Police chhungte hna pek tihtawp a ngai
Mizoram sorkar hnuaiah kum tam tak kal ta aṭang khan police thihsan fate emaw, an chhungte emaw compasonate hmanga sorkar hna (Police)-ah thun hi tihtawp ngei ngei a ngai.
Hetiang an kal dan hi engtik aṭanga hman nge tih leh, tu han tihchhuah nge tih hriat a ni lo a, police thihsan tu leh fate tana post han dah ngawt hi a kawnghmang tawh lo. An thîkawm viau tawh a ni.
Hetiang hi chu râl ramah emaw, duty-naah lo thi palh se, an mahni zahna leh compasonate nan an tu leh fate dah se tu man an thîkin an sawisel lo ang. Chutiang ni loa kum tin mai police tu leh fa an thihsan tana post hnawhkhah ngawt mai hi ṭhalaite'n an thîk viau tawh. Hetiang induhsakna uchuak hi a dik hian a duh lo a ni.
Mizo ṭhalai lehkha thiam hna zawng mi sing têl an awm a, hna hnuaihnung thlengin MA rual pawhin an chuh luih luih tawh a ni. Chutih laia awlsam taka police thi tawh fate an han dah ngawt zel hi chu lehkhathiam heti zozai kan neih tawh laia induhsakna uchuak a ni tlat. Tun sorkar (ZPM) mek chhung pawh hian unit hrang hrangah lak thar an awm a, hei pawh hi ministry tih a ni lem lo. Police department-in kalphung anga an lo neih tawh a nih vangin sorkar fawng vuantu tan han dan ngawt a harsa a ni mai thei.
Hman deuh khan Congress sorkar lai khan Mizoram hmar lamah inkahna a thleng a, police officer leh rank hnuai deuhte an thi a. Khang lai khan Home Minister Pu R. Lalzirliana khan duhsakna ṭha tak a pe a, an service kum chhûtin thla tin an hlawh lak pangngai an la ang a, hamṭhatna pawh a dam laite ang bawkin an dawng ang. An pension hun a thlenin dam laite angin pension pangngai an dawng tur a ni. Kha thil kha tu man an thîk lo a, mitthi chhungte an lawmpui em em zawk. Kha thilah khan CM ni lai Pu Lal Thanhawla leh a ministry khan an fak zawk hial a, fak pawh an phu hle.
Compasonate-a mi tam tak an lak tawhte hi en thîkawm ta viau. Hetianga induhsakna hi department dangah a awm khât viau ang. Eng vanga Police-ah hetiang induhsakna uchuak hi a awm reng mai ni? Ṭhalai hna zawng tan an thîkawm tak zet a, tihtawp hmak tawh ni se Mizo ṭhalai, lehkhathiam tak tak, fel tak takte an lawm hle ang; nipui pawh kan lawm zawk ang.
- Lalkhirhvela