MPSC hna lak dan hi

Sawrkar thar a rawn piang a, MSSSB ṭhiahna tur thuchhuah 8th February 2024 khan tichhuakin, group B hna lak chu MPSC kutah a awm leh ta a. MSSSB ṭhiah a nih khan MPSC hi thuam chak leh hna lak kawnga induhsakna awm lo tura sawi a ni.

Group A & B hna latu atana MPSC hman hi a ṭhat lohna a awm hran lo, mahse exam result nghah hun chhung rei ṭhin lutuk erawh hi chu hna zawng lai tan harsatna a thlen avangin duh khawp loh lai leh kalphung samkhai deuh zawk awm theih dan tura ngaih tlem a zawng tarlan ka duh a ni.

Tun hnai group B (non-gazetted) hna lak hi ngaihtuah ta ila. Nikum December Combined Group B Exam (Assistant, UDC, adt) result hi May 2025 thlengin written result a la chhuak lo va, JAO result January 2025-a mi pawh a la chhuak thei rih lo. Tun thla hian SI (Supplies) & Receptionist leh UDC exam buatsaih ni lehin, hei pawh hi written result nghah leh fat a ngaih hmel. UDC (December 2024)-a tling turte kha tun kum UDC (May 2025) result chhuak se an tling leh nual bawk ang a, hna lak hmasak result chhuak hman si lova hna lak inthuah hnem lutuk hi a fuh lo deuh awm e. Nikum Prelims June thlaa buatsaih pawh tun kum April thla tawpah tlingte kan hriat theih chauh avangte hian MPSC hi an zawh loh nghâwngkawl kan bahtir em ni?

Group B (Non-Gazetted) result chhuah chak hleih theih lohna chhan hi hna diltu sang telte conventional type questions (essay, adt.) endik hi a ni thei ang em? UDC (December 2024) exam-ah khan hna diltu 14,517 awmin, a zatve pawn exam se, paper sang tel endik hi thil na mai a ni lo.

Hna lak chhung rei loh zawk nan exam buatsaih dan hi her danglam hret ta ila. Entir nan, Qualifying Paper leh OMR hman ṭangkai zual lamte hi. Nikum September thlaa AAAO & AAO exam kha OMR veka zawhna siam niin, November thla tirah written result a chhuak hman daih. Prelims Paper-II (CSAT) entawn hian Arithmetic & Reasoning te hi group B (non-gazetted)-ah hian Qualifying Paper atan hmang ta ila, qualifying paper paltlangte chauh paper dang chhanna kan endiksak chuan hun leh tha sen a tlem phah ngei ang.

Group B (non-gazetted) exam-ah hian syllabus pahnih hman a ni a:

• Assistant & UDC syllabus: Assistant & UDC Syllabus Paper-I hi GK leh English (darkar 3) a ni a, Paper-II hi Basic Computer Knowledge, Arithmetic & Reasoning (darkar 3) a ni. Computer certificate hi hna dil nan kan phût tho a, chuvangin, office work an thiam dawn tih lanna computer certificate ber an neih tho chuan Computer Knowledge zawhnate hi a ngai tehchiam pawn a lang lem lo. Tin, Essay pawh hi group B syllabus pakhat zawkah an telh chuang lo hian thil chuangtlai a nihtir deuhin a lang.

• General Competitive Examination syllabus: Paper-I (General English) hi OMR leh ziaka chhan ngai (letter writing, precis, adt.) hi darkar 3 hun chhung pek a ni a, Qualifying Paper awm se chu endik a hautak loh phah sawt ang. Paper-II (GK, Arithmetic & Reasoning) hi darkar 2 chhunga chhan ngai a ni ve thung. UDC syllabus Paper-II (Arithmetic & Reasoning, Computer Knowledge) hi zawhna 100 darkar 3 chhunga chhan tur a nih laiin, General Competitive Examination Paper-II ( GK, Arithmetic & Reasoning) zawhna 100 darkar 2 chhunga chhan tur a nih avangin candidate tan a rei lo bik hle awm e.

Mihring pung chho zel mah se, sawrkar hna a pung thur thur ve si lo va, chuvangin, Mizoram sawrkar hna lakah Mizorama chengte ngei duhsak thei zawnga Recruitment Rules ṭha leh khauh zawk duan a ṭul ta viau. Assam pawn an state sawrkar hna lakah a ram mi ngeite tan chauh a tih ang hian Mizoram mite tan chauh tih ve a hun tawh.

Hna lak rang si, felfai tho bawk si, hna diltu tan a ṭha bawk si nei thei tur chuan MPSC hian Recruitment Rules leh syllabus ṭha zawk a neih a ngai. Tichuan, sawrkar pisa hnathawk indaih lohna avanga hna lakte hi a chak phah sawt ang.

- Remsanga