KAWNG PAHNIH

Zing tak aṭangin khawchhe em em hnuaiah a nupui fanaute tui taka an la mut lai chuan an kianga la awm châk ve hle mah se pa ber chuan ni tin mamawh an neih theih nan tiin, amah duhsaktute zara loan hmanga a neih a taxi nen chuan service turin a chhuak leh ta.

Pathianni tûka sa hmeh tur leina tal hlawh chhuah tumin stand-ah chuan ruahsur nasa em em hnuaiah chuan a ding ve ta rân a. Khua a chhiat êm avangin mihring veivâk pawh an tlemin tlânna a vâng hle mai a. Mahse, chuti maia haw leh ngawt thei a ni tawh lo, a tuk zinga sa hmeh tur leina takngial pawh a la tlan chhuak si lo.

Chawhnu dar 1 a lo ri a, an ṭhenawm tlangval pawh dam ṭha sa reng mah ni se, dam takin, phak chep chawpin a tho chhuak ve ta hlawl mai. Tamarind tui vawt tak chu a tlak pup a, an nula siamsak breakfast chu chawhnu dar 1:30-ah a ei a, a ei tui phian lehnghal a.

A rilruah zan dar 7-a an ṭhianho programme chiah a awm tawh avangin Whatsapp hmangin ‘Morning guys... zanin chu nizan ang em em kha chuan haw har tawh lo ang u,’ tih a han post a. Veng chhung leh ṭhalai pawl hnatlang phatna a thawn zawh hnu chuan phone charge pahin inbual turin bathroom a pan nghal a.

Tlai dar 4 a lo rîk chuan taxi pu pawh vawi hnih lai a tlan ve ta a, a nupuiin chhungkaw mamawh zualpui a rawn chah a, a fanu ei chak tlem azawng nen. Khua a nawm loh em avangin dar 6 vela haw turin rilru a siam a. Sa dawr lam panin, a man tlawm a va zawng a, eichawp dawrah a nupui thil chahte chu a lam khawm nghal bawk a. In lam pana haw turin a inkhalh chhuak ta nghal a.

Zan dar 6-ah chuan kan tlangvala pawh chu a inpeih ta viau mai. Dar 7 programme nang turin petrol lak kawi a ngai si a, chhuah a tum ve mek bawk a. A chhungte bulah an programme pawimawhzia leh a tel ngei ngei a ngaih thu a hrilh tawh a, a mood pawh a huau ṭan tawh viau.

Dar dar 6:45 a lo rîk chuan taxi pu chuan a chhungte bul thlen hlân nghakhlel em emin haw kawng a zawh a; kan tlangvala chuan a ṭhiante nena an plan phuahchawp ve tak lam pan chuan a car chu a hawl chhuak ve mek bawk.

Taxi pu leh kan tlangvala chuan an tum ram ve ve an pan a, kawngah intâwk mah se, tu nge an nih a, khawi lam nge an pan dawn an inhriatsak hauh si lo.

Kan mamawh leh duh zawng te, vei zawngte a inang vek thei lo. Inphût chiam chi pawh niin a lang lo.

Duh thlang thei dinhmuna kan din lai hian duhthlanna dik hmang ṭheuh thei turin Pathianin min awmpui vek se; nakin huna kan inchhîrna tur kawng kan thlan loh nan Pathian ráwn chung zelin aw.

- Achhana Fanai, MSV