Eng vangin nge private school-te hian fee tam tak an lak theih le?
May 29, 2025 khan Supreme Court chuan a thlawna pêk emaw, inhriatthiamna rate nen emawa ram pêk an nih laia eng vanga fee sang uchuak pui pui (exhorbitant fee) zirlaite hnen aṭanga la thei nge an nih le (How can private schools, who got land free, charge exhorbitant fees?) tiin Delhi khaw chhunga mimal enkawl sikulte a zawt a ni. Han zawm mai pawh inthlahrunawm lo tura chhinchhiahna (nod) sawrkarin a pe pawh a ni si lo va, sikul fee nasa tak maia sikulin a tipung chu court-in mak tiin a zawt a ni.
A hma lamah high court-in thupek chhuahin, chu thupek zui chuan Delhi-a private sikulte chuan tam tak takin fee an tipung a, a ṭhente phei chu 100% thlenga pungte niin, heng fee sang pe thei lote chungah hian na taka hmalakte pawh a ni bawk a. Chu chuan zirlaiteah hlauhna, thlaphânna leh lehkha zir hleih theih loh khawpa rilru chiainate a thlen bawk. "Sikulte hian sikul zirna hi sumdâwn nan an hmang thei lo," tia thupek chhuah a ni hi a ropui ngawt mai.
Mizorama kan private sikulte fee lakte hi kan chîk ngai em? An naupangte zirna hmasawn nana hma an lakna hi fee nen a inphu kan ti em? Naupangte fee pek nena inphu lo khawpa zirna leh zirtirna ṭanpuina hmanrua (teaching aid, etc) beitham lutuk te, report card puan/lehkha chhe lutuk te, zunram thiarna ṭha, him leh tui thianghim in tur ṭha te, first aid ṭha tak a awm bawk tur a ni.
Heng bakah hian thlipui leh ruahpui nasa lutuk a thlen palh emaw, khaw lum lutuk emaw a thlen palha lo hmachhawn dan te, hripui (Covid-19 ang chi emaw, a chi dang emaw) a len palha zirlaite chiai loh nana ruahmanna leh ṭanpuina ṭha tawk ang chi te leh lirnghing a awma lo hmachhawn dan leh tihchhinna (practice) mumal takte hi an nei ngei bawk tur a ni.
Mizorama private sikul fee-te hi tun hma aṭanga tun thleng hian a sang lutuk tiin emaw khing kan awm loh a vang hian a lo âwm tâwk viau pawh a ni thei. Chutih laiin, heti taka mi nawlpuite’n an bawh tak chinah hi chuan thuneitute’na an en zui a, an bihchian deuh erawh chu a ṭha maithei.
Mimal ipte khawih phak 'Mizoram financial management' kal vanglai a ni a; tin, fee chungchangah kan court sâng berin thutlukna a lo siam bawk nen, Supreme Court aw dungthûl hian thil dangte pawh en tel a, private zirna ina fee pek leh an hlêp tur chin âwm tawk ngaihtuah tel leh hma lam an pan theih nana thurawn ilote pe chunga en lêt dan (appropriate department-a reviewing & monitoring system bilh tel) te thleng hian ngaihtuahna sengin, hengte hi a la awm loh chuan neih tawh a ṭha maithei.
- Dr J.T. Vanlalngheta