lang. Maicham aṭanga ṭanin, tlar hmaa thu ṭhin te, tlar hnunga thu ṭhinte thlengin teh neuh neuh ila. Maichama ṭhua ding ṭhinte hi eng ang mite nge ni tlangpui a, tlar hma rawn luah ṭhintute hi khawi aṭanga lo kal nge an nih a, tute nge tlar hnung luah deuh tlangpui ṭhin ang le? Maichama ding thei turin eng nge neih ngai a, kohhran mi hriat hlawh zo turin eng engte nge tih ngai ṭhin tihte hmang hian kan inteh a ṭul ta a ni awm e! Kohhran pawh hian a defensive mechanism atan te, a recruitment rules atante hian Pathian Thlarau Thainghlim hi tehna pui ber leh phawsial bera a neih a ṭul zual ta hle mai.

Kan chhungkaw maichamte pawh hian teh a mamawh ta hle mai. Kan naupan lai chuan Chawlhni tûka chhung inkhawm hmang thei kha kan ngaisang thei khawp mai a. Pa berin secondhand kamiz var nen, hmuihmul ziah zawh hlim thar ver vawr nen, kawmchâr lama thingrema ṭhu chunga a Bible chhiar kara kut zungṭang zep ṭât ṭât chunga tapchhak aṭanga chhuat lai lam hawia nupui fanau lo ṭhu thapte hmaa ding tura a rawn pan phei chhat chhatna in chhung kha chu chhungkaw mumal leh awhawm an ni ṭhin.

Tunah chuan a hneh hian kan hnehsawh lap lap tawh khawp mai. Ni tin chu sawi loh, chaw ei dawn apianga ti thei kan ni deuh fur tawh awm e. Mahse, kan chhungkaw maicham rah chhuah chu ruihhlo enkawlna inin a zawh loh khawp ruihhlo ngai te, bazara thil rate mumal awm thei lo te, contract hna chhe lutuk te, sorkar hnathawk mahni awmna tura awm peih lo te, a state ang pawha state hnufual nihnate a nih si hi!

Chhungkaw maicham buatsaihtute ṭawngṭaina hi kan kianga ni tin zan tin khawsa ṭhin kan fate pawh hian an lo ring tawh lo tawp mai ang tihte hi thil hlauhawm tak a nih tâk hi. Veng pakhatah chuan, sa sât ho hian Inrinni zing ṭawngṭai bâng nuho lo thlen hun an huphurh theihzia fiamthu ti takin an sawi mauh mai!

Kan hlawh hisâpa pawisa neih tawh loh hunahte hian nei tawh lo ṭhin ila, kan zahawmin, chu chuan kan fate hnenah thu a sawi ngei ang. Kan hlawhin a phak loh lei theih lohte hi nei fo ila, chu chu kan fate tana ṭawngṭaina chhan tlak a niin ka ring. Office lama a ziah bo theih theih ziak bo reng chung te, sorkar hna exam question hawn ru zûl zûl chung te, rate dik lova thil hralh char char chung te, dan phal loh thil zuar hreh reng reng lo chunga sawmapakhat pe tam thei fu si te, zing ṭawngṭai taima hle si te hi eng zat tak awm ang i maw! Kan sawi tawh angin, thil awm kawp thei lo tur keimahnia a awm kawp thei tlat ṭhin hi thil zahthlak, hnam rinawm lo ber ze dik tak a ni.

Sikul to taka fate dah a, vawi khat zina thla khat hlawh aia tam senga chhungkua kan deuh reng thei, chu baka in lian pui pui la sa thei bawk, chuti chunga ni tin khawsak buai chuang miah lova te hi kan maichama hmun pawimawh luahtute an ni hlawm mai em le?

Tunlaia kan rama thil thleng mekah kohhran beiseina a lian hle mai a, duh khawp lohna au thawm pawh a ring viau mai. Kohhran pawh hian kan nih ang anga in defend ringawt lo deuhva kan maicham leh a betute kan inteh deuh chu a ṭul ta niin a lang e.

- Rev. Jh. Za Hluna (Paula Pu)